Апэрэ Урысые унэгъо форумэу «Родные — Любимые» зыфиIорэр шэкIогъум и 24-м къыщегъэжьагъэу и 27-м нэс Москва щыкIощт.

«Движение Первых» зыфиIорэр ащ икIэщакIу. Тикъэралыгъо ишъолъыр пстэуми къарыкIыщт унагъохэр зэнэкъокъу шIыкIэм тетэу къыхахыгъэх. Адыгеир мыгъэ форумым къыщызгъэлъэгъощтыр зынэхэм амылъэгъурэ пшъэ­шъэжъые ныбжьыкIэу Малика Алиевам иунагъу.

Шъугу къэдгъэкIыжьын, тигъэзети къыхиутыгъагъ илъэс 15 зыныбжь пшъэшъэжъыеу Малика къушъхьэу «Ошъутен» илъэгапIэ бэдзэогъу мазэм дэкIоен зэри­лъэкIыгъэр. Зипсауныгъэ амалхэр зэщыкъогъэ цIыфхэу сэкъатныгъэ зиIэхэм афызэшIокIын алъэкIыщтыр зэрэбэр ащ игъэ­хъагъэкIэ къыушэтыгъ. Ащ дакIоу, республикэм паратуризмэм зыщиушъомбгъуным ипроектыкIэ щыIэ хъугъэ. Дэеу зэхэзыхырэ, зылъэгъурэ кIэлэцIыкIухэр зычIэс республикэ коррекционнэ еджэпIэ-интернатэу Мыекъуапэ дэтым Маликэ щеджэ. «Движение Первых», «Опора России» зыфи­Iо­хэрэм ясатыр хэт. Ежь ищыIэ­ныгъэ нахь къызэригъэпсынкIэщтым имызакъоу, нэмыкIхэми ар къадигъэхъуным чанэу зэрэпы­лъымкIэ пшъэшъэжъыер республи­кэм бэмэ щашIэ.

Алиевхэм яунагъоу форумым хэлэжьэщтым гъэхъэгъэшIухэр ышIынхэу фэтэIо.