АР-м и ЛIышъхьэу КъумпIыл Мурат иунашъокIэ терроризмэм пэ­шIуекIогъэнымкIэ рес­публикэм ирайонхэм ащызэхэщэгъэ комис­сиехэм язэхэсыгъохэр АР-м лъэпкъ IофхэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет регъэкIокIых.

Адыгэкъалэ щызэхэщэгъэ мыщ фэдэ комиссием щыкIогъэ Iэнэ хъураем Теуцожь ыкIи Тэхъутэмыкъое районхэм, Адыгэ­къалэ ахэхьэрэ псэупIэхэм экстремизмэм закъыщимыIэтынымкIэ, общественнэ щынэгъончъэныр ыкIи лъэпкъ зэгурыIоныгъэр ащыгъэпытэгъэнымкIэ, ныб­жьыкIэхэр хабзэм ди­мыштэрэ лъэныкъохэм ахэщагъэ мыхъунхэмкIэ амал тедзэу джыри къыдыхэлъытэгъэн фаехэм щатегущыIагъэх.

Комитетым итхьаматэу Шъхьэлэхъо Аскэр, шъо­лъыр общественнэ зэха­хьэу «Адыгэ Хасэм» ипащэу ЛIымыщэкъо Рэмэзан, хэбзэухъумэкIо, общест­веннэ ыкIи дин организациехэм, къэбар жъугъэм иамалхэм ялIыкIохэр, чIы­пIэ зыгъэIорышIэжьыпIэхэм якъутамэхэм, чIыпIэ койхэм япащэхэр зэ­хэсыгъом иIофшIэн хэлэжьагъэх.

Джащ фэдэу Шэуджэн районым мыщ фэдэ комиссиеу щызэхащагъэми игъэкIотыгъэ зэхэсыгъо иIагъ. Шэуджэн, Красно­гвардейскэ ыкIи Кощхьэблэ районхэм ахэхьэрэ чIыпIэхэм ыпшъэкIэ зигугъу къэтшIыгъэ Iофыгъо­хэр зэрэщызэшIуахыхэрэм щытегущыIагъэх.

АР-м лъэпкъ IофхэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхахьэм зэрэщыхигъэунэфыкIыгъэмкIэ, республикэм общественнэ-политическэ зыпкъитыныгъэ ыкIи рэхьатныгъэ илъ нахь мышIэми, Палестинэмрэ Израильрэ азыфагу къитэджэгъэ зэпэуцужьым ыпкъ къикIыкIэ хабзэм пэшIуекIорэ Iоф­тхьабзэхэр зэхамыщэнхэм непэ нахь гъэлъэ­шыгъэу тынаIэ тедгъэтын фае.

Лъэпкъ ыкIи дин зэгурымыIоныгъэр къахэмы­хьаным пае ныбжьыкIэ­хэм, дин ыкIи общественнэ организациехэм ялIыкIохэм нахьыбэрэ заIуагъакIэзэ ыкIи Iофхэм язы­тет фэгъэхьыгъэ зэдэгущыIэгъухэр адашIыхэзэ ашIынэу районхэм ащыкIогъэ зэхахьэхэм уна­шъо­хэр ащаштагъэх.