АР-м гъогухэр щынэгъончъэнхэмкIэ и Комиссие зэхэсыгъоу тыгъуасэ иIагъэм гъогухэм авариехэр къызэращыхъухэрэм, федеральнэ гъогухэм цIыфхэмрэ хьылъэхэмрэ ащызезыщэрэ транспортхэр зэрауплъэкIухэрэм, гъогу хъызмэтым кIымафэм зызэрэфигъэхьазырырэм, мэшIоку гъогухэм яекIолIапIэхэр зэрагъэцэкIэжьыхэрэм ыкIи нэмыкI Iофыгъохэм щатегущыIагъэх.

[caption id="attachment_140946" align="aligncenter" width="800"] Сурэтыр: А. Гусев.[/caption]

Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м иминистрэхэм я Кабинет и Тхьаматэу КIэрэщэ Анзаур зэхэсыгъор зэрищагъ. АР-м и Къэралыгъо Совет —Хасэм и Тхьаматэу Владимир Нарожнэр, прокуратурэм, хэгъэгу кIоцI IофхэмкIэ Министерствэм, Ространснадзорым Къыб­лэ федеральнэ шъолъырымкIэ иотдел, Адыгеяавтодорым, муниципальнэ образованиехэм япащэхэр Комиссием иIофшIэн хэлэжьагъэх.

Къэралыгъо автоинспекцием къызэритыгъэмкIэ, мэзи 9-м республикэм игъогухэм тхьамыкIэгъо 317-рэ атехъу­хьагъ. Нэбгырэ 53-рэ ахэм ахэкIодагъ, нэбгырэ 388-мэ шъобжхэр атещагъэ хъугъэ. Мыекъуапэ, Адыгэкъалэ, Шэу­джэн, Красногвардейскэ районхэр ары нахьыбэу авариехэр къызщыхъугъэхэр. ТхьамыкIагъохэм языщанэр транзитнэ водительхэр ары зыпкъ къикIыгъэр. ЛъэсрыкIохэм гъогур зэрарамытырэм, чIыпIэ мыгъэнэфагъэхэм цIыфхэр ащызэпырыкIынхэу зэрэфежьэхэрэм ыкIи нэмыкIхэм тхьамыкIагъохэр къызыдахьых.

Адыгэкъалэрэ Шэуджэн районымрэ гъогурыкIонымкIэ шапхъэхэр зэращагъэ­цакIэхэрэм епхыгъэ Iофыгъом шъхьафэу зэхэсыгъом щыхэплъагъэх. Зигугъу къэтшIыгъэ муниципалитетхэм ягъогу­хэм тхьамыкIэгъуабэ къащэхъу.

АР-м иминистрэхэм я Кабинет и Тхьаматэ къулыкъу гъэнэфагъэхэм пшъэ­рылъ афишIыгъ гъогухэм тхьамыкIа­— гъо­хэр къатемыхъухьанхэм фэшI зэдэлэжьэныгъэу зэдыряIэр нахь агъэлъэшынэу.

«Гъогухэр щынэгъончъэнхэмкIэ амалэу щыIэхэр зэкIэ зехьэгъэн фаеу республикэм и ЛIышъхьэ пшъэрылъ къыгъэуцугъ. Ащ хэхьэх видеокамерэхэм тэрэзэу Iоф ашIэныр, щынагъоу щыт гъогу Iахьхэм остыгъэхэр, гъогу тамыгъэхэр ащыгъэуцугъэнхэр ыкIи нэмыкIхэр. КIэлэцIыкIу­хэр гъогухэм ащымыфыкъонхэм лъэшэу тынаIэ тедгъэтын фае», — къыIуагъ КIэрэщэ Анзаур.

ГъогурыкIонымкIэ, цIыфхэмрэ хьылъэ­хэмрэ язещэнкIэ шапхъэхэр амыукъонхэм япхыгъэ Iофыгъохэми зэхэсыгъом щахэплъагъэх. Ространснадзорым Къыблэ федеральнэ шъолъырымкIэ иотдел къызэритыгъэмкIэ, хьылъэхэмрэ цIыф­хэм­рэ зезыщэрэ трнанспорт мини 3,7-м ехъу ауплъэкIугъ. Транспортым епхыгъэ хэбзэгъэуцугъэр гъогогъу мини 2-м ехъурэр аукъуагъэу къыхагъэщыгъ.

Адыгеяавтодорым ипащэхэмрэ Мые­къуапэ имэриерэ гъогу хъызмэтыр кIымэфэ лъэхъаным зэрэфэхьазырым фэгъэхьыгъэу зэхэсыгъом къыщаIотагъ. Автогрейдерэу, тракторэу, экскаваторэу, погрузчикэу 109-рэ зэрэщыIэр Iофтхьабзэм къыщыхагъэщыгъ. Ахэм ащыщэу 59-р Iоф ашIэным фэхьазыр. Гъогухэр цIэнлъагъо зыхъукIэ атыратэкъощт пшэхъо зэхэлъэу ящыкIагъэм фэдизыр агъэхьазырыгъах.

МэшIоку гъогухэм яекIолIапIэхэр зэра­гъэ­цэкIэжьыхэрэм ыкIи зэрагъэкIэ­жьы­хэрэм атегущыIэхэ зэхъум, мэшIоку­гъогу зэпырыкIыпIэ 15 республикэм зэриIэр къыхагъэщыгъ. 2019-рэ илъэсым къыщегъэжьагъэу 2022-рэ илъэсым нэс Тэхъутэмыкъое районым имэшIокугъогу зэпырыкIыпIэхэм яекIолIэпIи 2, Мыекъо­пэ районым – 5, Джэджэ районым – 1 агъэцэкIэжьыгъ. Адрэ гъогу зэпырыкIыпIэхэр шапхъэхэм адештэх.

Зэхэсыгъом хэлэжьагъэхэр мэшIокугъогу зэпырыкIыпIэхэр джырэ уахътэм диштэу зэтегъэпсыхьажьыгъэнхэ зэрэфаем, электросамокатхэр зэрагъэфедэ­хэрэм, зыныбжь имыкъугъэхэр рулым Iусхэ зэрэмыхъущтым, водительхэр автошколхэм зэращагъэхьазырхэрэм япхыгъэ Iофыгъохэми ахэплъагъэх.

АР-м иминистрэхэм я Кабинет ипащэ Комиссием иунашъохэр игъом гъэцэкIэгъэнхэм, гъогухэм нахь макIэу тхьамыкIагъохэр атехъухьанхэм пае къулыкъу­хэм язэдэлэжьэныгъэ агъэлъэшыным мэхьанэшхо зэриIэр шъхьафэу къыхигъэщыгъ. Зэхэсыгъом икIэух АР-м и ЛIышъхьэ республикэ щынэгъончъагъэм иIофыгъохэмкIэ и ГъэIорышIапIэ ипащэ 2024-рэ илъэсым Комиссием зэхэсыг­ъоу иIэщтхэм яплан къахилъхьагъ.

АР-м и ЛIышъхьэ ипресс-къулыкъу