Адыгеим и ЛIышъхьэу КъумпIыл Мурат АР-м ипрофсоюзхэм я Федерацие и Совет изэхэсыгъоу Адыгеим ипрофсоюз движение ия 100-рэ илъэс фэгъэхьыгъэм хэлэжьагъ.

[caption id="attachment_141479" align="aligncenter" width="800"] Сурэтыр: А. Гусев.[/caption]

Джащ фэдэу Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, Урысыем ипрофсоюзхэм я Федерацие итхьаматэ игуадзэу Александр Шершуковыр, Урысыем ипроф­союзхэм я Федерацие исек­ретарэу Дмитрий Чуйковыр, профсоюзхэм ячIыпIэ объединениехэм, яорганизациехэм я Ассоциацие и Совет итхьаматэу ЮФО-м щыIэ Александр Ло­зыченкэр, АР-м ипромышленникхэмрэ ипредпринимательхэмрэ я Союз ипащэу НатIэкъо Мурат, АР-м ипрофсоюзхэм я Федерацие итхьаматэу Устэ Руслъан, АР-м иминистрэхэм я Кабинет хэтхэр, республикэ парламентым идепутатхэр, Адыгеим икъулыкъухэм, иведомствэхэм, ипрофсоюз организациехэм япащэхэр, ипроф­союзхэм я Федерацие иIофы­шIэхэмрэ иветеранхэмрэ.

Республикэм ипащэ къэзэ­рэугъоигъэхэм шIуфэс къарихи, лIэшIэгъум къыкIоцI Адыгеим ипрофсоюзхэм гъогушхо къызэракIугъэр, мэхьанэшхо зиIэ Iоф зэрагъэцэкIагъэр, лэжьакIохэм яфедэхэм якъэухъумэн яшъыпкъэу зэрэфэлэжьагъэхэр хи­гъэу­нэфыкIыгъ.

«Республикэм ипрофсоюзхэм ахэтхэр зиIоф фэшъыпкъэ цIыф­хэр, зи Хэгъэгу шIу зылъэгъу­хэрэр, ячIыпIэгъухэм яфедэхэм афэлэжьэнхэм фэхьазырхэр ары. Ахэм лэжьакIохэм яфитыныгъэхэм якъэухъумэн сыди­гъуи анаIэ тырагъэтыщтыгъ, социальнэ-экономикэ Iофхэм чанэу хэ­лажьэщтыгъэх. Хэгъэгу зэошхом илъэхъан профсоюзхэм ахэтыгъэхэм Iофышхоу ашIа­гъэм, зэо ужым экономикэр зыпкъ игъэуцожьыгъэным яIа­хьышхо зэрэхашIыхьагъэм осэшхо къыфэтэшIы. Илъэс зэфэшъ­хьафхэм Адыгеим ипрофсоюз движение пэщэныгъэ дызезы­хьагъэхэм, профобъединениехэм япэщагъэхэм профсоюзхэм зя­гъэушъомбгъугъэнымкIэ, рес­публикэм ихэбзэ къулыкъухэмрэ IофшIэн язытыхэрэмрэ язэдэлэжьэныгъэ гъэпытэгъэнымкIэ бэ ашIагъэр», — къыIуагъ КъумпIыл Мурат.

Республикэм ипащэ зэрэхигъэунэфыкIыгъэмкIэ, граждан обществэм изэкъогъэуцонкIэ профсоюзхэр амалышIоу щытых. Непи Адыгеим ипрофсоюз­хэм нахьыжъхэм шэн-хабзэу ахэлъыгъэхэр лъагъэкIуатэх, социальнэ гъусэныгъэм дырагъаштэ, янеущырэ мафэ лэ­жьакIохэм яцыхьэ телъынымкIэ ищыкIэгъэ амалхэр зэрахьэх.

