Лъэпкъ зыкIыныгъэм и Мафэ ипэгъокIэу Москва Урысыем щы­псэурэ лъэпкъхэм я Ассамблее изэфэс щыкIуагъ.

ШIушIэгъэ ин зиIэхэу, этнокультурэм ихэгъэхъонкIэ ыкIи лъэпкъхэм языкIыныгъэ игъэпы­тэнкIэ къахэщыгъэхэр, я IV-рэ Всероссийскэ общественнэ шIухьафтынэу «Гордость нации» зыфиIорэм текIоныгъэр къыщыдэзыхыгъэхэр ащ щагъэшIуа­гъэх.

Премием кIэщакIо фэхъу­гъэх Урысыем щыпсэурэ лъэпкъхэм я Ассамблее, ­лъэпкъ зэфыщытыкIэхэмкIэ Советэу УФ-м и Президент дэжь щызэ­хэ­щагъэр, Къэралыгъо Думэм лъэпкъ IофыгъохэмкIэ и Комитет, УФ-м и Общественнэ пала­тэ, УФ-м и Правительствэ, гъэсэныгъэмрэ шIэныгъэмрэкIэ, культу­рэмкIэ УФ-м иминистерствэхэр. Къэра­лыгъо шIухьафтын лъапIэу «Гор­дость нации-2023» зыфи­Iорэр зыфагъэшъошагъэхэм ар ариты­жьыгъ Общероссийскэ об­­щест­веннэ-къэралыгъо Ассамблеем ипащэу В. А. Василь­евым.

Лъэныкъоу «За вклад в обеспечение гражданского единства и межнационального согласия» зыфиIорэмкIэ щате­кIуагъ, лауреат хъугъэ, апэрэ шъуашэр зиIэ Дипломыр ыкIи статуэткэу «Гордость нации-­2023» зыфиIорэмрэ къыфагъэшъошагъэх лъытэныгъэшхо зы­фэтшIырэ титхэкIо цIэрыIоу Мэщ­бэшIэ Исхьакъ.

МэщбэшIэ Исхьакъ илъэс 70-м къыкIоцI итворческэ гу­пшысэ лъагэкIэ, иемызэщыжь творческэ IофшIэкIэ дэгъукIэ щытхъуцIэ иныбэ къылэжьыгъ. Мы мафэхэм къыратыгъэ шIу­хьафтынэу «Гордость нации» зыфиIорэр Хэгъэгум, иреспуб­ликэ, илъэпкъ мамырныгъэ-тынчыныгъэ арылъэу псэунхэмкIэ Iофышхоу ылэжьыгъэм ыкIи ылэжьырэм къакIэкIуагъ.

МэщбэшIэ Исхьакъ — тхэкIо ин, гупшысэкIошху, губзыгъ. Мы зэкIэмэ ялъытыгъэу Адыгэ Рес­публикэм и ЛIышъхьэу КъумпIыл Мурат адыгэ лъэпкъыр зыгъэлъапIэу, ащ ыцIэ рязыгъаIоу ыкIи зыIэтэу, шIур сыдигъуи зылэжьырэм мыщ фэдэ гущы­IэхэмкIэ фэгушIуагъ:

«Адыгеим, Къэрэщэе-Щэр­джэсым, Къэбэртэе-Бэлъкъарым ялъэпкъ тхакIоу, УФ-м Iоф­шIэнымкIэ и ЛIыхъужъэу МэщбэшIэ Исхьакъ зэфэдэкIэ гушхоныгъэр къытхэзылъхьэу, тызыгъэгъуазэу, тилъэпкъ, тиреспубликэ ацIэ дахэкIэ рязыгъаIоу, зэкIэ ти Хэгъэгу ыкIи тилъэпкъ зыIэтырэх.

