ФутболымкIэ Урысыем изэнэкъокъу иятIонэрэ лигэ хэт командэхэм зичэзыу ешIэгъухэр яIагъэх. Мыекъопэ «Зэкъошныгъэр» Астрахань щешIагъ.

Бысымхэм тIогъогогъо Iэгуаор къэлапчъэм дадзагъ ыкIи текIоныгъэр къыдахыгъ. «Астрахань» (Астрахань) — «Зэкъошныгъ» (Мыекъуапэ) — 2:0 (0:0).

ЗэIукIэгъур къэлэ стадионэу А.И. Колосовым ыцIэ зыхьырэм щыкIуагъ ыкIи нэбгырэ 274-рэ ащ еплъыгъ. Апэрэ таймыр 0:0-у аухыгъ. Я 27-рэ такъикъым «Зэ­къошныгъэм» хэт Артем Теле­повыр ешIапIэм къырагъэкIыгъ. Арэущтэу щыт нахь мышIэми, тифутболистхэр къызэкIэкIуа­гъэхэп, ыпэкIэ илъыщтыгъэх, Iэгуаор къэлапчъэм дадзэнымкIэ амалышIухэр яIагъэх. Ау ар къадэхъугъэп.

«Астрахань» щешIэрэ Дзеком Фотсо я 82-рэ такъикъым пенальтикIэ пчъагъэр къызэIуихыгъ. ЗэIукIэгъур аухынкIэ тIэкIу къэнагъэу мы футболист дэдэм ятIонэрэу Iэгуаор къэлапчъэм дидзагъ – 2:0-у ешIэгъур аухыгъ.

— Нахь пытагъэ къызхэдгъэ­фэн фэягъ, ау ар къыддэхъугъэп. Тифутболистхэм ащыщ ешIапIэм зэрэрагъэкIыгъэр къин къытщы­хъугъ, — къыIуагъ «Зэ­къошны­гъэм» хэт Зезэрэхьэ Артур.

Джы «Зэкъошныгъэр» апэрэ чIыпIэм фэбэнэн ылъэкIыщтэп, сыда пIомэ «Машук-КМВ-р» очкоуи 4-кIэ ыпэ ишъыгъ, къэнэжьыгъэр зы тур ныIэп.

Командэхэр зыдэщыт чIыпIэхэр ыкIи очко пчъа­гъэу рагъэкъугъэр:

1. «Машук-КМВ» — 18. 2. «Зэкъошныгъ» — 14. 3. «Рубин» — 14. 4. «Кубань Холдинг» — 12. 5. «Легион» — 7. 6. «Астрахань» — 7.

ШэкIогъум и 25-м «Зэкъошныгъэр» «Машук-КМВ-м» Мыекъуапэ щыIукIэщт.

Я 6-рэ турым щызэдешIэщтых:

«Зэкъошныгъ» — «Машук­-КМВ», «Кубань Холдинг» — «Легион», «Рубин» — «Астрахань».