Урысыем хэгъэгу ­кIоцI IофхэмкIэ икъулыкъухэм яIофышIэ и Мафэ фэгъэ­хьыгъэ зэIукIэ непэ  Мыекъуапэ щыкIуагъ. Полицием иIофышIэ­хэм­рэ иветеранхэмрэ афэгу­шIонэу ащ къэкIогъагъ Адыгеим и ЛIышъхьэу КъумпIыл Мурат.

Джащ фэдэу Iофтхьа­бзэм хэлэжьагъэх АР-м и Къэралыгъо Совет — Ха­сэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, респуб­ликэм ихэбзэухъумэкIо къулыкъухэм япащэхэр, АР-м хэгъэгу кIоцI Iоф­хэмкIэ и Министерствэ дэжь щызэхэщэгъэ Общественнэ советым хэтхэр, хэгъэгу кIоцI IофхэмкIэ къулыкъухэм яIофышIэхэр ыкIи яветеранхэр, полицейскэхэм ягъэхьазырын фытегъэпсыхьэгъэ классхэу гурыт еджапIэу N 17-м иIэхэм якIэлэ­еджакIохэр.

Республикэм и ЛIышъхьэ ишIуфэс псалъэ къызэрэщыхигъэщыгъэмкIэ, хэгъэгур пштэмэ, Адыгеир анахь рэхьатныгъэ зэрылъ ыкIи щынэгъончъэ шъо­лъырхэм ащыщ. Арэущтэу зэрэщытым ишIогъэшхо хэлъ хэгъэгу кIоцI Iоф­хэмкIэ республикэм и Министерствэ.

КъумпIыл Мурат АР-м хэгъэгу кIоцI IофхэмкIэ и Министерствэ иветеранхэм анахьэу зэрафэразэр къыхигъэщыгъ, ахэм ащыщыбэхэр опытэу яIэмкIэ яIофшIэгъу ныбжьыкIэхэм адэгуащэх, республикэм иныбжьыкIэхэр яхэгъэгу фэшъыпкъэхэу пIугъэнхэм яIахь хашIыхьэ.

Iофтхьабзэм илъэхъан зы такъикъэ афэшъыгъуа­гъэх ячIыпIэгъу хэбзэухъу­макIохэм, зыпсэ емыблэжьхэу илъэс зэфэшъхьафхэм цIыфхэр къэзыухъумагъэхэм.

АР-м и ЛIышъхьэ къызэриIуагъэмкIэ, ахэм зэрахьэгъэ лIыхъужъныгъэр егъэшIэрэу цIыфхэм агу илъыщт. Непэ уи Хэгъэгу уфэшъыпкъэн зэрэфаем тегъэпсыхьагъэу хэгъэгу кIоцI IофхэмкIэ Министерствэм иIофышIэхэм пшъэ­дэкIыжь ин хэлъэу зыфэгъэзэгъэхэ Iофхэр агъэцакIэх, гъэхъэгъэшхохэр ашIых, хэушъхьафыкIыгъэ дзэ операциеми зышъхьамысыжьхэу япшъэрылъхэр щагъэцакIэх, хэгъэгум щыщ хъугъэ шъолъырыкIэхэм ащыпсэурэ мамыр цIыфхэри къаухъумэх.

«НепэкIэ дунаим иIоф­хэм язытет елъытыгъэу гумэкIыгъохэр щыIэ хъугъэх. Урысыем инеущырэ мафэ тидзэкIолIхэм къаухъумэ, тэри республикэм исхэмкIэ тицIыфхэм ящы­нэгъончъагъэ тынаIэ тедгъэтын, сыд фэдэ гумэкIы­гъо къытшъхьащыхьагъэми, къыттефэрэр шIуагъэ къытэу зэшIотхын фае, обществэм зэгурымыIоныгъэ-зэщыхъоныгъэ къыхэдгъахьэ хъущтэп, — къы­Iуагъ КъумпIыл Мурат. — Адыгеим исхэм ашIэн фае цыхьэшIэгъоу ахэр къызэраухъумэхэрэр. Урысыем и Президентэу Владимир Путиным къызэ­рэ­кIигъэтхъыгъэмкIэ, джырэ лъэхъаным тиобществэ изыкIыныгъэ къэухъумэгъэным иIофыгъо апшъэрэ мэхьанэ иIэу хъугъэ. Пре­зидентым къызэрэхигъэщыгъэмкIэ, мыщкIэ хэбзэу­хъумэным ылъэныкъокIэ Iоф зышIэхэрэм мэхьанэшхо яI».

Адыгэ Республикэм хэ­гъэгу кIоцI IофхэмкIэ и Министерствэ хэтхэм IэпэIэсэныгъэ ин хэлъэу япшъэрылъхэр зэшIуахы­хэзэ зэрашIыщтым ицыхьэ зэрэтелъыр АР-м и ЛIышъхьэ къыхигъэщыгъ. Рес­публикэм ихэбзэ къулыкъухэм мамырныгъэмрэ рэхьатныгъэмрэ лъэпкъыбэ зыщыпсэурэ респуб­ликэм къыщыухъумэгъэнхэм пае хэбзэухъумакIо­хэм тапэкIи зэдэлэжьэныгъэ пытэ адыряIэщт.

АР-м хэгъэгу кIоцI Iоф­хэмкIэ иминистрэу Олег Безсмельнициныр мэфэ­кIым пае къафэгушIуагъ ыкIи ипсалъэ къызэрэ­щыхигъэщыгъэмкIэ, непэ по­лицием ыпашъхьэ ит пшъэрылъхэр зэрифэшъуа­шэу егъэцакIэх.

Джащ фэдэу полицием иIофышIэхэм къафэгу­шIуагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м и Апшъэрэ хьыкум и Тхьаматэу Шу­мэн Байзэт, Урысыем и ФСБ и ГъэIорышIапIэу Адыгэ Республикэм щыIэм ипащэу Михаил Кемеровыр, АР-м хэгъэгу кIоцI IофхэмкIэ и Министерствэ иветеранхэм я Совет итхьаматэу ХъутIыжъ Азмэт. ЗэIукIэм полицием иIофышIэ анахь дэгъухэр АР-м и ЛIышъхьэ, АР-м и Къэралыгъо Совет — Ха­сэм, Урысыем и ФСБ и ГъэIорышIапIэу Адыгэ Республикэм щыIэм я Рэзэныгъэ тхылъхэмкIэ хагъэунэфыкIыгъэх. Ащ нэмыкIэу ведомствэ тынхэр ыкIи хэушъхьафыкIыгъэ цIэхэр къафагъэшъошагъэх.

АР-м и ЛIышъхьэ ипресс-къулыкъу ­