«Профсоюзхэм анахьэу анаIэ зытырагъэтырэр цIыфхэм Iоф­шIапIэхэр къафэгъотыгъэнхэмкIэ, IофшIэнымкIэ ищыкIэгъэ амалхэр зэхэщэгъэнхэмкIэ, Iо­фышIэхэм, ахэм якIэлэцIыкIухэм языгъэпсэфыгъо уахътэ нахьышIоу зэхэщэгъэнымкIэ, япсауныгъэ гъэпытэгъэнымкIэ ищыкIэгъэ амалхэр зехьэгъэнхэр, ветеранхэм IэпыIэгъу ягъэ­гъотыгъэныр ары. А пстэур эко­номикэмкIи, социальнэ лъэ­ныкъомкIи къэралыгъом непэ зэшIуихырэ пшъэрылъхэм аде­штэ. Тэ пшъэрылъ шъхьаIэу зэ­дытиIэр республикэм исхэм ящыIэкIэ-псэукIэ зыкъегъэIэтыгъэныр, зыфэехэ сэнэхьатхэр цIыфхэм зэрагъэгъотынэу амал яIэныр, лэжьэпкIэ дэгъу къагъэхъэныр, кIэлэцIыкIухэр, ныбжьыкIэхэр пIугъэнхэмкIэ, гъэсэныгъэ дэгъу ягъэгъотыгъэнымкIэ, Iоф ашIэнымкIэ ящыкIа­гъэхэр арагъэгъотынхэр ары. IэкIыб къэралыгъохэр тихэгъэгу лъэшэу къы­зыщытеIункIэхэрэ лъэхъа­ным а пстэуми непэкIэ мэхьанэшхо яIэу щыт», — къыIуагъ АР-м и ЛIышъхьэ.

IэкIыб къэралыгъохэм къапкъырыкIырэ гумэкIыгъохэм апэуцужьыгъэнымкIэ ищыкIэгъэ лъэбэкъу­хэр Урысыем ипащэхэм зэрашIырэр, мы аужырэ илъэсхэм зэхъокIыныгъэшIухэу рагъэжьагъэхэр зэрэлъагъэкIотэщтхэ шIыкIэу шъолъырхэм игъо афалъэгъухэрэм ягугъу зэхэсыгъом къыщашIыгъ.

«Пшъэрылъхэм язэшIохын зы екIолIакIэ къы­фэдгъотын фае. Урысыем и Президентэу Владимир Путиным зэрэхигъэунэ­фыкIыгъэу, «экономикэм ылъэныкъокIэ зэкъотынхэр, социальнэ гъусэныгъэ зэдыряIэныр, лэжьа­кIом лъытэныгъэ фэшIыгъэныр — шъолъыр, район, лъэныкъо пэпчъ, лэ­жьэ­кIо коллективхэм, предприятиехэм анахьэу анаIэ зытырагъэтын фэе шапхъэу щытых».

ЛэжьэкIо коллективыбэ профсоюз­хэм ахэхьэ. Хэбзэ къулыкъухэм лэжьакIохэмрэ предприятиехэр зыехэмрэ зэдэлэжьэныгъэ пытэ адыряIэнымкIэ Iофышхо шъогъэцакIэ. Шъо шъуишIуагъэкIэ цIыфхэм ягумэкIыгъохэм нахь ащыгъуазэ тэхъу, Iофыгъохэр нахь псынкIэу зэшIотхын тэ­лъэкIы», — къыIуагъ республикэм ипащэ.

КъумпIыл Мурат зэрэхигъэунэфыкIыгъэмкIэ, Адыгеим ипрофсоюзхэмрэ хэбзэ къулыкъухэмрэ азыфагу бэшIагъэ зэдэлэжьэныгъэ пытэ зилъыр. Республикэм ипащэхэм тапэкIи профсоюз движением изегъэушъомбгъун яшъыпкъэу акIуачIэ ра­хьылIэщт.

АР-м и ЛIышъхьэ Адыге­им ипрофсоюзхэм я Федерацие хэтхэм, отраслэ, пэублэ профсоюз организациехэм япащэхэм зэрафэразэр къыIуагъ щы­Iэныгъэм игупчэ ренэу зэ­ритхэм, республикэм исхэм яфедэхэм яшъыпкъэу зэрафэлажьэхэрэм афэшI. Профсоюз движением иветеранхэми ащ «тхьашъуегъэпсэу» ари­Iуагъ.

КъумпIыл Мурат АР-м и ЛIышъхьэ и Рэзэныгъэ тхылъхэр профсоюз движением зиIахьышIу хэзы­шIыхьэхэрэм аритыжьыгъ. Джащ фэдэу АР-м и Къэ­ралыгъо Совет — Ха­сэм и Щытхъу тхылъхэр, Урысые Федерацием и Къэралыгъо Думэ IофшIэнымкIэ, социальнэ политикэмкIэ ыкIи ветеранхэм яIофхэмкIэ и Комитет и Щытхъу тхылъхэр, Урысыем ипрофсоюз шъхьафитхэм я Федерацие итынхэр, АР-м ипрофсоюзхэм я Федерацие и Щытхъу тхылъхэр зэхэсыгъом щаритыжьыгъэх.

Адыгэ Республикэм иартистхэр зыхэлэжьэгъэ мэфэкI концерткIэ Iоф­тхьабзэр аухыгъ.

АР-м и ЛIышъхьэ ипресс-къулыкъу