УФ-м и Президентэу Владимир Путиным ипшъэрылъкIэ адэбз узхэм апэшIуе­кIогъэным фытегъэпсыхьэгъэ федеральнэ проектыр Урысыем щыпхыращы.

Ащ къыдыхэлъытагъэу мы узым зыщяIазэхэрэ сымэджэщ­хэр, IэзапIэхэр, амбулаториехэр кIэу ашIых, Iоф зышIэхэрэр шэпхъэшIухэм адиштэрэ оборудованиехэмкIэ зэтырагъэпсы­хьэх, Iоф ащызышIэщт врачхэм ягъэхьазырыни ыуж итых.

Адыгеир пштэмэ, проектэу зигугъу къэтшIыгъэм ыкIи нэмыкI программэхэм къадыхэ­лъыта­гъэу федеральнэ гупчэр Iэпы­Iэгъу къыфэхъузэ, адэбз узхэм зыщяIазэхэрэ сымэджэщыр лъэхъа­ным диштэрэ обору­дованиекIэ зэтырагъэпсыхьагъ. АР-м псауныгъэм икъэухъумэн­кIэ и Министерствэ къызэрэ­щаIуагъэм­кIэ, 2019-рэ илъэсым къыщегъэ­жьагъэу ащ фэдэ псэолъи 150-рэ къащэфыгъ. Адэбз узхэм яIэзэрэ къулыкъум игъэкIэжьын епхыгъэ IофшIэнхэр джыри лъагъэкIуатэх.

Мы лъэныкъомкIэ шIагъэ хъугъэхэм, щыкIагъэу джыри Iоф зыдэшIэгъэн фаехэм щатегущыIагъэх УФ-м и Президент Правительствэм зэхэсыгъоу блэкIыгъэ тхьамафэм дишIыгъагъэм. Народнэ фронтым игъэцэкIэкIо Комитет ипащэу Михаил Кузнецовыр ащ хэлэжьагъ ыкIи Iофыгъоу анаIэ зытырадзагъэхэм ягугъу къыщишIыгъ.

УФ-м и Правительствэ ыштэгъэ унашъом тетэу врачэу цIыфым адэбз уз къызэреолIагъэр апэ къыхэзгъэщырэм ахъщэ тедзэу сомэ 1000 раты. Михаил Кузнецовым къызэриIуа­гъэмкIэ, ащ пае тхылъэу агъэ­хьазырын фаер зэрэбэм къы­хэкIэу, ахъщэ тыныр амыштэныр нахь псынкIэу къыхахы. Джащ фэдэу адэбз уз къызэолIагъэу химиелучевой терапие зыкIухэ­рэм хэушъхьафыкIыгъэ шхыныгъоу ящыкIагъэ­хэр аIэкIэгъэхьэгъэнхэм ылъэныкъокIи щыкIагъэхэр зэрэщы­Iэхэр къыIуагъ.

УФ-м псауныгъэм икъэухъу­мэнкIэ иминистрэу Михаил Мурашко ахъщэ тедзэу врачхэм афагъэнэфагъэм ылъэныкъокIэ гумэкIыгъохэм ядэгъэзыжьын Iоф зэрэдашIэщтыр къыIуагъ. УФ-м и Правительствэ и Тхьаматэ игуадзэу Татьяна Голиковам къэралыгъом ипащэ къызэрэщигъэгъозагъэмкIэ, химиелучевой терапие зыкIухэрэм ящыкIэгъэ шхыныгъохэм якъыдэгъэкIынкIэ планыр промышленностымкIэ, мэкъумэщ хъыз­мэтымкIэ министерствэхэм, нэмыкI къулыкъоу мы Iофым фэгъэзагъэхэм, къыдэгъэкIэкIо хъызмэтшIапIэхэм яспециалистхэм зэдызэхагъэуцуагъ.

Адыгеим и Правительствэ къызэрэщаIуагъэмкIэ, адэбз узхэм яIэзэрэ къулыкъум игъэ­кIэжьын зэпымыоу Iоф дашIэ. УФ-м псауныгъэм икъэухъумэн­кIэ иминистрэу Михаил Мурашко блэкIыгъэ мазэм республикэм къызэкIом, Адыгэ республикэ диспансерэу М. Хъ. Iэшъхьэма­фэм ыцIэ зыхьырэм щыIагъ ыкIи иIофшIакIэ уасэ къыфишIыгъ. АР-м и ЛIышъхьэ къызэрэхигъэ­щыгъэмкIэ, къулыкъум иIофшIэн нахьыбэу шIуагъэ къытыным лъэшэу анаIэ тет.

2019 — 2023-рэ илъэсхэм программэ зэфэшъхьафхэм къа­дыхэлъытагъэу сомэ миллион 742,2-рэ ауасэ оборудование къащэфыгъ. 2021-рэ илъэсым къыщыублагъэу лъэхъаным диштэу гъэпсыгъэ магнитнэ-резонанснэ томографэу «сверхпроводящэ» зыфаIорэ магнит зы­хэтыр сымэджэщым щагъэфедэ. Ащ сомэ миллиони 100-м кIахьэу ыуас. Мы псэуалъэм узым икъы­хэгъэщын нахь макIэу уахътэ тырегъэкIуадэ, нахь зэхэугуфыкIыгъэуи къегъэлъагъо.

Ащ нэмыкIэу сомэ миллион 18,6-кIэ рентген зэрашIырэ аппарат щагъэуцугъ. БлэкIыгъэ илъэсым шэпхъэшIухэм адиштэрэ компьютернэ томографэу агъэ­уцугъэр сомэ миллион 94-кIэ къащэфыгъ.

Джащ фэдэу 2022-рэ илъэсым медицинэ гематологическэ Гупчэ мы сымэджэщым щагъэпсыгъ, Адыгэкъалэрэ Кощхьэблэ районымрэ ясымэджэщхэм адэбз узхэм зыщяIазэхэрэ амбулаторнэ гупчэхэр къащызэIуахыгъэх. Ахэм яшIуагъэкIэ мы узыр зи­Iэхэм е иIэу зэгуцафэхэрэм мэфищ нахьыбэ темышIэу врачым IукIэнхэшъ, зэрэзекIощтхэр къафигъэнэфэнэу амал яIэ хъугъэ. Адэбз узхэм зыщяIазэхэрэ республикэ сымэджэщым иврач шъхьаIэу АкIэгъу Заур къызэриIуагъэмкIэ, а зы уахътэм нэбгыри 146-рэ зэдычIэлъыным ар тегъэпсыхьагъ. Илъэсым нэбгырэ мини 5,2-мэ стационарым IэпыIэгъу щагъоты, операцие минрэ 700-рэ фэдиз щашIы, нэбгырэ мин 17 фэдиз IэзапIэм къеуалIэ.

АР-м псауныгъэм икъэухъу­мэнкIэ иминистрэу Мэрэтыкъо Рустем къызэрэхигъэщыгъэмкIэ, мы сымэджэщым Iоф щызышIэщтхэм якъыхэхын теурыкIуагъэ хэмылъыным лъэшэу анаIэ тет. ПстэумкIи медицинэм иIофышIэ 338-рэ щэлажьэ. Ахэм ащыщэу 66-р врачых. Адэбз узхэм яIэзэрэ врачэу ящыкIагъэм ипроцент 76-р яI. Федеральнэ программэу «Земский доктор» зыфиIорэми ишIуагъэ къэкIо. Мы илъэсыр къызихьагъэм къыщыублагъэу нэбгырэ 23-рэ ащ хэлэжьагъ.