АР-м и Къэралыгъо Совет — Хасэм къихьащт 2024-рэ илъэс бюджетым ыкIи 2025 — 2026-кIэ агъэнэфагъэхэм афэгъэхьыгъэ хэбзэгъэуцу­гъэм ипроект тегущыIэнэу ригъэжьагъ.

Бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ АР-м и Парламент и Комитет ащ фэ­гъэхьыгъэ игъэкIотыгъэ зэ­хэсыгъо тыгъуасэ иIагъ. Iоф­тхьабзэм хэлэжьагъэх Къэралыгъо Советым — Хасэм и Тхьаматэу Владимир Нарожнэр, идепутатхэр, АР-м финансхэмкIэ иминистрэу Виктор Орловыр, нэмыкIхэри. Зэхэсыгъор зэрищагъ республикэ Парламентым и Тхьаматэ игуадзэу, бюджет, финанс, хэбзэIахь ыкIи экономикэ политикэмкIэ, предпри­нимательствэмкIэ ыкIи IэкIыб зэпхыныгъэхэмкIэ Комитетым ипащэу Iэщэ Мухьамэд.

ЫпэрапшIэу бюджетым фэгъэхьыгъэ законопроектэу Парламентыр апэрэ еджэгъумкIэ зыхэплъэщтым къыдэлъытагъэ­хэм финансхэмкIэ министрэр къатегущыIагъ. Нэужым АР-м и УплъэкIокIо-лъытэкIо палатэ проектым зыхаплъэм зэфэхьысыжьэу ышIыгъэхэм ащ ипащэу Павел Стаценкэм къащигъэгъо­загъэх. Ащ къызэриIуагъэмкIэ, хэукъоныгъэ къыхагъэщыгъэп, ау лъэныкъо зэфэшъхьафхэм къахэкIыгъэу сомэ миллион 210,1-кIэ бюджетым ихахъохэр нахьыбэ шIыгъэнхэ амал щыIэу алъытагъ. Ащ щыщэу сомэ мил­лион 55,3-р физическэ лицэхэм, сомэ миллиони 2,5-р ежь-ежьырэу IофшIэн къызфэзгъотыжьыгъэхэм, сомэ миллион 20-м ехъур транспортым пай къатырэ хэбзэIахьхэм, сомэ милли- он 32,1-р шъон пытэхэм къа­кIэкIорэ акцизхэм къахэкIыщт.

Комитетыр ащ зытегущыIэм ыуж, апэрэ еджэгъумкIэ зыхэплъэщтхэ законопроектым гъэтэрэзыжьынхэр фэшIыгъэнхэ фаеу зэдаштагъ. А пчъагъэри хэтэу 2024-рэ илъэс бюджетым ихахъохэр сомэ миллиард 30,5-рэ, хъарджхэр сомэ миллиард 32,2-рэ хъущтых, сомэ миллиардрэ миллион 700-рэ щыкIагъэ фэхъущт.

Бюджетым фэгъэхьыгъэ зако­нопроектыр АР-м и Парламент изичэзыу зэхэсыгъо къыхалъхьа­нэу зэдаштагъ.

ХЪУТ Нэфсэт.