Урысыем ичемпионат и Суперлигэ хэлэжьэрэ «АГУ-Адыифым» мы мафэхэм зичэзыу ешIэгъу Волгоград шыриIагъ. ЧIыпIэ командэу «Динамо-Синара» зыфиIорэм дешIагъ, бысымхэр нахь лъэшыгъэх.

«Динамо-Синара» (Волгоград) — «АГУ-Адыиф» (Мыекъуапэ) — 33:22 (16:9).

Апэрэ таймым Волгоград икомандэ икъэлэпчъэIутэу Анна Верещак цыхьэшIэгъоу ешIагъ. Ащ Iэгуаоу къадзыгъэм ипроцент 50 къызэкIидзэжьыгъ, ахэм ащыщэу 4-р пенальти. КъэлэпчъэIутыр дэгъу дэдэу зэрешIэрэм командэм хэтхэм кIуачIэ къа­ритыгъ. Апэрэ таймыр 16:9-у аухыгъ. ЯтIонэрэр Мыекъуапэ игандболисткэхэм дэгъоу рагъэ­жьагъ, зэлъыпытэу Iэгоуищ къэлапчъэм дадзыгъ. Ау «Динамэм» итренер шъхьаIэ ыштэгъэ тайм— аутым ишIуагъэкIэ бысымхэм яешIакIэ зэтырагъэуцожьыгъ.

«АГУ-Адыифым» иешIакIохэм анахь къахэщыгъэр Алиса Дворцеваяр ары, ащ Iэгоуи 7, джащ фэдэу Валентина Томилинам Iэгоуи 5 дадзагъ. Ау Iэгуаор бэрэ къызэрэчIанагъэм, ыпэкIэ псын­кIэу зэрэщемышIагъэхэм ыкIи пенальти 7-м щыщэу 3-м нахь дадзэн зэрамылъэкIыгъэм къа­хэкIэу тикомандэ къытекIуагъэх. ЕшIэгъур аухынкIэ такъикъи 8 къэнагъэу Кобл Зурет ешIапIэм къырагъэкIыгъ. А пстэури бысымхэм дэгъоу къызфагъэфедагъ, 33:22-у текIоныгъэр къыдахыгъ.

— Гупчэм щешIэн зылъэ­кIыщт ухъумакIом непэ тыщыкIагъ. Мы командэм къэ­кIорэ ешIэгъоу дытиIэщтыр къэтхьыным тыпылъыщт. Непэ хэукъоныгъэу тшIыгъэ­хэр дэдгъэзыжьынхэм тынаIэ тедгъэтыщт, зичэзыу зэIукIэгъум нахь тэрэзэу зыфэдгъэхьазырыщт, — къы­Iуагъ «АГУ-Адыифым» итренер шъхьаIэу Наталья Дерепаскэм.

«Динамо-Синарэм» зэлъыпытэу ятфэнэрэ текIоныгъэр къыдихыгъ, «АГУ-Адыифым» зэIукIэгъуи 4 хъугъэу очко къыхьын ылъэкIырэп ыкIи я 9-рэ чIыпIэм щыт.

Командэхэр зыдэщыт чIыпIэ­хэр ыкIи очко пчъагъэу рагъэ­къугъэр:

1. «Ростов-Дон» — 22. 2. «ЦСКА» — 19. 3. «Черноморочка» — 18. 4. «Лада» — 17. 5. «Кубань» — 17. 6. «Астраханочка» — 17. 7. «Динамо-Синара» — 15. 8. «Звезда» — 8. 9. «АГУ-Адыиф» — 7. 10. «Ставрополье» — 6. 11. «Луч» — 2. 12. «Университет» — 0.

ШэкIогъум и 18-м «АГУ-Адыифыр» «Ставропольем» IукIэщт, ешIэгъур мафэм сыхьатыр 2-м Мыекъуапэ щыкIощт.