Ермэлыкъхэр зэпыухэрэп
Зыгъэпсэфыгъо мафэхэм зэхащэрэ ермэлыкъхэр республикэм икъэлэ шъхьаIэ щызэпыухэрэп. Ахэр, хабзэ зэрэхъугъэу, урамхэу Советскэм ыкIи Димитровым ыцIэ зыхьырэм шэмбэтым ащызэхащэх.
[caption id="attachment_141905" align="aligncenter" width="800"] Сурэтыр: Анцокъо Ирин.[/caption]
Джащ фэдэу бэдзэрэу «Казачий» зыфиIорэм щыкIорэ сатыури зыгъэпсэфыгъо ермэлыкъхэм ахалъытэ. Ахэм ахэлэжьэнэу гурытымкIэ щэкIуи 130-рэмэ зарагъэтхы. Ахэр Мыекъуапэ, ащ къыпэIулъ псэупIэхэм, Кощхьэблэ, Шэуджэн, Красногвардейскэ ыкIи Джэджэ районхэм, джащ фэдэу Пшызэ шъолъырым къарыкIыгъэ сатыушIэх, унэе мэкъумэщ хъызмэтшIапIэ зыгъэлэжьэрэ къоджэдэсых.
«Гъомылапхъэхэм ауасэ проценти 10-м къыщегъэжьагъэу 30-м нэсэу къащагъэкIэнэу щакIохэм ятэIо. АхэмкIэ ар хьылъэ хъущтэп, сыда пIомэ щэпIэ чIыпIэм ыпкIэ аIытхырэп. Ары пакIошъ, ежьхэм гъомылапхъэу къыращэлIагъэр цIыфхэм зэлъашIэнымкIэ амалышIу агъоты», — еIо къэлэ администрацием иIофышIэу Пэрэныкъо Аскэр.
Ары нахь мышIэми, нэмыкI щэпIэ чIыпIэхэм е бэдзэрым ащагъэнэфэгъэ уасэхэм анахьи ермэлыкъым телъ пстэури нахь щыпыут дэд пIон плъэкIыщтэп. ГущыIэм пае жъугъэу агъэфедэрэ картоф килограммыр сомэ 35-кIэ щыIуагъэкIы, лы къэбзэ куум сомэ 650-рэ ыуас. МыIэрысэр — сомэ 50-м къыщежьэ. Мыщ дэжьым щэфакIомкIэ федэ хъурэр щымыщ зыхэмылъ ыкIи бэрэ щымылъыгъэ гъомылапхъэр ыщэфын амал зэригъотырэр ары.
2023-рэ илъэсыр зытыублагъэм къыщегъэжьа-гъэу республикэм икъэлэ шъхьаIэ ермэлыкъи 173-рэ щызэхащагъ. Илъэсыр екIыфэ а пчъагъэм джыри хэхъощт. ПэшIорыгъэшъэу зэрагъэнэфагъэмкIэ, ИлъэсыкIэм ипэгъокIэу тыгъэгъазэм и 3-м мэфэкI ермэлыкъ зэхащэщт.
Анцокъо Ирин.