Адыгеим и ЛIышъхьэ ишIухьафтын зэрылъ зэнэкъокъум текIоныгъэр къыщыдэзыхыщтыр я 8-рэ турым къыдыхэлъытэгъэ ешIэгъоу зэкIахьэгъагъэм къыщынэфэщэт.

Мыщ «Адыгэкъалэрэ» «Урожа­имрэ» щызэIукIэщтых.

Я 18-рэ турым зэнэкъокъум апэрэ чIыпIэр къыщыдэзыхыгъэр къыщынэфэн ылъэкIыщтыгъ. Апэрэ чIыпIэхэм ащыт «Урожа­имрэ» «Кавказымрэ» поселкэу Тульскэм щызэдешIагъэх. Пчъа­гъэр зэфэдизэу зэIукIэгъур заухы­кIэ, текIоныгъэр къыдэзыхыщтыр джыри къэнэфэщтыгъэп, арэу­щтэуи хъугъэ. Я 12-рэ такъикъым хьакIэхэм якомандэ хэт Давид Жирновым пчъагъэр къызэIуихыгъ. Ау «Урожаим» ифутболистхэр ащ къезэгъыгъэхэп, я 57-рэ ыкIи я 70-рэ такъикъхэм тIогъогогъо Iэ­гуа­ор къэлапчъэм дадзагъ. Ау я 84-рэ такъикъым «Кавказым» пчъагъэр зэфэдиз ышIыгъ – 2:2-у зэIукIэгъур аухыгъ.

Джы «Урожаир» чемпион хъу­ным пае «Адыгэкъалэ» ешIэгъур къышIуихьын фае. «Адыгэкъалэ» текIоныгъэр къызыдихыкIэ е пчъагъэр зэфэдизэу зэIукIэгъур заухыкIэ «Кавказым» апэрэ чIыпIэр къыдихыщт. ЕшIэгъур шэкIогъум и 25-м сыхьатыр 2-м рагъэжьэщт.

Зэнэкъокъум ящэнэрэ чIыпIэр къыщыдэзыхыгъэр къэнэфагъ — ар командэу «Чэчэнай». Ар Адыгэ къэралыгъо университетым ико­мандэ IукIагъ, ешIэгъур 1:1-у аухыгъ ыкIи ащ ишIуагъэкIэ Теу­цожь районым ифутболистхэм джэрз медальхэр къахьыгъэх.