Мыекъуапэ щызэхащэщт
Атлетикэ онтэгъумкIэ Урысыем изэнэкъокъухэр Мыекъуапэ щыкIощтых.
Ащ илъэс 15 — 18 ыкIи 19 — 20 зыныбжь пшъашъэхэр ыкIи кIалэхэр хэлэжьэщтых. Мыщ фэдэ мэхьанэшхо зиIэ зэнэкъокъур апэрэу республикэм икъэлэ шъхьаIэ щырагъэкIокIыщт.
ЗэхэщакIохэм къызэраIуагъэмкIэ, къэралыгъом ишъолъыр 56-мэ яспортсменхэм заушэтыщт. Адыгеир нэбгырэ 15 фэдизмэ къагъэлъэгъонэу агъэнафэ. Зэнэкъокъухэр шэкIогъум и 11-м щегъэжьагъэу и 20-м нэс кIощтых. Мы спорт лъэпкъыр зыгу рихьыхэрэр спорткомплексэу «Ошъутен» зыфиIорэм рагъэблагъэх, учIэхьаным пае ыпкIэ птын ищыкIагъэп. ШэкIогъум и 11-м сыхьатыр 4-м зэнэкъокъур къызэIуахыщт.