Хабзэр амыукъонымкIэ АР-м и Координационнэ зэIукIэ изэхэсыгъоу Адыгеим и ЛIышъхьэу КъумпIыл Мурат пэщэныгъэ зыщызэрихьагъэр республикэм и Правительствэ зычIэт унэм непэ щыкIуагъ.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, АР-м ипрокуратурэ, хэгъэгу кIоцI IофхэмкIэ и Министерствэ, щынэгъончъагъэмкIэ Федеральнэ къулыкъум АР-мкIэ и ГъэIорышIапIэ, Урысыем и Следственнэ комитет АР-мкIэ иследственнэ гъэIорышIапIэ, муниципальнэ образованиехэм япащэхэр.

Зэхэсыгъом хэлэжьагъэхэр лъэпкъ, федеральнэ проектхэр агъэцакIэхэзэ хэбзэукъоныгъэхэр зэрашIыхэрэм, общественнэ-политикэ зыпкъитыныгъэр къэухъумэгъэным, аппарат-программэ комплексэу «Щынэгъончъэ къал» зыфиIорэм зегъэушъомбгъугъэным япхыгъэ Iофыгъохэм щатегущыIагъэх.

АР-м и УплъэкIокIо-лъытэкIо палатэ итхьаматэу Павел Стаценкэм Iофтхьабзэм къызэрэщиIуагъэмкIэ, муниципальнэ образование заулэмэ бюджет мылъкур зэрагъэфедэрэр ауплъэкIугъ. 2022 — 2023-рэ илъэсхэм лъэпкъ проектхэм апае мылъкоу къатIупщыгъэр шIуагъэ къытэу зэрагъэфедагъэм уасэ къыфа­шIыгъ. КIэлэцIыкIу IыгъыпIэр станицэу Келермесскэм зэрэщагъэпсырэм, искусствэхэмкIэ еджапIэу станицэу Ханскэм дэтыр зэрагъэкIэжьырэм анаIэ тырагъэ­тыгъ. Псауныгъэм икъэухъумэн фэгъэзэгъэ учреждениехэм мылъкоу къафа­тIупщырэр зыфытегъэпсыхьэгъэ гухэлъхэмкIэ агъэфедэмэ зэрагъэшIагъ.

Зэхэсыгъом зэрэщыхагъэунэфыкIы­гъэмкIэ, нахьыбэрэ ашIырэ хэукъоныгъэхэр — проектхэм зэхъокIыныгъэхэр зафашIырэ нэуж къэралыгъо экспертизэхэр зэрэзэхамыщэхэрэр, сметэхэр мытэрэзэу зэрэзэхагъэуцорэр, щэфэнымкIэ къэбархэр икъоу зэраIэкIамыгъахьэхэрэр. Хэукъоныгъэу къыхагъэщыгъэхэр икъоу зэхэфыгъэнхэм, подряднэ организациехэм даохэр тэрэзэу афэшIыгъэн­хэм мэхьанэшхо зэряIэр республикэм и ЛIышъхьэ шъхьафэу къыхигъэщыгъ. Ведомствэхэм япащэхэм пшъэрылъ афи­шIыгъ псэуалъэу атыхэрэм гъунэ зэралъа­фырэр нахь агъэлъэшынэу.

«ЗэдагъэцэкIэрэ проектым хэлажьэрэ пэпчъ ышъхьэкIэ пшъэдэкIыжь зэрихьырэр зэхишIэн фае. Хэукъоныгъэу къыхагъэщыхэрэр дагъэзыжьынхэ, хабзэу щыIэхэр аукъо зэрэмыхъущтымкIэ афагъэпытэн фае», — къыIуагъ КъумпIыл Мурат.

Общественнэ-политикэ зыпкъитыны­гъэр къэухъумэгъэнымкIэ, къэралыгъо гъэIорышIэным ылъапсэхэм къакIезыгъэчын зылъэкIыщт Iофтхьабзэхэр зэхамыщэнхэмкIэ амал тедзэу зэрахьан фаехэми мыщ щатегущыIагъэх.

АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр къызэриIуагъэм­кIэ, общественнэ-политикэ Iофхэр непэ республикэм зыпкъ щитых. Зигугъу къэт­шIыгъэ Комитетми, къулыкъу зэфэшъхьафхэми лъэпкъ, дин зэгурыIоныгъэр гъэпытэгъэным тегъэпсыхьэгъэ амалхэр зэрахьэх. ЗыкъэухъумэжьынымкIэ ыкIи ошIэ-дэмышIэ IофхэмкIэ Комитетым ипащэу Вячеслав Лотаковымрэ АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэу Владимир Картамышевымрэ аппарат-программэ комплексэу «Щынэгъончъэ къал» зыфиIорэр зэрагъэфедэщтым къытегущыIагъэх.

Зэхэсыгъом зэрэщыхагъэунэфыкIы­гъэмкIэ, ошIэ-дэмышIэ тхьамыкIагъохэр къэхъун зэрилъэкIыщтхэмкIэ псынкIэу макъэ зэрарагъэIурэ системэр респуб­ликэм щызэхэщагъ. 1978-рэ илъэсым республикэ структурэу ащкIэ зэхащагъэр агъэкIэжьы. 2020-рэ илъэсым номер зыкIэу «112-мкIэ» оперативнэ къулыкъу­хэм макъэ зэрарагъэIурэ системэр щыIэ хъугъэ. Общественнэ рэхьатныгъэр зэраукъуагъэр къэзыгъэлъэгъорэ видеокамерэ 320-рэ къалэхэмрэ районхэмрэ ащагъэуцугъэх. Зэхэсыгъом къызэрэщыхагъэщыгъэмкIэ, 2020 — 2023-рэ илъэс­хэм гъогурыкIонымкIэ шапхъэхэр зэраукъуагъэр къэзыгъэлъэгъогъэ видеока­ме­ри 125-рэ республикэм игъогухэм атыра­гъэ­уцуагъ. Ахэм яшIуагъэкIэ сомэ миллион 832-м ехъу къарагъэпщыны­жьыгъ.

«Социальнэ псэуалъэхэм язэтегъэ­псыхьан, ягъэкIэжьын, яшIын мылъку­шхо пэIутэгъахьэ. Ахэр зэщамыгъэкъоным тынаIэ тедгъэтын фае. Мы лъэныкъомкIэ хэбзэухъумэкIо къулыкъухэми яIофшIэн агъэлъэшын фаеу сэлъытэ. Республикэм игъогухэм нахь макIэу тхьамыкIагъохэр атехъухьанхэм, шапхъэхэр ащамыукъонхэм тишъыпкъэу Iоф адэтшIэн фае», — къыIуагъ КъумпIыл Мурат.

АР-м и ЛIышъхьэ шъолъыр щынэгъончъэным иIофыгъохэмкIэ и ГъэIорышIапIэ ипащэу Чыназыр Алый 2024-рэ илъэсым иапэрэ кIэлъэныкъо Координационнэ зэIукIэм Iофэу ышIэщтхэм къатегущы­Iагъ. Iофыгъо пстэумкIи ищыкIэгъэ уна­шъохэр зэхэсыгъом щаштагъэх.

АР-м и ЛIышъхьэ ипресс-къулыкъу