Мы илъэсым ыкIэм нэс Урысыем ишъолъырхэм феде­ральнэ бюджетым щыщэу сомэ миллиарди 3,6-м ехъу къафатIупщыщт эндокринологиемкIэ гупчэхэр кIэу шIы­гъэнхэм, ахэр зэтегъэпсыхьэгъэнхэм, къоджэ сымэджэщхэм узыр къыхэгъэщыгъэным фэшI ящыкIэгъэ обо­рудование афэщэфыгъэным, псауныгъэм иеджапIэхэр нахьыбэу къызэIухыгъэнхэм апае.

Ащ епхыгъэ унашъом бэмышIэу кIэтхагъ Урысые Федерацием и Правительствэ и Тхьаматэу Михаил Мишустиныр. Адыгеим сомэ миллион 12 фэдиз къыфатIупщынэу щыт. А мылъкур пэIуагъэхьащт медицинэ учреждениехэм, къоджэ псэупIэхэм, гупчэм пэIудзыгъэ чIыпIэ­хэм адэт­хэри хэтхэу, тех­ническэу зэтегъэпсыхьэгъэнхэм.

АР-м псауныгъэр къэу­хъумэгъэнымкIэ и Минис­терствэ къызэрэщыхагъэщыгъэмкIэ, федеральнэ гупчэм иIэпыIэгъу ишIуагъэкIэ республикэм ипсэу­пIэхэм ямедицинэ учреж­дениехэм афащэфыщтых лабораториехэм ящыкIэгъэ оборудованиер ыкIи шъоущыгъу узыр къыхэ­гъэщыгъэным, сымаджэ­хэм алъыплъэгъэным апае хэушъхьафыкIыгъэ медицинэ пкъыгъохэр.

Шъугу къэдгъэкIыжьын, Урысые Федерацием псау­ныгъэр къэухъумэгъэнымкIэ и Министерствэ эндокринологиемкIэ и Лъэпкъ медицинэ ушэтыпIэ Гупчэ ипащэу Наталья Мокрыше­вам осэшхо къыфишIыгъ республикэм щыпсэоу шъоу­щыгъу уз зиIэхэм япсауныгъэ зыпкъ итыным, ящыкIэгъэ IэпыIэ­гъур игъом ягъэгъотыгъэным афэшI пащэхэм IофшIэнышхо зэрэзэшIуахырэм.

ИкIыгъэ илъэсым, гущыIэм пае, шъоущыгъу уз зиIэхэм ямедицинэ фэIо-фашIэхэм апэIуагъэхьаным фэшI Адыгеим сомэ миллион 283,4-рэ къы­щыхагъэкIыгъ, ащ ыпэрэ илъэсым а лъэныкъом пае къатIупщыгъагъэм фэдитIу ар мэхъу. ЕтIани икIыгъэ илъэсым сомэ миллион 19 республикэ бюджетым къыхагъэкIыгъ лъым шъоу­щыгъоу хэлъым зэпымыоу зэрэлъыплъэщтхэ датчик­хэу, сканерхэу шъоущыгъу уз иIэу Адыгеим щыпсэурэ кIэлэцIыкIуи 132-м япсауныгъэ зыпкъ итыным фэшI лъэшэу ящыкIэгъагъэхэм ящэфын пэIуа­гъэхьанэу.