Мэхьанэшхо зиIэ мафэр зэрэдунаеу щыхагъэунэфыкIы. Зымылъэгъухэу е макIэу зылъэгъухэу щыIэныгъэм чIыпIэ зэжъу щиуцогъэ цIыфхэм обществэм, хабзэм анаIэ зэратырагъэтырэр къагъэлъэгъо­ным ар епхыгъ.

Мы купым хэхьэрэ цIыфхэм анэ ымылъэгъуми, дунэе нэфым идэхагъэ гукIэ зэхашIэ.

Чъэпыогъум и 15-р «Бэщ фыжьым» и Дунэе мафэу агъэ­нэфагъ. Мыр — мэфэкIэп, гукъаом итамыгъэу щыт ыкIи зипсауныгъэ амал зэщыкъуа­гъэхэм IэпыIэгъу афэхъугъэным фэшI. «Бэщ фыжьыр» зынэ зы­мылъэгъухэрэм ятамыгъэ къодыеп, мыр яIэмэ-псым, анэ­хэм ачIыпI.

Мазэм къыкIоцI, шэкIогъум и 13-м нэс, мыщ епхыгъэу тыди Iофтхьэбзэ зэфэшъхьафхэр щырагъэкIокIых: семинархэр, зэIукIэгъухэр, лекциехэр, зэ­нэ­къокъухэр. Къэбар жъугъэм иамалхэм къэтынхэр афагъэхьазырых, ящыIэныгъэ, ящы­Iэ­кIэ-псэукIэ, ягъэхъагъэхэр къи­зы­IотыкIырэ тхыгъэхэр къы­хаутых.

Зымылъэгъурэ цIыфым Iофыгъоу иIэр макIэп. Анахь шъхьаIэхэр — IофшIапIэ Iухьанхэр, медицинэ ыкIи гъэсэныгъэ фэIо-фашIэхэр, щыIэныгъэм зыкъыхагъотэныр ыкIи Iэры­фэгъу щыIакIэр. Зипсауныгъэ амалхэр зэщыкъогъэ цIыф пстэу­ри къэралыгъом зызэрэфагъазэрэр: «зи къытфэшъумышI тэ тыхэмытэу». Джа еплъыкIэр урысые хэбзэгъэу­цугъэм ылъапсэ зэрашIыщтым ыуж итых. Къэралыгъо программэу «Iэрыфэгъу щыIакI» зыфиIорэр пхыращы. Сэкъатныгъэ зиIэхэм атегъэпсыхьэгъэ инфраструктурэр, транспортыр, къэбархэр, медицинэ фэIо-фашIэхэр аIэкIэгъэхьэгъэнхэм епхыгъэ Iофтхьабзэхэр мыщ къыдыхэлъытагъэх. Ахэм ягъэцэкIэн бюджет зэфэшъхьафхэм къарыкIырэ ахъщэр мыщ пэIуа­гъахьэ.

Адыгеим и ЛIышъхьэ мы купым хэхьэрэ цIыфхэм къотэгъу афэхъу, хьафизэхэр щы­Iэныгъэм хэгъэгъозэгъэнхэм фэгъэзэгъэ къулыкъухэми унашъохэр афешIых. Дунэе нэфым идэхагъэ амылъэгъуми, зэхашIэным иамалхэр агъотынхэм ащ ынаIэ тырегъэты.

Iэшъынэ Сусан.