Урысые фестивалэу «DagGym-2023» зыфиIорэр къалэу Каспийскэ щыкIуагъ. Мыекъуапэ ихудожественнэ гимнасткэхэр ащ чанэу хэлэжьагъэх, гъэхъэгъэшIухэр ашIыгъэх.

Урысыем ишъолъыр 12-мэ къарыкIыгъэ спортсмен 600-м ехъу Iоф­тхьабзэм хэлэжьагъ. Тикъэралыгъо щызэлъашIэрэ усакIоу Расул Гам­затовыр къызыхъугъэр илъэсишъэ зэрэхъугъэм ар фэгъэхьыгъагъ.

Купхэм язэнэкъокъу текIоныгъэр къыщыдахыгъ Къош Аминэ, Маргарита Чаликиди, София Быковам, Алевтина Мороз, Еутых Софие ыкIи Аксинья Бархович. СпортымкIэ мастерхэм япрограммэ Адыгеим я 5-рэ чIыпIэр щиубытыгъ. Джащ фэдэу унэе зэнэкъокъу­хэм щатекIуагъэх Милена Капковар ыкIи 2012-рэ илъэсым къэхъугъэ пшъашъэхэу Еутых Софиерэ Маргарита Чаликидирэ. Ащ нэмыкIэу тиспортсменкэхэм хагъэунэфыкIырэ чIыпIиплI къафагъэшъо­шагъ. Спорт еджапIэу В.С. Максимовым ыцIэ зыхьырэм типшъашъэхэм зыщагъасэ.