МэщбэшIэ Исхьакъ творческэ интеллигенцие купышIум щыщ, УФ-м икультурэ иIахьышхо хэлъ. Ащ ищыIэныгъэ зэрэщытэу Iоф­шIэкIэшIум ищысэ ин, угукIэ уикIэ­сэ сэнэхьатым шъыпкъагъэ фыуиIэн зэрэфаем ишыхьат. Тхьэм зэчый гъэшIэгъон къызэритыгъ ыкIи илитературнэ творчествэкIэ, иобщественнэ IофшIэкIэ чаныгъэ- кIэ иадыгэ хэгъэгу, иадыгэ лъэпкъ, пстэуми зэдытие Хэгъэгу­шхоу Урысыер къегъэ­гъунэх, къеухъу­мэх; уасэ зыфашIырэ, шъхьэ­кIафэ зэрахырэ гъэсагъ. Сыгу къыздеIэу къэралыгъо тын лъапIэмкIэ сыфэгушIо Шумафэ ыкъо Исхьакъ, псауныгъэ пытэкIэ, творческэ гухахъокIэ, гъэшIэ гупсэф дахэкIэ сыфэлъаIо».

Шiухьафтын лъапIэмкIэ И. МэщбашIэм къыфэгушIуагъ Къэбэртэе-Бэлъкъар Республи­кэм и ЛIышъхьэу КiокIо Казбек, гум къикIырэ гущыIэ фабэхэр зэрыт тхылъыр къыритыгъ.

ШIухьафтын лъапIэр къызфагъэшъошэгъэ МэщбэшIэ Исхьакъ лъэпкъ гъэзетэу «Адыгэ ма­къэм» ыцIэкIэ тыфэгушIуагъ ыкIи зы упчIэкIэ зыфэдгъэзагъ:

— Къэралыгъо шIухьафтын зэфэшъхьафыбэ къыпфагъэшъо­шагъэх. Джы мы мэфэкI ма­фэхэм ти Хэгъэгушхо, Москва щыкIогъэ мэфэкIым премиеу «Гордость нации» зыфиIорэм илауреат ущыхъугъ. Уежагъа мыщ фэдэ гушIуагъом, сыд угукIэ зэхэпшIагъэр?

— Сэ сыкъызыхъугъэм щегъэжьагъэу еджэныр ыкIи Iоф­шIэныр сикIасэу сыкъэтэджыгъ. СикIэлэгъум къыщыублагъэу слъэкIыщтымкIэ къогъанэ симыIэу сыкъырыкIуагъ. Си Хэ­гъэгу сыригъэджагъ, сифэпагъ, цIыфы сишIыгъ, джы сэ сфэ­лъэкIырэр ежь, Хэгъэгум, фэсэшIэжьы. Сыфай Iофэу цIыфыр зыIэтырэр тегугъоу тшIэным, сыфай мамырныгъэр чIышъхьа­шъом ренэу телъыным, цIыф лъэпкъхэр зэгурыIонхэм, зэде­Iэнхэм, цыхьэ зэфашIэу зэдыщыIэнхэм, ер мы чIыналъэм щыгъэкIодыгъэным. Сежагъэп ыкIи сежэрэп шIухьафтын, ау сфэлъэкIыфэ шIур сыухъумэщт.сIотэщт.

«ЛIыгъэр зэрашырэр шIу­шIагъ» еIо гущыIэжъым. Шъыпкъэгъэ-зэфагъэ хэлъэу уигъогу щыIэныгъэм щыпхырыпщыныр, уилъэпкъ, Хэгъэгум, уиреспуб­ликэ ыкIи зэкIэ къыошIэкIыгъэ пстэумэ уагурыIоныр, уафэгу­пшысэныр — насыпыгъ. «Семы­жагъэми, сигуапэ хъугъэ сы­зэрэхагъэунэфыкIыгъэр, пстэуми апэу къысфэгушIуагъэх Къыблэ федеральнэ шъолъырым ипащэу В. В. Устиновыр, Адыгеим и ЛIышъхьэу КъумпIыл Мурат, Къэбэртэе-Бэлъкъар Рес­публикэм и ЛIышъхьэу КIокIо Казбек. «Тхьашъуегъэпсэу!»

Мамырыкъо Нуриет.