Адыгабзэр ашIэным пае
«Адыгабзэ зэтэгъашIэ» — мыщ фэдэ шъхьэ зиIэ зэнэкъокъу республикэм щаублагъ. Черкес Медиаплатформэр ащ икIэщакIу.
Я 3 — 11-рэ классхэм ащеджэрэ кIэлэцIыкIухэр хэлэжьэнхэу зэхэщакIохэм рагъэблагъэх.
Аныбжь елъытыгъэу зыкъыщызгъэлъэгъощтхэр купищэу гощыгъэщтых: я 3 — 5-рэ, я 6 — 8-рэ, я 9 — 11-рэ классхэр.
Зэнэкъокъум шапхъэу пылъхэмкIэ, ащ хэлэжьэщтым MP4 шъуашэм илъ видео 1920*1080-р икъэбзагъэу (Full HD), зы нэгъэупIэпIэгъум кадрэ 24-р ыубытэу къыгъэхьазырын фае. КIэлэцIыкIум игущыIэ шIуфэскIэ ыублэнышъ, зыщыщыр, ыцIэ, ылъэкъуацIэ, къыIотэщтыр зыфэдэр, зытхыгъэр, классэу зэрысыр, еджапIэу, чылэу къыгъэлъагъохэрэр ыпэ ригъэшъынхэшъ, ащ Iотэжьыр къыкIэлъыкIонэу щыт. ПстэумкIэ IофшIагъэм зэкIэлъыкIокIэ гъэнэфагъэ хэлъэу, ублапIэм къыщегъэжьагъэу кIэухым нэсыжьэу ищыкIэгъэ Iахьхэр къызэлъиубытхэу гъэпсыгъэн фае. Видеом икIыхьагъэ хэлажьэрэм ыныбжь елъытыгъэщт: а 1-рэ купымкIэ — зы такъикъ, я 2-мкIэ — такъикъи 2, я 3-мкIэ — 3. Анахьыбэм такъикъи 10-м Iотэжьыр нэсын ылъэкIыщт. Ежь IотакIом икъэбар пэIухьэрэ уахътэр ащ халъытэщтэп. Джащ фэдэу видеохэр зэпыгъэуцуагъэхэ хъущтэп, зэкъаIоу тетхэгъэн фае. Зэнэкъокъум икIэщакIохэм къызэраIорэмкIэ, шапхъэхэм адимыштэрэ IофшIагъэр хагъэлэжьэщтэп.
ТекIоныгъэ къыдэзыхыгъэхэр зыщагъэшIощтхэ зэхахьэр тыгъэгъазэм и 28-м рагъэкIокIынэу рахъухьэ. ПстэумкIи IофшIэгъэ анахь дэгъуи 10 къыхагъэщыщт, ары пэпчъ шIухьафтынэу сомэ мини 5 зырыз аратыщт. Джащ фэдэу, хагъэунэфыкIырэ чIыпIэ зыхьыгъэхэм анэмыкIэу пчъэгъэ инхэр изыгъэкъугъэхэр шIухьафтынхэмкIэ къыхагъэщыщтых. Зэнэкъокъум изэфэхьысыжьхэр тыгъэгъазэм и 20-м «Черкесская Медиаплатформа» зыфиIорэм ихъытыу нэкIубгъо къырагъэхьащт.
Адыгэбзэ зэгъэшIэным сабыйхэр пыщэгъэнхэм зэнэкъокъур фэлажьэ. IофшIагъэхэм яугъоин шэкIогъум и 30-м нэс кIощт.
Анцокъо Ирин.