Урысыем и Суперлигэ щешIэрэ «АГУ-Адыи­фым» мы мафэхэм зичэзыу ешIэгъу Мые­къуапэ щыриIагъ.

Командэу «Звезда» зыфиIорэм IукIагъ, кIэухым къызэригъэлъэгъуагъэмкIэ, хьакIэхэр хэпшIыкIэу нахь лъэшыгъэх.

«АГУ-Адыиф» (Мыекъуапэ) — «Звезда» (Звенигород) — 21:32.

Тикомандэ хэтхэу Iэгуаор къэ­лапчъэм дэзыдзагъэхэр:

Дворцеваяр — 4, Болоба — 3, Голуновар — 3, Краснокутскаяр — 2, Бондаренкэр — 2, Алексеевар — 2, Селиверстовар, Томилинар, Коваленкэр, Кавера, Баскаковар — 1.

«АГУ-Адыифым» Мыекъуапэ щыриIэгъэ ешIэгъур аужырэу зышIуахьыгъэр Iоныгъом и 17-р ары, ащыгъум «ЦСКА-р» нахь лъэшыгъ. Мы илъэсым «Звездам» ешIакIэу къыгъэлъагъорэм уигъэ­рэзэнэу щытэп, ауж къинэрэ командэхэм ащыщ. ЗэIукIэгъуи 9-м щыщэу 2-р ары ныIэп текIоныгъэр къызщыдихыгъэр. Арэу щытми, мызыгъэгум хьакIэхэр узIэпищэу, дахэу ешIагъэх. Ухъу­макIохэм ыкIи къэлэпчъэIутэу Серафима Тихановам яшIуагъэкIэ Мыекъуапэ икомандэ иешIэ-

кIо анахь лъэшэу Алиса Дворцеваям тызэресагъэу зыкъыгъэ­лъэгъон ылъэкIыгъэп. Джащ фэдэу тигандболисткэхэм агъэцэкIэгъэ пенальти 8-м щыщэу 5-р дадзэшъугъэп, «Звездам» икъэлэп­чъэIутхэм дэгъу дэдэу ар къа­дэхъугъ.

ЯтIонэрэ таймым «АГУ-Адыифым» итренер шъхьаIэу Наталья Дерепаскэм зэхъокIыныгъэхэр ышIыгъэх, ау ащ ишIуагъэ къэкIуа­гъэп, сыда пIомэ апэрэ таймым щегъэжьагъэу тигандболисткэхэм хэукъоныгъабэ ашIыгъ.

Мы зэукIэгъум ыуж Адыгеим икомандэ я 7-рэ чIыпIэр еубыты. Джы пэрытныгъэ зыIыгъ «Рос­тов-Доным» ыкIи «ЦСКА-м» аде­шIэнэу къыпыщылъ. Ахэм ешIэгъу пшIырыпшI яIагъ, тIуми зырыз ашIуахьыгъ.

ШэкIогъум и 8-м «АГУ-Адыифыр» Мыекъуапэ щыIукIэщт «Кубань» (Краснодар).