Къуаджэу БжыхьэкъоякIэм щыщэу КIэрмыт Мухьдинэ адыгэхэм ядунай дэгъу дэдэу щашIэ.

Ар илъэсыбэрэ бизнесым, общественнэ ыкIи меценат Iоф­хэм апылъыгъ, АР-м и Къэ­ралыгъо Совет — Хасэм изэ­IугъэкIэгъуищымэ ядепутатыгъ, ветеран ыкIи ныбжьыкIэ организациехэм, сымэджэщхэм, еджапIэхэм, кIэлэцIыкIу IыгъыпIэхэм IэпыIэгъу афэхъугъ, наукэм, гъэсэныгъэм, культу­рэм, спортым япхыгъэ проектхэм япхырыщын иIахь мымакIэу хилъхьагъ.

2004-рэ илъэсым Мухьдинэ кIэлэцIыкIу къэшъокIо ансамблэу «Нэф» зыфиIорэр поселкэу Инэм щызэхищэгъагъ. Ащ ишIуа­гъэкIэ лъэпкъ зэфэшъхьафхэм къахэкIыгъэ кIэлэцIыкIухэм адыгэ къашъохэр зэрэзэра­гъэшIагъэхэм имызакъоу, тарихъым, бзэм, шэн-хабзэхэм ахэщагъэхэ хъугъэх. КIэрмыт Мухьдинэ икъэшъокIо куп ти­лъэпкъэгъухэр зыщыпсэурэ Iэ­кIыб къэралыгъуабэхэм ащы­Iагъ, гущыIэм пае, Тыркуем, Сирием, Иорданием, нэмыкIхэм.

Къэралыгъо къулыкъум зыщы­фэгъэзэгъэгъэ уахътэми ма­кIэп ышIагъэр. Краснодар краим хэгъэгу кIоцI политикэмкIэ и Департамент ипащэ игуадзэу, етIанэ къалэу Шъачэ ивице-­мэрэу зыщэтым лъэпкъ зэгурыIоныгъэр пытэным иIахьышIу хилъхьагъ. Ащ иIофшIэн тын зэфэшъхьафхэмкIэ мызэу-мытIоу къыхагъэщыгъ. Ахэм ащыщых Краснодар краим иадминистрацие ищытхъу тхылъхэр, медалэу «За выдающийся вклад в развитие Кубани» зыфиIоу я III-рэ шъуашэ зиIэр, «За вклад в об­щественную и политическую жизнь города Сочи», «Признание и почет» зыфиIорэ тамыгъэ­хэр. Ау ежь тичIыпIэгъу ана­хьэу зэрыгушхон ылъэкIыщтыр ­лъэпкъ зэфэшъхьафыбэхэм къахэкIыгъэ цIыф къызэрыкIохэм шъхьэкIэ­фэныгъэу къыфашIырэр ары.

— Нэбгырэ пэпчъ ихэгъэгу шIукIэ игугъу зэраригъэшIыщтым, лIакъоу къызхэкIыгъэм итарихъ чIыпIэ гъэнэфагъэ зэрэщиубытыщтым ыуж итын фае, — къыкIегъэтхъы холдинг компаниеу «Синдика» зыфиIорэм ивице-президентэу КIэрмыт Мухьдинэ. — ЛIа­къо ыкIи унагъо пэпчъ игъэ­хъа­гъэхэр, итекIоныгъэхэр иблэ­кIыгъэ уахътэ хэбгъотэщт. ЛIэ­ужхэм зэпхыныгъэ пытэ яIэмэ нахьыжъхэм ядесэхэр, яакъылышIуагъэ, щыIэныгъэм опытышхоу щызэрагъэгъотыгъэр къакIэхъухьэхэрэм анэсыжьыщтых, лъагъэкIотэщтых.

Илъэс пчъагъэхэм Мухьдинэ Урысыем ишъолъырхэр ыкIи IэкIыб къэралхэр къызэпикIу­хьэхэзэ лIакъоу зыщыщым ылъа­псэ къызщежьэрэр, гъогоу къыкIугъэр дэгъоу зэригъэшIагъ. Непи а IофшIэныр лъегъэкIуатэ.

