Мы мафэхэм Респуб­ликэу Казахстан ипредпринимательхэм ащыщ­хэр Адыгеим щыIэх.

Лъэпкъ проектэу «Предпринимательствэ цIыкIур ыкIи гурытыр, предпринимательствэм IэпыIэгъу фэхъугъэныр» зыфиIорэр пхырыщыгъэным фэшI экспортым IэпыIэгъу етыгъэнымкIэ  Адыгеим и Гупчэ ахэр къыригъэблэгъагъэх. Iофтхьабзэм къы­дыхэлъытагъэу тыгъуасэ хьакIэхэмрэ Адыгеим ипредпринимательхэм ащыщхэмрэ Гупчэу «Мой бизнес» зыфиIорэм зэдэгущыIэгъухэр щыряIагъэх.

Предпринимательхэм IэпыIэгъу ятыгъэнымкIэ АР-м и Гупчэ ипащэу КIыкI Артур къызэрэтиIуа­гъэмкIэ, Казахстан ибизнесменхэм илъэс заулэ хъугъэу зэпхыныгъэ адыряI. Адыгеим къыщыдагъэ­кIыхэрэр ахэм агу рехьы, ащэфы, яхэгъэгу щыIуагъэ­кIы. Ары къырагъэблэгъэн­хэм ушъхьагъу шъхьаIэ фэхъугъэр.

— БлэкIыгъэ 2022-рэ илъэсыр пштэмэ, тиреспуб­ликэ къыщашIыгъэу доллар миллиони 2,5-рэ фэдиз зыосэ товар типредпринимательхэм Казахстан щыIуагъэкIыгъ, — къы­Iуагъ ащ. — Мы илъэсым а пчъагъэр нахьыбэ хъу­нэу пэшIорыгъэшъэу къэт­лъытагъ. ГущыIэм пае, щы­лэ мазэм къыщыублагъэу непэ нэсэу къэплъы­тэмэ, доллар миллиони 2-м ехъу зытефэрэ продукцие ащагъ ыкIи щы­Iуа­гъэкIыгъ, илъэсым ыкIэм нэс доллар миллиони 3-м нэсынэу тэгугъэ.

Гупчэм ипащэ къызэри­IуагъэмкIэ, япредпринимательхэм зэгурыIоныгъэ азыфагу илъэу зэдэла­жьэх. Адыгеим къыщашIырэ гъомылапхъэхэр экологием ишапхъэхэм ади­штэхэу Казахстан ипредпринимательхэм алъытэ, ахэр ары нахьыбэу къыз­кIэупчIэхэрэр. Джащ фэ­дэу мы хэгъэгум щыIуагъэкIых псэолъэшIыным щагъэфедэрэ материал­хэр, пхъэм хэшIыкIыгъэ продукциер.

ЗэIукIэгъоу тыгъуасэ яIагъэм мы лъэныкъохэм ямызакъоу, нэмыкI продукцие къэзышIыхэрэри хэлэжьагъэх. IэкIыбым къикIыгъэ хьакIэхэр мэфищырэ Адыгеим щыIэщтых. Iофтхьабзэм къызэ­рэдэлъытагъэмкIэ, хъыз­мэтшIапIэхэр къакIухьащтых, продукциеу къы­дагъэкIырэм нэIуасэ зыфашIыщт.

Мыщ фэдэ зэIугъэкIэгъухэр предпринимательхэм IэпыIэгъу ятыгъэнымкIэ АР-м и Гупчэ зэрэзэхищэрэр апэрэп. ЫпэкIэ Республикэу Беларусь ипредпринимательхэр къы­рагъэблэгъагъэх.

ХЪУТ Нэфсэт.