Зэнэкъокъум икIэух
ПроектыкIэхэм IэпыIэгъу афэхъугъэнымкIэ зэнэкъокъоу «Умник-2023» зыфиIорэм икIэух предпринимательхэм IэпыIэгъу зыщарагъэгъотырэ гупчэу «Мой бизнес» зыфиIорэм тыгъуасэ щыкIуагъ.
[caption id="attachment_141658" align="aligncenter" width="800"] Сурэтыр: МКъТУ-м ипресс-къулыкъу.[/caption]
АР-м экономикэ хэхъоныгъэмрэ сатыумрэкIэ иминистрэу Шэуджэн Заур, Мыекъопэ къэралыгъо технологическэ университетым инновационнэ хэхъоныгъэмкIэ ыкIи научнэ IофшIэнымкIэ ипроректорэу, инновациехэм IэпыIэгъу афэхъурэ шъолъыр Фондым ипащэу Татьяна Овсянниковар, предпринимательхэм IэпыIэгъу зыщарагъэгъотырэ гупчэу «Мой бизнес» зыфиIорэм ипащэу КIыкI Артур, апшъэрэ еджэпIитIумэ ялIыкIохэр, республикэм ипредпринимательхэр, ныбжьыкIэхэр Iофтхьабзэм хэлэжьагъэх.
АР-м и ЛIышъхьэу КъумпIыл Мурат ыцIэкIэ АР-м иминистрэхэм я Кабинетрэ «Научнэ-техническэ лъэныкъомкIэ предприятие цIыкIухэм IэпыIэгъу ягъэгъотыгъэнымкIэ Фондыр» зыфиIорэ федеральнэ къэралыгъо гъэIорышIапIэмрэ зэзэгъыныгъэу зэдашIыгъэм ишIуагъэкIэ 2023-рэ илъэсым щылэ мазэм и 23-м Мыекъопэ къэралыгъо технологическэ университетым Фондым ишъолъыр къутамэ къыщызэIуахыгъагъ.
2023-рэ илъэсым жъоныгъуакIэм и 5-м научнэ-инновационнэ проектэу «Умник-2023» зыфиIорэм хэлажьэ зышIоигъохэм ятхыпъхэр къырахьылIэнхэу аублэгъагъ. Мыекъопэ къэралыгъо технологическэ университетым шIэныгъэм епхыгъэ я XI-рэ фестивалэу «NAUKA 0+» зыфиIоу щыкIуагъэм финалныкъом ихьагъэхэр къыщылъэгъуагъэх. ЗэкIэмкIи инновационнэ проект 45-рэ зэнэкъокъум къырахьылIэгъагъ, ахэм ащыщэу 37-р пхырыкIыгъагъ. Финалым проект 23-рэ ихьагъ. ТекIоныгъэ къыдэзыхырэм сомэ мин 500 фагъэшъошэщт.
Зэнэкъокъум илъэс 18-м къыщегъэжьагъэу 30-м нэс зыныбжьыхэр хэлэжьэнхэ амал яIагъ. Ахэм янахьыбэр Мыекъопэ къэралыгъо технологическэ университетым ыкIи Адыгэ къэралыгъо университетым ястудентых. Iофтхьабзэм ипэублэ зэнэкъокъум иэкспертхэм ыкIи хэлэжьэрэ ныбжьыкIэхэм щытхъу тхылъхэр, сертификатхэр афагъэшъошагъэх.
Шъолъырым иэкономикэ хэхъоныгъэхэр егъэшIыгъэнхэмкIэ шIэныгъэлэжь ныбжьыкIэхэр къыхэгъэщыгъэнхэр, ахэм япроектхэр щыIэныгъэм щыпхырыщыгъэнхэр, ащкIэ амалышIухэр аратынхэр, ныбжьыкIэхэм яшIэныгъэхэм ахагъэхъоныр, инновационнэ предприятие цIыкIухэм IэпыIэгъу афэхъунхэр ары зэхэщакIохэм пшъэрылъ шъхьаIэу зыфагъэуцужьырэр.
— ТиныбжьыкIэ чанхэм ягухэлъхэр къыраIотыкIынымкIэ, япроектхэр щыIэныгъэм щыпхыращынхэм фэшI ахъщэ IэпыIэгъу ягъэгъотыгъэнымкIэ мы зэнэкъокъум мэхьанэ ин иI. IофшIэнэу къырахьылIагъэхэм янахьыбэр «Биотехнологии» зыфиIорэм епхыгъэх, джащ фэдэу IT-технологиехэм афэгъэхьыгъэ проектхэр къэзыгъэхьазырыгъэхэри ахэтых. УцугъуитIумэ текIоныгъэ къащыдэзыхыгъэхэр ары непэ зыкъэзыгъэлъэгъощтхэр. Непэ коммерцием елъытыгъэу япроектхэр къыраIотыкIыщтых, презентациехэр къагъэлъэгъощтых. Мыгъэ апэрэу мы зэнэкъокъур зэхэтэщэ, ау къэкIорэ илъэсхэм лъыдгъэкIотэнэу, ахъщэ IэпыIэгъоу пылъми хэдгъэхъонэу тэгугъэ, — къыIуагъ Шэуджэн Заур. Илъэсым ыкIэ нэс текIоныгъэ зыфагъэшъошагъэр къэнэфэщт.
ДЕЛЭКЪО Анет.