Мыекъопэ къэлэ сымэджэщым гинекологиемкIэ иотделение технологие пэрытхэм адиштэрэ операциехэр щашIыхэ хъугъэ.

ЫпэкIэ тибзылъфыгъэхэм нэмыкI къалэхэм къащяIэзэнхэу зафагъазэщтыгъэмэ, джы ахэр чыжьэу кIожьыхэрэп. ГинекологиемкIэ отделениер зыгъэпсырэр IэпэIэсэныгъэ ин, ухьазырыныгъэ дэгъу зыIэкIэлъ, зэгурыIожь IофышIэ купыр ары. Бзылъфыгъэ узхэм яIэзэгъэнымкIэ пшъэрылъ къинхэр ахэм зэшIуахых. Мы отделением бэмышIэу тыщыIагъ, ащ изы IофшIэгъу мафэ зыщыдгъэгъозагъ, ипащэ гущыIэгъу тыфэ­хъугъ.

Уахътэм диштэу

Бзылъфыгъэ узхэм зыщяIэзэхэрэ отделениеу республикэм итыр мы зыр ары. Ащ епхы­гъэу районхэм къарыкIыхэрэри бэу къяуалIэх. Илъэсым къыкIоцI гурытымкIэ бзылъфыгъэ мини 2-м ехъумэ щяIазэх.

— Отделением зыпкъитыныгъэ шапхъэм тетэу Iоф ешIэ, — къеIуатэ отделением ипащэу Аулъэ Светланэ. — Медицинэ IэпыIэгъу пстэури тэгъэ­цакIэ: планым тетыр, хирургиче­скэр, гузэжъогъур, шIокI зимы­Iэр. Анахь пшъэрылъ шъхьаIэхэм ащыщ операцие зэфэшъхьафхэм яшIын. Илъэсым къыкIоцI опера­циешхо 500 — 600 фэдиз, цIы­кIухэу — мин 1,5-рэ, технологие пэрытхэм адиштэу 30 — 40 (икIыгъэ илъэсым ащ фэдэу 42-рэ, мы илъэсым иджырэ уахътэ ехъулIэу 35-рэ) тэшIых.

Джащ фэдэу ыпэкIэ мы отделением щамыгъэфедэщтыгъэ шIыкIакIэхэр джы яIофшIэн зэрахагъэхьагъэхэр тигущыIэгъу къытфиIотагъ. Ахэм зэу ащыщ эндоскопическэ ыкIи лапароскопическэ амалхэр. Гистерорезектоскопием ишIуагъэкIэ бзылъфыгъэм илъфалъфэ рамы­хэу ащ хэхъогъэ лыпцэ адэ­хъур хахы. Бзылъфыгъэ ныбжьыкIэхэм сабый къапыфэнымкIэ мыщ фэдэ операцие шIыкIэм мэхьанэшхо иI. Зыныбжь хэкIотагъэхэр зыгъэгумэкIыхэрэ нэ­мыкI узхэми мыщ дэгъоу щя­Iазэх.

— Адыгеим щыпсэурэ бзылъфыгъабэхэр тигъунэгъу шъолъыр­хэм кIонхэ фае хъущтыгъ. Джы нэбгырэ пчъагъэу къытэуалIэ хъугъэм къеушыхьаты тиIэпыIэгъу ящыкIагъэу зэрэщытыр ыкIи тиIофшIакIэ осэшIу къызэрафашIырэр. АмалыкIэхэр къызэрэзыIэкIэдгъэхьагъэхэм яшIуа­гъэу ар сэлъытэ ыкIи зифэшъо­шэ оборудованиер тимыIагъэмэ ар къыддэхъущтыгъэп, — хи­гъэу­нэфыкIыгъ отделением ипащэ.

ЗэрэщяIэзэщтхэ оборудование ыкIи аппаратурэ зэфэ­шъхьафхэр зэрагъэгъотыгъэх. Гу­хэкI нахь мышIэми, гинекологиер къэралыгъо программэу пхыращыхэрэм къахиубытэрэп. Арышъ, ящыкIагъэр зэкIэ АР-м псауныгъэр къэухъумэгъэнымкIэ и Министерствэ ыкIи Мыекъопэ къэлэ сымэджэщым ямылъкукIэ къащэфы. Мары бэмышIэу гистероскопическэ стойкакIэ къа­ратыгъ, сыда пIомэ адрэ яIа­гъэр стерилизацие зэпымыухэм апкъ къикIыкIэ зэщыкъуагъэ. Аулъэ Светланэ къызэрэхигъэщыгъэмкIэ, аппаратурэ джыри къафащэфынэу ежэх, ащ ишIуагъэкIэ медицинэ фэIо-фэшIэу агъэцакIэхэрэм ахагъэхъон алъэ­кIыщт.

