Урысые форумэу «Ящэнэрэ урысые народнэ Соборыр» зыфиIорэм Iэнэ хъураеу Мыекъуапэ щызэхищагъэр щыкIуагъ АР-м и Лъэпкъ музей. Ар зыфэгъэхьыгъагъэр къэралыгъохэм азыфагу илъ зэфыщытыкIэхэр ыкIи патриотическэ зэкъоуцоныгъэр гъэпытэгъэнхэмкIэ народнэ дипломатиер хэкIыпIэу зэрэщытыр ары.

Iэнэ хъураем кIэщакIо фэхъугъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалэмкIэ и Комитет, Урысые общественнэ движениехэу «Урысые Собор», «Народнэ Собор» зыфиIохэрэр, Урысыем ыкIи Евразием бэшIагъэу ащыпсэурэ лъэпкъхэм янахьыжъхэр, общественнэ движениеу «Адыгеим инахьыжъхэр» «Дунэе адыгэ (черкес) народнэ дипломатием игупч», нэмыкIхэри.

Iофтхьабзэм хэлэжьагъэх Урысыем ис лъэпкъ зэфэшъхьафхэм, джащ фэдэу Азербайджан, Армением янахьыжъхэм я Совет илIыкIохэр.

Зэхэсыгъор къызэIуихыгъ ыкIи зэрищагъ общественнэ движениеу «Адыгеим инахьыжъхэр» зыфиIорэм ипащэу Аджыгырые Аскэрбый.

БРИКС-м (къэралыгъуитф зыхэхьэрэ союз) иэкспертхэм я Президентэу, Уры­сые общественнэ движениеу «Урысые Собор» зыфиIорэм и Тхьаматэу, Урысыем ыкIи Евразием бэшIагъэу ащыпсэурэ лъэпкъхэм янахьыжъхэм я Вице-президентэу Михаил Кривоносовым къызэриIуагъэмкIэ, мы Iофтхьабзэм изэхэщэнкIэ пшъэрылъэу яIэр цIыфхэр мамырэу ыкIи зэгурыIоу зэдэпсэунхэм къыфэджэгъэныр ары.

— Мы мафэхэм тыдэкIи щыбырсыр, хэушъхьафыкIыгъэ дзэ операциер Украинэм щэкIо, Израиль, Палестинэ ащырэхьатэп. ЛъэпкъхэмкIэ ар тхьамыкIэгъошху. Мамыр цIыфхэр, анахьэу сабыйхэр, хэкIуадэх. ТызкIызэрэугъоигъэр Иван Грознэм Iофышхоу зэрихьагъэм уасэ фэтшIыныр ары. Урыс ыкIи кавказ лъэпкъхэр ащ зэрипхыхи, Урысые къэралыгъом игъунапкъэхэр къыгъэнэфагъэх. Кавказ ыкIи урыс лъэпкъхэм мамырныгъэ азыфагу илъэу псэунхэм фэIорышIагъ. Мурадэу тиIэр Иван Грознэмрэ Темрыкъо Мариерэ Мыекъуа­пэ саугъэт къащыфызэIухыгъэныр ары. Заор зэрэтхьамыкIагъом, шIу узэрэлъэ­гъун зэрэфаем ятамыгъэу саугъэтыр щытыщт. БРИКС-м хэхьэрэ къэралыгъо­хэм ядунэееплъыкIэхэм адетэгъаштэ. Ащ экспертэу Iоф щысэшIэ, ащ хэт къэралыгъохэр зэпэблагъэ хъунхэм иIофыгъохэм сапылъ. Мы форумым изэфэхьысыжьхэр, резолюциеу тшта­гъэр шэкIогъум ыкIэхэм щыIэщт Дунэе урысые Соборым изэIукIэ етхьылIэжьыщтых, — къыIуагъ М. Кривоносовым.

— Мыщ тыкъэкIоным ыпэкIэ Урысыем ыкIи Евразием бэшIагъэу ащыпсэурэ лъэпкъхэм янахьыжъхэм я Конгрессэу Москва щыкIуагъэм тыхэлэ­жьагъ. Ащ Урысыем ис лъэпкъхэм ялIыкIохэм тыщызэIукIагъэх. Тикъэралыгъо ис цIыф лъэпкъхэм, ащ ныбджэгъоу иIэхэм тызэрэзэкъотын, тызэрэ­Iыгъы­жьын ыкIи мамырныгъэ щыIакIэм тыфэбэнэн зэрэфаем тырыгущыIагъ. Тызэрэубытыжьы­нэу, тизэфыщытыкIэхэр нахьышIу зэрэтшIыщтым Iоф дэтшIэнэу ары мурадэу тиIэр, — къыIуагъ Тверскэ хэкум щыпсэурэ адыгэхэм (черкесхэм) язэфэс итхьаматэу ДышъэкI Вячеслав.

Iофтхьабзэм хэлэжьагъэхэм зэкIэми зэдырагъаштэу къаIуагъэр зы — мамыр­ныгъэ щыIакIэм тыфэбэнэныр, лъэпкъ зыкIыныгъэ тиIэныр зэкIэми типшъэ­рылъ.

КIАРЭ Фатим. Сурэтыр: А. Iэшъын.