Зэнэкъокъоу «ЛIыхъужъхэм яшIэжь фэшъыпкъэх!» зыфиIорэм Адыгеим щыпсэухэрэр хэлэжьэнхэ алъэкIыщт.

Творческэ IофшIэнхэм яапэрэ Урысые зэнэкъокъу зэрэрагъэжьагъэр Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ къыщаIуагъ.

ХэушъхьафыкIыгъэ дзэ операцием ихъугъэ-шIагъэхэм, ЛIыхъужъхэм ыкIи Донбассрэ Новороссиемрэ яухъумакIохэм ар афэгъэхьыгъ.

Зэнэкъокъум хэлажьэхэрэм ащыщ Юнармием хэт Никита Комнатнэр.

— Сэ сшынахьыжъ хэушъхьафыкIыгъэ дзэ операцием апэрэ мафэхэм къащегъэжьагъэу хэт. Ащ пае сэри мы зэнэкъокъум сыхэлэжьэнэу исхъухьагъ. АщкIэ сшынахьыжъи, Хэгъэгур къэзыухъумэрэ нэмыкI лIы­хъужъхэми тызэракъотыр, зэрадедгъаштэрэр ядгъэшIэщт, — къыIуагъ Никитэ.

Урысые зэнэкъокъур едзыгъохэмкIэ зэтеутыгъ: рассказхэр, усэхэр, орэдхэр, сурэттехыгъэхэр.

Илъэс 14 зыныбжьхэм къащегъэжьагъэу Урысые Федерацием щыпсэухэрэр зэкIэ зэнэкъокъум хэлэжьэнхэ амал яI.

Заявкэхэр шэкIогъум и 5-м нэс мы электроннэ адресымкIэ агъэхьынхэ алъэкIыщт: konkurs@gosfondveteranov.gov.ru.

Тыгъэгъазэм зэнэкъокъум зэфэхьысыжьхэр фашIыщт.