Уахътэм диштэрэ гъэсэныгъэр
Гъэсэныгъэм епхыгъэ инфраструктурэу джырэ уахътэм диштэрэр шIыгъэным фэгъэхьыгъэ Iофтхьэбзэ инхэр Адыгеим щэкIох.
Лъэпкъ проектэу «Гъэсэныгъ» зыфиIорэм тегъэпсыхьагъэу кIэу еджэпIи 5 джырэкIэ республикэм щашIы: зыр – Мыекъуапэ (нэбгырэ 1100-м тегъэпсыхьагъ), 4-р – Тэхъутэмыкъое районым (псэупIэу Яблоновскэм нэбгырэ 1100-м тегъэпсыхьагъэу еджэпIи 2 къыдэтэджэщт, къуаджэу АдыгеякIэм нэбгырэ 1100-м телъытагъэу зы, Бжыхьэкъоежъым кIэлэеджэкIо 250-рэ зычIэфэщт зы еджапIэ ащашIы). Ащ нэмыкIэу къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм тетэу Мыекъопэ районым нэбгырэ 250-м телъытэгъэ еджапIэ щашIы.
Адыгеим и ЛIышъхьэу КъумпIыл Мурат Тэхъутэмыкъое районым зыщэIэм къуаджэу АдыгеякIэмрэ псэупIэу Яблоновскэмрэ ащашIырэ еджапIэхэр зэригъэлъэгъугъэх.
Мы Iофтхьабзэм хэлэжьагъэх Адыгэ Республикэм иминистрэхэм я Кабинет и Тхьаматэу КIэрэщэ Анзаур, гъэсэныгъэмрэ шIэныгъэмрэкIэ министрэм ипшъэрылъхэр зыгъэцакIэу Евгений Лебедевыр, Тэхъутэмыкъое районым ипащэу Шъэо Аскэр, подряднэ организациехэмрэ предприятиехэмрэ яIэшъхьэтетхэр.
Къуаджэу АдыгеякIэм зыщэIэм, республикэм и ЛIышъхьэ урамэу Бжъэдыгъум щагъэпсырэ еджапIэу нэбгырэ 1100-м телъытагъэм Iофхэр зэрэщыкIэкIыхэрэм нэIуасэ зыфишIыгъ. Мыщ сомэ миллиард 1,3-м ехъу пэIухьащт. Подрядчикэу «Полюс» зыфиIорэм 2023-рэ илъэсым тыгъэгъазэм ехъулIэу псэуалъэр атынэу къыгъэгугъагъэх. НепэкIэ унэм ыпкъ хьазыр, ышъхьи тыралъхьэгъах. Апчхэр халъхьагъэх, инженер коммуникациехэр агъэпсых, джащ фэдэу унэм къыпэIулъ чIыпIэр гъэкIэрэкIэгъэнымкIэ IофшIэн гъэнэфагъэхэр зэшIуахых.
КъумпIыл Мурат районымрэ подряднэ организациехэмрэ япащэхэм гущыIэгъу зафэхъум къыхигъэщыгъ IофшIэнхэр игъом ыкIи дэгъоу зэшIохыгъэнхэм мэхьанэшхо зэриIэр. Анахьэу анаIэ зытырагъэтын фаехэм ащыщых инженер коммуникациехэм япхыгъэ Iофыгъохэр. Муниципалитетым шъхьафэу пшъэрылъ фишIыгъ еджапIэхэм апае Iэмэ-псымэхэм ящэфын, чIыпIэм изэтегъэпсыхьан ыкIи къэгъагъэхэмрэ чъыгхэмрэ гъэтIысхьэгъэнхэм япхыгъэ Iофтхьабзэхэр зэшIохыгъэнхэу.
«ЕджэпIакIэхэм яшIынкIэ зэхэубытэгъэ Iофтхьабзэу къыдэлъытэгъэн фаехэр зэкIэ игъом ыкIи дэгъоу зэшIохыгъэнхэм тынаIэ тедгъэтын фае. ПсэолъэшI-монтаж IофшIэнхэр тэрэзэу гъэцэкIагъэ хъунхэм, джырэ уахътэм диштэрэ Iэмэ-псымакIэхэр ачIэгъэуцогъэнхэм къапкъырыкIыхэзэ, мы Iофхэм афэгъэзэгъэ пстэуми аIэ зэкIэдзагъэу япшъэрылъхэр агъэцэкIэнхэм амалэу яIэр рахьылIэн фае. Ащ дакIоу пшъэрылъэу яIэхэр шIуагъэ къытэу зэшIозыхын зылъэкIыщт кIэлэегъаджэхэр еджапIэхэм аIутынхэми мэхьанэшхо иI», — къыIуагъ КъумпIыл Мурат.
Республикэм и ЛIышъхьэ хэушъхьафыкIыгъэу къулыкъухэм ыкIи псэолъэшIыным фэгъэзэгъэ пащэхэм анаIэ тыраригъэдзагъ лъэсгъогухэр, унэхэм якIолIэрэ гъогухэр, общественнэ транспортыр къызщыуцурэ чIыпIэхэр зэрищыкIагъэм тетэу зэтегъэпсыхьэгъэнхэмкIэ къэуцурэ Iофыгъохэм икъоу анаIэ атырагъэтын зэрэфаем.
А мэфэ дэдэм КъумпIыл Мурат Инэм щагъэпсырэ IэзапIэр зэригъэлъэгъугъ. Псауныгъэм икъэухъумэнкIэ республикэ программэу щыIэм диштэу IофшIэнхэр агъэцакIэх. Квадрат метрэ мини 5,1-рэ фэдиз зыубытырэ псэуалъэм сомэ миллион 380-м ехъу пэIухьащт. Зы мафэм нэбгырэ 450-мэ яфэIо-фашIэхэр мыщ щы-зэшIуахынхэ алъэкIыщт. 2024-рэ илъэсым ыкIэм ехъулIэу псэуалъэр атынэу мэгугъэх.
Районым ыкIи подряднэ организациехэм япащэхэм республикэм и ЛIышъхьэ гущыIэгъу зафэхъум къызэрэхигъэщыгъэмкIэ, псауныгъэм икъэухъумэнкIэ псэуалъэу ашIыхэрэм Адыгеим апшъэрэ мэхьанэ щараты. Джырэ уахътэм диштэрэ, дэгъоу зэтегъэпсыхьэгъэ, нэбгырэ пчъагъэу щылэжьэн фаер зыщикъурэ IэзапIэхэр ары цIыфхэм игъом ыкIи икъоу медицинэ IэпыIэгъу защаратын алъэкIыщтхэр.
АР-м и ЛIышъхьэ ипресс-къулыкъу
Сурэтхэр: А. Гусев.