Шъэожъыем лъэхъух
ШэкIогъум и 13-м, сыхьатыр 22.25-м станицэу Ханскэм дэжь автомобиль псынкIэр дэчъэхи псыхъоу Шъхьэгуащэ инэпкъ ефэхыгъ.
Урысыем ошIэ-дэмышIэ IофхэмкIэ и Министерствэ и Адыгэ лъыхъокIо- къэгъэнэжьэкIо отряд, Урысыем и МЧС и ГъэIорышIэпIэ шъхьаIэу АР-м щыIэр ыкIи мэшIогъэкIосэ-къэгъэнэжьэкIо гарнизоным якъулыкъушIэхэр хъугъэ-шIагъэр къызщыхъугъэ чIыпIэм псынкIэу къэсыгъэх ыкIи лъыхъун Iофтхьабзэхэр зэрахьагъэх.
ГъэIорышIапIэм ипащэ игуадзэу Евгений Назаровым къызэриIуагъэмкIэ, автомобилым нэбгыри 5 исыгъ, 3-р ежь-ежьырэу къипшыжьыгъэх. Гукъау нахь мышIэми, шэкIогъум и 14-м сыхьатыр 10.50-м 1989-рэ илъэсым къэхъугъэ бзылъфыгъэм ихьадэ къагъотыжьыгъ. Илъэси 10 зыныбжь кIэлэцIыкIум лъэхъух. КъэгъэнэжьакIохэм кIапсэмкIэ машинэр псым къыхахыжьыгъ.
Урысыем и Следственнэ комитет иследственнэ ГъэIорышIапIэ иследственнэ отделэу Мыекъуапэ щыIэм мы хъугъэ-шIагъэмкIэ уплъэкIунхэр зэхищагъэх.
УплъэкIунхэр зэрэкIорэм ынаIэ тет Урысыем и Следственнэ комитет иследственнэ ГъэIорышIапIэу АР-м щыIэм ипащэ иIэнатIэ зыгъэцэкIэрэ Василий Лариным. Ащ икIэуххэм ялъытыгъэу унашъо ашIыщт.