Студентхэм ядокументхэр зэрахьанхэмкIэ джы амалыкIэхэр щыIэх. 2024-рэ илъэсым къыщегъэжьагъэу электроннэ зачетнэ тхылъхэм, студенческэ билетхэм ыкIи зэреджэхэрэр къэзыушыхьатрэ нэмыкI тхьапэхэм якъэбар къэралыгъо фэIо-фашIэхэм япортал арытыщт.

Мыщ епхыгъэ проектыр Урысые Феде­ра­цием цифрэмкIэ и Министерствэ ипортал къырагъэхьагъ. ЗэралъытэрэмкIэ, электроннэ студенческэ тхылъыр 2024-рэ илъэсым къырагъэжьэщт. Онлайн шIыкIэр къызыфагъэфедэзэ джы сту­дентхэр зэреджэхэрэм уасэу къафа­шIырэр алъэгъущт, тхьапэхэр къызыды­рамыхьакIыхэу фэгъэкIотэнэу яIэхэр къызыфагъэфедэн алъэкIыщт.

Урысые гъэзетым къызэритырэмкIэ, бакалавриатым, специалитетым, магис­тратурэм, ординатурэм ыкIи аспирантурэм ачIэс студентхэм мы шIыкIэр къызы­фагъэфедэн алъэкIыщт.

ЗэрагъэнафэрэмкIэ, электроннэ документыр къызыфагъэфедэзэ мэшIо­кум, электричкэм, къэлэ транспортым фэгъэкIотэнхэр яIэхэу билетхэр къащэ­фынхэ алъэкIыщт.

УФ-м цифрэмкIэ и Министерствэ къызэритырэмкIэ, электроннэ студенческэ тхылъым тхьапэм тетыр зэблихъущтэп, ныбжьыкIэхэм тIури къызыфагъэфедэн амал яIэщт.

2025-рэ илъэсым щылэ мазэм и 1-м къэралыгъо фэIо-фашIэхэм арыт паспортыр бгъэфедэзэ хьакIэщхэм уачIэ­тIысхьан, IэзапIэхэм ыкIи сымэджэщхэм ащыбгъэфедэн плъэкIыщт. ЦIыфым исурэт ыкIи QR-кодыр ябгъэлъэгъумэ икъущт.

АмалыкIэу яIэщтым еплъыкIэу фыря­IэмкIэ студентхэм гущыIэгъу тафэхъугъ.

Самира, Мыекъопэ къэралыгъо технологическэ университетым щеджэ:

— Мыщ фэдэ приложениехэр сыгу рихьэу сэгъэфедэх. Джы тхьапэхэри къе­тымыхьакIхэу электроннэ шIыкIэм тет амалыр дгъэфедэн зэрэтлъэкIыщтыр зызэхэсэхым сигуапэ хъугъэ, сыда пIомэ ар бэкIэ нахь гупсэф. Ахэр къыпщы­гъупшэхэуи мэхъу. Джы зэкIэ телефоным тетыщт.

Амир, Адыгэ къэралыгъо универ­ситетым истудент.

— Электроннэ шIыкIэм тетэу тхылъхэр дгъэфедэнхэ зэрэтлъэкIыщтыр нахь IэшIэх. Анахьэу ушэтынхэр къызежьэхэкIэ зачетнэ тхылъыр къепхьакIыныр сшIогу­мэкIыгъу, сыда пIомэ ар къыпщыгъупшэн, зыгорэм къытебнэн плъэкIыщт.

Зыгъэхьазырыгъэр ДЕЛЭКЪО Анет.