Урысые слетым хэлажьэх
ДронхэмкIэ цIыфхэр къэгъотыжьыгъэнхэм епхыгъэ Урысые студенческэ слетэу «Къамыгъотыжьырэ къэнэщтэп» зыцIэу къалэу Тамбов щыкIорэм тикъэралыгъо ишъолъыр 15-мэ ащеджэрэ студен- ти 130-рэ хэлажьэ. Адыгеим ыцIэкIэ а Iофтхьабзэм рагъэблэ-гъагъэх Мыекъопэ къэралыгъо технологическэ университетым истудентхэу шъолъыр зэнэкъокъум щыпхырыкIыгъэхэр.
[caption id="attachment_141089" align="aligncenter" width="800"] Сурэтыр: МКъТУ.[/caption]
Пилот зэрымыс авиацием итехнологиехэр зэзыгъашIэхэ-рэр слетым зэрипхыгъэх, нэIуасэ зэфишIыгъэх, ахэм япшъэрылъыр зы — цIыфэу кIодыгъэхэр къэгъотыжьыгъэнхэр ары. Мэфищым къыкIоцI ахэм слетым ипрограммэ агъэцэкIэщт: аэрофототехыным итехнологиехэр къызфагъэфедэхэзэ чIыпIэ зэблэкIхэм язытет зэрагъэшIэщт, онлайн режимым тетэу нейроннэ зэпхыныгъэм дэлэжьэщтых, БПЛА-м къытырэ къэбарыр зэфахьысыжьыщт.
Пилот зэрымыс быбырэ аппаратхэр дэгъоу агъэIорышIэшъунхэм студентхэр къыфащэх, ащ пае мастер-классхэмкIэ, квестхэмкIэ, лъэтегъэуцохэмкIэ программэр баеу щыт. Тамбов иуашъо БПЛА-р щыбыбынхэмкIэ фитыныгъэ зэрэщыIэми ишIуагъэ къэкIо. Апэрэ медицинэ IэпыIэгъу зищыкIагъэм зэребгъэкIыщт шIыкIэри слетым щызэрагъашIэ.
«ЛизаАлерт» зыцIэ лъыхъокIо-къэгъэнэжьэкIо отрядым игъусэхэу цIыфэу кIодыхэрэм алъыхъунхэ зылъэкIыщтхэм, дронхэр зыгъэIорышIэшъущтхэм ясообществэ Урысыем иапшъэрэ еджапIэхэм ащызэхэщэгъэным мы Iофтхьабзэр джащ фэдэу фэIорышIэ. НыбжьыкIэ IофхэмкIэ Федеральнэ агентствэм игрантовэ IэпыIэгъу къызфагъэфедэзэ проектыр агъэцакIэ.
Чъэпыогъу мазэм икъихьэгъухэм адэжь «Къамыгъотыжьырэ къэнэщтэп» зыцIэ Урысые зэнэкъокъум Мыекъопэ къэралыгъо технологическэ университетым истудентхэр хэлэжьагъэх. Пилот зэрымыс аппаратмэ ясимуляторхэр яIэпыIэгъухэу студентхэр зыхэхьэгъэхэ командэм зиушэтыгъагъ. Анахь дэгъоу ащ къыщыхагъэщыгъагъэх Альберт Моревыр, Екатерина Кареевар ыкIи Ярослав Синяевыр, ахэр ары джы Тамбов щыкIорэ слетым хэлажьэхэрэр. Мыхэм ягъус якIэлэегъаджэу Дмитрий Скачковыр.