ХьакIэхэр нахь лъэшыгъэх
Урысыем ичемпионат и Суперлигэ хэлэжьэрэ «АГУ-Адыифым» мы мафэхэм зичэзыу ешIэгъу иIагъ.
Краснодар икомандэу «Кубань» Мыекъуапэ къеблэгъагъ. ХьакIэхэр нахь лъэшыгъэх, зэIукIэгъур ахьыгъ.
«АГУ-Адыиф» (Мыекъуапэ) — «Кубань» (Краснодар) — 25:35.
Мы командэхэм яешIэгъухэр сыдигъуи гъэшIэгъонэу макIох, цIыфыби яплъы. «Кубань» фэгумэкIыхэрэр мымакIэу республикэм икъэлэ шъхьаIэ къэкIуагъэх. Апэрэ такъикъхэм къащегъэжьагъэу тигъунэгъу краим игандболисткэхэр ешIэгъум нахь зэрэфэхьазырхэр къэлъэгъуагъ, ахэр псынкIэу гупшысэщтыгъэх, ешIэщтыгъэх. Анахьэу хьакIэхэм къахэщыгъэх ыпэкIэ республикэм икомандэ щешIэщтыгъэхэ Алина Морозовамрэ Ангелина Куцеваловамрэ, джащ фэдэу къэлэпчъэIутэу Регина Якуповар.
Ау бысымхэми зыкъатыщтыгъэп, яешIакIэ нахь зэрагъэлъэшыщтым пылъыгъэх. Ау типшъашъэхэм пенальтитIу дадзэшъугъэп, тфэгъогогъо штангэм тырагъэфагъ. Апэрэ таймыр 17:11-у «Кубань» ыхьыгъ. ЯтIонэрэр зырагъажьэм тигандболисткэхэр такъикъипшIым къыкIоцI дахэу ешIагъэх, хьакIэхэр Iэгоуи 3 ныIэп апэ зэритыгъэхэр. Ау охътабэ темышIэу хьакIэхэм зэлъыпытэу Iэгуаор къэлапчъэм дадзэн алъэкIыгъ, 25:35-у зэIукIэгъум текIоныгъэр къыщыдахыгъ.
Я 12-рэ турым изэфэхьысыжьхэр:
«Ростов-Дон» — «Астраханочка» — 32:27, «Черноморочка» — «Звезда» — 39:32, «Луч» — «Ставрополье» — 27:28. Командэхэр зыдэщыт чIыпIэхэр ыкIи очко пчъагъэу рагъэкъугъэр:
1. «Ростов-Дон» — 22. 2. «ЦСКА» — 18. 3. «Черноморочка» — 17. 4. «Лада» — 16. 5. «Кубань» — 16. 6. «Астраханочка» — 15. 7. «Динамо-Синара» — 13. 8. «Звезда» — 8. 9. «АГУ-Адыиф» — 7. 10. «Ставрополье» — 6. 11. «Луч» — 2. 12. «Университет» — 0.
ШэкIогъум и 13-м «АГУ-Адыифыр» «Динамо-Синара» IукIэщт, ешIэгъур Волгоград щыкIощт.