IофышIэ купыр

ГинекологиемкIэ отделениер проценти 100-м нэсэу Iофы­шIэхэмкIэ ушъагъэ. Гурыт ыкIи младшэ IофышIэу нэбгырэ 40 Iут. Врачхэр нэбгыри 8 мэхъух. Ащ ипащэу Светланэ Руслъан ыпхъум къызэриIуагъэмкIэ, Iо­фы­шIэ купыр зэгурэIожьы.

— IофшIэнэу дгъэцакIэрэр къызэрыкIоп, арышъ, мыщ къа­кIохэрэр зэкIэ лъэшэу зисэнэ­хьат шIу зылъэгъухэрэр ары. Къыхэзгъэщымэ сшIоигъу ныбжьыкIабэ зэрэIутыр. Ары па­кIошъ, студентхэм ащыщхэр къыIунэхэмэ ашIоигъоу, тапэкIэ Iоф щызышIэщтхэр джы къыщегъэжьагъэу тэгъасэх. Непэ от­де­лением щылажьэхэрэр гъэсагъэх, гукIэгъу ахэлъ, сыма­джэхэм анаIэ атет. Тэ тызщэтхъужьыкIэ мэхьанэ иIэп. СигущыIэхэр къэзыушыхьатырэр хъужьыгъэу чIэкIыжьыхэрэр къытфэразэхэу, гущыIэ фабэхэр къызэрэтаIохэрэр ары, тэркIэ ар зымыуасэ щыIэп, — хигъэу­нэфыкIыгъ Аулъэ Светланэ.

ЗэIэзэхэрэ сымаджэхэр

Мы отделением бзылъфыгъэ ныбжьыкIэхэри, зыныбжь хэкIотагъэхэри къычIэфэх. НыбжьыкIэхэр анахьэу зыгъэгумэкIы­хэрэм ащыщ ушъхьагъу зэфэшъхьафхэм апкъ къикIыкIэ сабый къазэрапымыфэрэр. Ныбжьыр хэкIуатэ къэс пкъынэ-­лынэхэм адэхэр нахь ахэхъох, нэмыкI узхэми агъэгумэкIых. Арышъ, а узхэм атемыукIытыхьэхэу игъом врачым зыфагъазэмэ, агъэхъужьынхэ алъэ­кIыщт.

Отделением тызыщыIэгъэ мафэм чIэлъыгъэ сымаджэхэм ащыщхэм гущыIэгъу тафэхъугъ. Мыекъуапэ щыпсэурэ Риммэ Аскэр ыпхъум операцие пэ­кIэкIыгъ, хъужьи чIатхыкIыжьыгъэу ядэжь кIожьынэу зигъэхьазырыжьыщтыгъ.

— Сэ сызэрытыгъэ чIыпIэм бзылъфыгъабэ ефэ. Операцие хьылъэ къызэрэспыщылъыр къызысаIом, зыздэзгъэзэщтыр сшIагъэп. Сыда пIомэ а узэу сызгъэгумэкIыгъэм нэмыкIэу хэужъыныхьагъэу сиIэр макIэп, ахэр «къэущынхэм» ящынагъо къысшъхьарытыгъ. Ау сипсауныгъи, сищыIэныгъи цыхьэ зыфэсшIыщтыр къыхэхыгъуае сщыхъугъ. Тхьэм мы отделением сыкъыщэнэу хъугъэ, Светланэ Руслъан ыпхъум сыIукIи, сиIоф изытет къыфэсIотагъ. Сшъхьэ упчIабэу къитэджагъэ­хэр естынэу игъо симыфэзэ, джэуапхэр зэкIэ зэгъэфагъэу, кIэ­кIэу къыситыгъэх. Джащ дэ­жьым IэпэIэсэныгъэ ин зыхэлъ врачэу сызыфэягъэм сызэрэтефагъэр къызгурыIуагъ ыкIи сыгу Iэсагъэу сыкъычIэкIы­жьыгъ. Мары зэрэшъулъэгъоу операциер спэкIэкIыгъ, сыгушIоу тадэжь сэкIожьы. Отделением Iоф щызышIэхэрэми сафэраз, мыщ дэгъоу IофшIэныр щызэтегъэуцуагъ. Ар пащэм иIоф­шIакIэ епхыгъэу щыт, — хигъэу­нэфыкIыгъ Риммэ. Операцие хьылъэ зыпэкIэкIыгъэу, реанимацием ащэжьыгъэу илъ Ирина Мощенкэм гущыIэгъу тыфэхъугъ. Аулъэ Светланэ къы­зэриIуагъэмкIэ, мы бзылъфыгъэм лъыр кIэкIэу IэпыIэгъу псынкIэм къынигъэсыгъ. Лъфалъ­фэм лыпцIэ адэхъу ин дэдэ итэу къычIэкIыгъ, гузэжъогъу шIыкIэм тетэу операцие ашIын фае хъу­гъэ. Ау, зауплъэкIум, итхьабыл рыкIуапIэхэми лъыпцIагъэр адэтэу къыхагъэщыгъ. Арэу зыхъукIэ гинекологие лъэны­къом­кIэ операцие пшIымэ идунай ыхъожьыным ищынагъо къэуцугъ, умышIыми хъущты­гъэп. Сосудистэ хирургыр къырагъэблагъи, врач купыр зэхэтэу бзылъфыгъэр операцие хьылъэ ашIыгъ, ищыIэныгъэ къагъэнэн алъэкIыгъ.