— Сянэ къызхэкIыгъэ лIакъор къуаджэу Шъоджэикъо щыщыгъ, — къеIуатэ ащ. — Сянэ ятэ ятэжъэу АкIэгъу ­ГъучIыпсэ илъэс пшIыкIутIу ыныбжьэу ятэ Тэйхьачэм игъу­сэу Тыркуем кIожьын фаеу хъугъагъ. Ащыгъум Кавказ заор кIощтыгъ. Зы уахътэ горэм Истамбул дэсыгъэх. Хымэ хэгъэгум адыгэхэм щыIакIэ ща­гъотыгъэп, ау Осмэн империем къыухъумэнхэм щыгугъыгъэ тилъэпкъэгъу нэбгыришъэ пчъа­гъэхэм ащыщэу Кавказ къэз­гъэзэжьын зылъэкIыгъагъэр зырыз дэдагъ. Ахэм къахэфагъ ГъучIыпси. Ар къызэрэдэхъу­гъагъэр джы къызнэсыгъэм зыми ышIэрэп. АкIэгъу лIакъом щыщэу унэгъо заулэ Тыркуем къинэгъагъ. Самсун пэмычыжьэу щыт къалэу Кавак тиIа­хьылэу бэ непэ щыпсэурэр.

Кавказ заор заухым Мухьдинэ янэ ятэжъэу АкIэгъу Пэзадэ хы ШIуцIэ Iушъо шапсыгъэ унэгъо пшIыкIущ игъусэу псы­хъоу Пшызэ игъэхъунэ къикIыжьи, къуаджэу Афыпсыпэ агъэ­псыгъагъ. Совет хабзэм иапэрэ илъэсхэм хы ШIуцIэ Iушъом ыгъэзэжьыгъагъ. 1928-рэ илъэсым Пэзадэ поселкэу Шэхапэ унэ къыщищэфыгъагъ. ЧIыпIэу унэр зыдэщытыгъэр нафэ.

Илъэсищ тешIагъэу АкIэгъу Пэзадэ репрессиехэм ахэфагъ. Ащ сабый пшIыкIуз, шъэуиблырэ пшъэшъиплIырэ, иIагъ. Ахэм ащыщэу Хьисэ, Сулейман ыкIи Долэт апшъэрэ гъэсэныгъэ зэрагъэгъотыгъ, лъэхъаным диштэу псэущтыгъэх. ГущыIэм пае, АкIэгъу Хьисэ Адыгэ автоном хэкум иапэрэ прокурорхэм, Сулейман Адыгеим комсомолыр апэу щызгъэпсыгъэхэм, Долэт хэкум иапэрэ хирургхэм ащыщыгъэх.

— Ахэм къакIэхъухьагъэхэри республикэм лъытэныгъэ зыфашIэу исыгъэхэм ащыщых, — къыкIегъэтхъы Мухьдинэ.

Ар ятэ ылъэныкъокIи Шъачэ пэблагъэу щыт. ПсышIопэ районым ит поселкэу «Чемитоквадже» зыфиIорэр адыгэ псэупIэу тарихъым къыхэнэжьыгъэхэм ащыщ, «КIэрмытхэм япсэупI» къикIырэр.

— ГущыIэм пае, Тэхъутэ­мыкъое районымрэ поселкэу Инэмрэ ямедицинэ хэхъоны­гъэхэр ышIынхэм иIахьышхо хэлъ АкIэгъу Сулейман ыпхъоу, сэ сянэу Нурыет, — еIо Мухьдинэ. — Ар УФ-м изаслуженнэ врач, РСФСР-м псауныгъэм икъэухъумэнкIэ иотличник, АР-м псауныгъэм икъэу­хъумэнкIэ изаслуженнэ IофышI, лIэужыбэхэм шIукIэ игугъу ашIыжьы.

НэмыкIэу КIэрмыт ыкIи АкIэгъу лIакъохэм къахэкIыгъэхэу, общественнэ IофышIэшхоу, шIэ­ныгъэлэжьэу, врачэу, кIэлэегъа­джэу, предпринимателэу, культурэм иIофышIэу, спортсменэу, шIурэ дахэрэкIэ цIыфхэм агу къинагъэр бэ. Ахэм ащыщ щысэтехыпIэ унэгъо дахэ зы­гъэпсыгъэу, шъэуитIу иI, ахэм къакIэхъухьажьыгъэ къорэлъф цIыкIухэр щы мэхъух, цIыфыгъэ­шхо зыхэлъэу, ихэгъэгу ипатриот шъыпкъэу, щыIэныгъэм гъэ­хъэгъэ инхэр щызышIыгъэхэ КIэрмыт Мухьдинэ. ШIу­шIэгъабэу иIэм ар зэлъаригъэшIагъ.

НЫБЭ Анзор. Сурэтхэр: авторым ихъарзынэщ.