Хэгъэгу зэошхом ыкIи зэоуж илъэсхэм къиныбэ зыпэкIэкIыгъэхэм ащыщхэм къызыхъугъэ мафэхэр шэкIогъум и 7-м Мыекъуапэ щыхагъэунэфыкIыгъ. ЩыIэныгъэм щызэпачын фаеу хъугъэ гумэкIыгъо инхэм ямылъытыгъэу ахэр чэфых ыкIи гушхох. ГугъэпIэ дахэхэр зыдаIыгъхэу ямэфэкI ахэр къекIолIагъэх.

Я 3-рэ Белорусскэ фронтым ишхончэо полк хэтыгъэу Кузьмин Дмитрий Яков ыкъом къызыхъугъэр илъэси 101-рэ зэрэхъурэр хигъэунэфыкIыгъ. Ветераным Щытхъум иорденэу я III-рэ шъуашэ зиIэр, медальхэу «За взятие Будапешта», «За победу над Германией» зыфиIохэрэр къыфагъэшъошагъэх.

Дмитрий Яков ыкъор ежь ышъхьэкIэ хьакIэхэм къапэгъокIыгъ. Мыекъуапэ имэрэу Геннадий Митрофановым ыцIэкIэ ветераным фэгушIуагъэх къэлэ Общественнэ палатэм итхьаматэу, ветеранхэм якъэлэ Совет итхьаматэ игуадзэу Алексей Романовымрэ администрацием илIыкIохэмрэ.

Ветераным игуапэ хъугъэ къэгъагъэ­хэмрэ шIухьафтынхэмрэ къызэрэпагъо­хыгъэхэр ыкIи щыIэныгъэ гъогоу къыкIугъэмрэ иунагъорэ афэгъэхьыгъэу хьа­кIэхэм къафиIотагъ.

— Сэ сипхъорэлъф космическэ технологиехэм алъэныкъокIэ Москва Iоф щешIэ. Садэжь къэкIонэу хъугъэп, тхьаматэхэм къатIупщыгъэп. Унашъор — унашъу, ащ зи хэпшIыхьан щыIэп, — щхыпцIызэ къы­Iуагъ Дмитрий Яков ыкъом.

ХьакIэхэр ыгъэкIотэжьхэзэ ащ къа­риIуагъ зэращымыгъупшэрэр зэригуапэр ыкIи къыкIэлъыкIорэ юбилеим зэкIэ къекIолIэнхэу ригъэблэгъагъэх.

ЛIыкIо купым хэтхэр нэмыкI ветераным фэгушIонхэу кIуагъэх. Ар илъэс 95-рэ хъугъэу, фронт кIыбым хъупхъэу щылэжьэгъэ Куценко Николай Василий ыкъор ары. 1928-рэ илъэсым ар къэ­хъугъ, Хэгъэгу зэошхом илъэхъан колхозым Iоф щишIагъ, чIыгум дэлэжьагъ. Мыекъуапэ имэрэу Геннадий Митрофановым ыцIэкIэ ветераным шIуфэс тхылърэ къэгъагъэ­хэмрэ ратыгъэх. Непэ Николай Василий ыкъом ипсауныгъэ изытет дэгъу. Ащ къызэрэхигъэ­щыгъэмкIэ, игупсэ Мыекъуапэ культурэм ылъэныкъокIэ къыдэхъухьэхэрэм защегъэгъуазэ, концертхэм, къэгъэлъэгъон зэфэшъхьафхэм чанэу якIуалIэ, ыныбжь хэкIотагъэми, спортыр Iэпэдэлэл ышIырэп.

— Тиветеранхэм амал зэриIэкIэ агу къэтIэтыным, мэфэкI мафэхэм, нэмыкI шIэжь мафэхэм дгъэгушIонхэм тыпылъ. Лъэшэу тигуапэ аныбжь хэкIотагъэми, ахэр щыIэныгъэм зэрэкIэгушIухэрэр.

Нахьыбэрэ ахэр, ТекIоныгъэр къытфыдэзыхыгъэхэр, къытхэтынхэу тыфай, — къыIуагъ Алексей Романовым.

Александра Балабась.