МыIэрысэу къаугъоижьырэм хэхъуагъ
Пхъэшъхьэ-мышъхьэ ыкIи цумпэ лъэпкъхэр къызщыкIырэ чIыгу Iахьхэм Адыгеим щахахъо.
[caption id="attachment_141939" align="aligncenter" width="800"] АМ.[/caption]
Чъыгхатэмэ гектар 4500-рэ аубыты, ащ щыщэу гектар 2000-р псынкIэу пхъэшъхьэ-мышъхьэхэр къызпыкIэрэ чъыгхэр къызщагъэкIырэ Iахьых, илъэситфым къыкIоцI ахэр гектар 1200-кIэ нахьыбэ хъугъэх.
АР-м мэкъу-мэщымкIэ и Министерствэ къызэрэщаIуагъэмкIэ, аужырэ уахътэм чъыгхатэхэм ягъэтIысхьанрэ ыкIи цумпэ лъэпкъхэм якъэгъэкIынрэ мэкъумэщ хъызмэтым нахь зыфегъазэ, а лъэныкъохэмкIэ хэхъоныгъэхэр ешIых. Цумпэ лъэпкъхэм гектар мини 5,7-рэ аубыты, ащ щыщэу мэкъумэщ организациехэмрэ мэкъумэщ-фермерскэ хъызмэтшIапIэхэмрэ ателъытагъэр гектар мин 1,5-рэ.
2019-рэ илъэсым къыщегъэжьагъэу пхъэшъхьэ-мышъхьэу ыкIи цумпэ лъэпкъэу къаугъоирэр процент 75-кIэ нахьыбэ хъугъэ. ГъэрекIо ащ фэдэу къаугъоижьыгъэр тонн мин 44,4-рэ хъугъагъэ, ар процент 25-кIэ ыпэрэ илъэсым нахьыб. Мыгъи лэжьыгъэ бай къахьыжьынэу ежэх, мыIэрысэхэм ягъэмэфэ лъэпкъхэр пштэмэ, тонн мин 11 къаугъоижьыгъах. Мы лъэхъаным къагъэкIырэ мыIэрысэ лъэпкъхэу флорина, айдаред, делишес, голдстар, гранни смит, голден зыфаIохэрэр.