Адыгэкъалэ иадминистрацие электроннэ шIыкIэм тетэу зэIухыгъэ зэнэкъокъухэр зэхищагъэх, ахэр зыфэгъэхьыгъэхэр къа­лэм ифэбэрыкIуапIэхэр гъэцэкIэжьыгъэнхэр ары.

IофшIэнхэм атефэщт егъэжьэпIэ уасэу къатыгъэр сомэ миллион 276-рэ. Зэнэкъокъум текIоныгъэ къыщыдэзыхыгъэ компаниер Краснодар щэлажьэ, гъэцэкIэжьын IофшIэнхэр ащ ыпшъэ дэкIыщтых.

— Зэнэкъокъоу зигугъу къэтшIыгъэр мы илъэсым ижъоныгъокIэ мазэ рагъэкIокIыгъагъ, ащ компаниитIу хэлэжьэгъагъ. Шапхъэу афагъэнэфэгъагъэхэм адиштэу къыхахыгъэр Краснодар щылэжьэрэ компаниер ары, — къыщыхагъэщыгъ монополием пэшIуекIогъэнымкIэ федеральнэ къулыкъум и Гъэ­IорышIапIэу Адыгэ Республикэм щыIэм ипресс-къулыкъу.

Мы Iофым зэрар къыфихьы шIоигъоу Адыгэкъалэ щыщ предпринимателэу зэнэкъокъум хэмылэжьагъэм тхьаусыхэ тхылъ Урысыем и УФАС фитхыгъагъ. Шапхъэу агъэнэфагъэхэр ащ шIотэрэзыгъэхэп ыкIи зэнэкъокъум хэлажьэхэрэм афэгъэхьыгъэ къэбарыри икъоу къэмытыгъэу ылъытэгъагъ.

— Монополием пэшIуекIогъэнымкIэ федеральнэ къулыкъум и ГъэIорышIапIэу Адыгэ Республикэм щыIэм зэнэкъокъум изэхэщакIомэ ядокументацие ыуплъэ­кIугъ. Тхьаусыхэ тхылъэу къатыгъэм шъыпкъагъэ хэмылъэу комиссием ылъы­тагъ. Зэзэгъыныгъэм бгъухэр кIэтхэнхэ ыкIи зэдэлэжьэнхэ фитых, — къыщаIуагъ монополием пэшIуекIогъэнымкIэ къулыкъум. 2024-рэ илъэсым ыкIэхэм анэс фэбэрыкIуапIэхэр зэкIэ Адыгэкъалэ щагъэ­цэкIэжьынхэу рахъухьэ.