Бжыхьэ дзэ дэщыгъом къыдыхэлъытагъэу, Адыгеим икIынхэшъ, Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм язичэзыу куп тыгъуасэ гъогу техьагъ.

КъулыкъушIэ нэбгыри 5-р мэфэкI шIыкIэм тетэу агъэкIотагъэх. Ахэм ошъогу-десантнэ дзэхэм я 242-рэ еджэпIэ гупчэу Омскэ дэтым къулыкъур щахьыщт.

МэфэкI Iофтхьабзэу АР-м идзэ комиссариат щыкIуагъэм хэлэжьагъэх республикэм игъэцэкIэкIо хэбзэ органхэм, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.

Iофтхьабзэр къызэIуихыгъ ыкIи зэрищагъ дзэ комиссариатым иотдел ипащэу Одэжьдэкъо Руслъан. МэфэкI шIыкIэм тетэу ящэнэрэ купыр зэрагъэкIуатэрэр ащ къыIуагъ. Мы уахътэр гумэкIыгъоу зэрэщытыр къыхигъэщызэ, хэушъхьафыкIыгъэ дзэ операциер зыщыкIорэ чIыпIэхэм мы ныбжьыкIэхэр зэрамыщэщтхэр, УФ-м ишъолъыр ит дзэ частьхэм къулыкъур зэращахьыщтыр къыкIигъэтхъыгъ.

Къыблэ дзэ округым изэхэт стратегическэ командование иинспектор куп хэт генерал-майорэу Александр Дорофеевым ныбжьыкIэхэм закъыфигъэзагъ. Хэгъэгум къулыкъу фэхьыгъэным игъогу ахэр непэ зэрэтеуцуагъэхэр къыхигъэщыгъ.

— Хэгъэгум ыпашъхьэ пшъэдэкIыжьэу щышъуиIэр гъэцэкIэгъэным игъо къэ­сыгъ. Непэ къэралыгъо пчъагъэхэр Урысыем къыпэуцугъэхэу ушэтыпIэм тызщит лъэ­хъаным пшъэрылъэу къэуцухэрэр къызэрыкIохэп. Шъо чIыпIэ «плъырхэм» шъуащэщтэп, ау зыщырэхьат чIыпIэу шъуздэщыIэщтхэм пшъэрылъэу къащышъу­фагъэуцухэрэр шIокI имыIэу жъугъэцэ­кIэнхэ, тятэжъхэм, тидзэкIолIхэу хэ­ушъхьа­фыкIыгъэ дзэ операцием хэла­жьэхэрэм лIыхъужъныгъэу, псэемыблэжьныгъэу зэрахьэрэр щысэтехыпIэу шъуиIэнхэ фае. Дзэ къулыкъум хъулъфыгъэм ишэн-зекIуакIэхэр епсыхьэх, шъуизэхэшIыкI хэхъощт. Илъэсэу шъукъы­зэрэтыщтыр бэп, псынкIэу кIощт. Нэ­ужым къулыкъур зэзэгъыныгъэ шIыкIэм тетэу шъуащыщхэм къыхахынкIи хъун. Сыд фэдэрэ лъэныкъо зыжъугъэзэщтми, шъуипсауныгъэ зэщымыкъоу ны-тыхэм къафэжъугъэзэжьынэу сышъуфэлъаIо, — хигъэунэфыкIыгъ генерал-майорым.

Мыекъуапэ инароднэ депутатхэм я Совет итхьаматэу Джармэкъо Азмэт тидзэкIолI ныбжьыкIэхэм щытхъу хэ­лъэу къулыкъур къахьынышъ, псаоу къагъэзэ­жьынэу къафэлъэIуагъ. УIэшыгъэ КIуа­чIэхэм къулыкъур ащыхьыгъэныр, Хэгъэ­гум ишъхьафитныгъэ къэухъумэгъэныр хъулъфыгъэ, гражданин ыкIи патриот пэпчъ ипшъэрылъ шъхьаIэу зэрэщытыр, ныбжьыкIэхэм зэрарыгушхохэрэр ыкIи зэряжэщтхэр ащ къыхигъэщыгъ. Ветеран движением патриотическэ пIуныгъэм иIахьышIу зэрэхилъхьэрэм фэшI рэзэныгъэ гущыIэхэр афигъэзагъ.

Ошъогу-десантнэ дзэ частэу ныбжьыкIэхэр зыдащэщтхэм илIыкIоу Владимир Коняевым къызэриIотагъэмкIэ, къулыкъушIэхэр егъэджэн гупчэу Омскэ дэтым мэзитIо щыIэщтых, нэужым дзэ частьхэм атырагощэщтых. Джащ фэдэу егъэджэн гупчэм тарихъ гъогоу къыкIугъэм ар къытегущыIагъ. Мы уахътэм сэнэхьат 14-мэ афытегъэпсыхьэгъэ специалистхэр гупчэм къегъэхьазырых. — Ошъогу десантнэ дзэхэм къулыкъу ащыхьыгъэным сыдигъуи уасэ фашIы. Ащ лIыгъэ, пытагъэ ищыкIагъэх. ЛъэгэпIэшIухэм адиштэрэ дзэхэм ащыщ къулыкъур щышъухьынэу шъуинасып къызэрихьыгъэм шъурыгушхонэу ыкIи тидевизэу «Никто кроме нас!» зыфиIорэр къэжъугъэшъыпкъэжьынэу щыт, — хигъэунэфыкIыгъ Владимир Коняевым.

Гъогу техьэгъэ дзэкъулыкъушIэхэм ащыщ Павел Беликовыр. Ащ Мыекъопэ гурыт еджапIэу N11-р къыухыгъ ыкIи еджэныр лъимыгъэкIуатэу къулыкъум кIоныр къыхихыгъ.

— ХэушъхьафыкIыгъэ дзэхэм къу­лыкъу ащысхьынэу сыдигъуи сыфэягъ. Ащ фэдэхэм джы сызэрахэфагъэм сырэ­гушхо. СыгукIи, сипсауныгъэкIи сыфэхьазыр. Гъэсэпэтхыдэ гущыIэхэу нахьыжъхэм къытаIуагъэхэр къызэрэтшъхьапэщт­хэм сицыхьэ телъ ыкIи щытхъу хэлъэу къулыкъур зэрэтхьыщтымкIэ гущыIэ къэтэты, — къыIуагъ П. Беликовым.

КъулыкъушIэ ныбжьыкIэхэм ащыщэу Бэрзэдж Руслъан ыгъэкIотэнэу ятэжъэу Василий Павлеченкэр дзэ комиссариатым къекIолIагъ.

— Пхъорэлъфэу сиIэхэм ащыщэу Руслъан апэрэу дзэм тэгъэкIуатэ. Арышъ, тIэкIу тымыгумэкIын тлъэкIырэп. ЗэрыкIырэ Адыгэ Республикэм ыцIэ дахэкIэ раригъэIонэу, щытхъу хэлъэу къулыкъур ыхьынышъ, псаоу къытфэкIожьынэу сыфэлъаIо, — къыIуагъ тэтэжъым. Нэужым дзэкIолIхэр гъогу техьагъэх.

НыбжьыкIэхэм щытхъу хэлъэу къулыкъур къахьынышъ, псаоу ягупсэхэм къафагъэзэжьынэу афэтэIо.

Iэшъынэ Сусан. Сурэтыр: Артур Лаутеншлегер.