ЦIыфэу щыпсэухэрэм уасэу фашIыгъэм елъытыгъэу, жьым икъэбзагъэкIэ анахь зыгъэрэзэхэрэ къалэу Урысыем щагъэунэфыгъэхэм апэ итхэм Мыекъуапэ ахэфагъ. ЦIыф­хэм ящыIакIэ идэгъугъэкIэ Индексэу Къэралыгъо корпорациеу ВЭБ.РФ зыфиIорэм ыгъэунэфыгъэм ар къыгъэлъэгъуагъ.

Урысыем ит къэлэшхомэ ащыпсэу­хэрэр ары ушэтакIохэм упчIэжьэгъу ашIыгъэхэр. Мыекъуапэ щыпсэухэрэм жьым икъэбзагъэ уасэу фашIыгъэр балли 4,23-рэ, гурытымкIэ хэгъэгум къыщагъэлъагъорэр балли 3,1-рэ. Мые­къуапэ промышленнэ чIыпIэу иIэр бэп — проценти 5,2-рэ ныIэп (нэмыкI къа­лэхэм гурытымкIэ ар зэрэхъурэр проценти 7,3-рэ).

Псым изытети къэлэдэсхэр егъэразэх — уасэу фашIыгъэр балли 3,9-рэ, ари къэралыгъом ит къалэхэм япчъагъэхэм ашъхьадэкIы, гурытымкIэ ар зэрэхъурэр — 3,2-рэ. Тикъэлэ шъхьаIэ щыпсэухэрэм янахьыбэр (процент 92-рэ) мэкъэшхомэ агъэгумэкIхэрэп. Мыекъуапэ дэт унэхэр зэрэзэпэIудзыгъэхэм ар къыхэкIы. ГурытымкIэ зы гектарым псэупIэ квадратнэ метри 150,9-рэ телъытагъ. Урысыем ит къалэхэр пштэмэ, ар зэрэхъурэр квадратнэ метрэ 455-рэ.

Мыекъуапэ «иуцышъо» теплъэ къегъэ­лъагъо цIыфхэм экологием мэхьанэшхо зэрэщыратырэр.

Къэлэдэсэу зэупчIыгъэхэм япроценти 8,3-рэ экологием епхыгъэ Iофыгъохэм чанэу ахэлажьэх, адрэ къалэхэмкIэ ар зэрэхъурэр проценти 6,1-рэ.

Тыкъэзыуцухьэрэ дунаир Мыекъуапэ къызэрэщагъэгъунэрэм процент 65-рэ егъэразэ, нэмыкI къалэхэр пштэмэ, гурытымкIэ ар зэрэхъурэр процент 27,3-рэ ныIэп.

Урысыем ит къэлэшхо 218-мэ, къэлэ шъхьаIитIур ахэмытэу, лъэныкъо 350-рэ фэдизхэмкIэ ушэтынхэр ащашIыгъэх. Хабзэр, бизнесыр ыкIи къэлэдэс къызэрыкIохэр ары зэIухыгъэ къэбарэу агъэфедагъэхэр.