— Врачхэм лъэшэу сызэрафэразэр гущыIэкIэ къиIотыкIыгъуай, — еIо Ирина Мощенкэм. — Ахэм IэпэIэсэныгъэ ин зэрахэлъыр, ясэнэхьат хэшIыкIышхо зэрэфыряIэр къагъэ­шъыпкъэжьыгъ. Синасып къы­хьыгъэу, ар зыфэдэ къэмыхъугъэ хъугъэ-шIагъэу врачхэм аIо шъхьаем, ежьхэм ар къыздамыгъэхъугъэмэ псаоу сыкъанэщтыгъэп.

ЗэрэлIакъоу врачых

ТигущыIэгъу врач сэнэхьатыр къызэрэхихыщтым бэрэ егупшысагъэп. Сыда пIомэ, ар къызэрыхъухьэгъэ унагъом врачхэр къикIыгъэх. Светланэ ятэу ГутIэ Руслъан ищыIэныгъэ щыщ илъэс 42-р медицинэм рипхыгъ. ИсэнэхьаткIэ неврологэу щы­тыгъ, ау иIофшIэн зыщыригъэ­жьагъэм къыщыублагъэу сымэ­джэщ зэфэшъхьафхэм яврач шъхьэIагъ.

Янэу Галинэ поликлиникэу N 3-м илабораторие илъэс пчъагъэхэм ипэщагъ. Ышып­хъоу ГутIэ Саидэ ультразвуковой диагностикэмкIэ врач, медицинэ шIэныгъэхэмкIэ кандидат, Мые­къопэ къэралыгъо технологическэ университетым имедицинэ факультет икафедрэхэм ащыщ кIэлэегъаджэу Iут.

Ежь Светланэ мамыкумкIэ ыкIи гинекологиемкIэ ординатурэр 1997-рэ илъэсым къызэриухэу мы отделением Iоф щишIэнэу ригъэжьагъ. 2019-рэ илъэсым къыщегъэжьагъэу ащ ипащ.

— Сятэ неврологэу зэрэщытыгъэм пае сэри а лъэныкъор къыхысигъэхы шIоигъуагъ, — къеIуатэ тигущыIэгъу. — Ау сэ сыгукIэ сызыфэягъэм зызгъэзагъ. IэпыIэгъоу язгъэгъотырэм гухахъо хэсэгъуатэ. Сыда пIомэ узэряIазэрэм икIэух, уишIуагъэ зэрякIыгъэр охътэ кIэкIым къэлъагъо. ЕтIанэ къыз­дэхъугъэм сыкъыщыуцурэп, зэпымыоу сишIэныгъэхэм ахэз­гъэхъоным ыуж сит. Сызэрэгушхохэрэм зэу ащыщ респуб­ликэмкIэ апэу лапароскопиер сIэ къызэризгъэхьагъэр. Мы шIыкIэм ишIуагъэкIэ операцие хьылъэхэр гъонэ цIыкIу нахь фэмышIэу ошIышъух. Ащ дакIоу бзылъфыгъэм ипкъынэ-лынэ зэрар екIырэп ыкIи нэужым сабый къыпыфэнымкIэ гугъапIэхэр къетых. А гухэлъыр къыз­дэхъугъэ бзылъфыгъэхэм сабыйхэр аIыгъэу къызысфа­кIохэкIэ, сиIофшIагъэ зэрэмы­хьаулыер къызгурэIо.

Гинекологическэ отделением ипащэ иIофшIэн къэралыгъо хабзэми осэшIу къыфишIыгъ. Аулъэ Светланэ «Адыгэ Респуб­ликэм изаслуженнэ врач» зыфиIорэ щытхъуцIэр мы илъэсым къыфагъэшъошагъ.

— СэркIэ ар ошIэ-дэмышIэ дэдэ хъугъэ. Бзылъфыгъэхэм ямэфэкI ехъулIэу шIухьафтын къысфашIыгъэу слъытагъэ. Си­IофшIэн гу лъати, осэшIу къыфашIи сыкъызэрэхагъэщыгъэр сигуапэ хъугъэ. Нахь езгъэхъузэ сипшъэрылъхэр зэрэзгъэцэкIэщтым джыри сыпылъыщт, — къыIуагъ Светланэ.

Iэшъынэ Сусан.