Кощхьэблэ районым ит псэупIэу Дружбэм врач амбулаторие къыщызэIуахыгъ. Iоф­тхьабзэм хэлэжьагъэх Урысыем псау­ны­гъэм икъэухъумэнкIэ иминистрэу Михаил Мурашко ыкIи Адыгеим и ЛIышъхьэу Къум­пIыл Мурат.

Лъэпкъ проектэу «Псауныгъэм икъэу­хъумэн» зыфиIорэм тегъэпсыхьагъэу медицинэ учреждениехэм ягъэкIэжьын ишъолъыр программэ диштэу псэуа­лъэр ашIыгъ. Федеральнэ ыкIи республикэ бюджетхэм къахэкIыгъэ сомэ миллион 36-рэ а гухэлъхэм апэIуагъэхьагъ. Амбулаторием квадрат метрэ 460-м ехъу еубыты. Медицинэ учреждением пае ящыкIэгъэщт оборудованиер ыкIи псэуалъэхэр къащэфи чIагъэуцогъах.

Мы амбулаторием нэбгырэ 49-мэ зы IофшIэгъу чэзыум яфэIо-фашIэхэр щафагъэцэкIэн алъэкIыщт. ПсэупIи 6-мэ: Дружбэм, Чехрак, Отраднэм, Новоалексеевскэм, Дмитриевскэм, Плодопитомникым адэсхэм яфэIо-фашIэхэр ащ щызэшIуахыщтых. Мы псэупIэхэм пстэумкIи нэбгырэ мини 2,3-рэ фэдиз адэс.

КъызэIуахыгъэ IэзапIэм Iоф щашIэщт терапевтым, педиатрэм, стоматологым, мамыкум ыкIи гурыт медицинэ Iофы­шIэхэм. КъяуалIэхэрэм яфэIо-фашIэхэр зыщагъэцэкIэщтхэ кабинет, мафэрэ зыщяIэзэщтхэ палатэхэр ащ хэтых. Михаил Мурашкорэ КъумпIыл Муратрэ IэзэпIакIэр къаплъыхьагъ, Iоф щызышIэщтхэм ыкIи а чIыпIэхэм ащыпсэухэрэм гущыIэгъу афэ­хъугъэх.

КIэуххэр зэфихьысыжьхэзэ Михаил Мурашко къыхигъэщыгъ мыщ фэдэ медицинэ учреждениякIэхэм ягъэпсынрэ якъызэIухынрэ республикэм екIолIэкIэ гъэнэфагъэ зэрафыриIэр.

«Адыгеим программэм къыдилъытэрэ проектхэр зэкIэ ипIалъэм ыкIи икъоу щагъэцакIэх. Кадрэхэм якъыхэхыни пшъэдэкIыжь ахэлъэу екIуалIэх. Гурыт медицинэ IофышIэхэми, врачхэми мыщ Iоф щашIэщт. Санитарнэ автомобильри анахь мэхьанэ зиIэхэм ащыщ, ари хьазырэу щыт. Сымаджэхэм афэгъэхьыгъэ къэбарыр цифрэ технологиехэмкIэ къызIэкIагъэ­хьаным иамали яI, джащ фэдэу лабораторнэ уплъэкIунхэм якIэуххэри игъом къаIэкIэхьанхэм фытегъэпсыхьэгъэ Iэмэ-псымэр хьазыр. ЦIыфхэмкIэ Iэрыфэгъу зэрэхъуным телъытагъэу Iэзэгъу уцхэри мы IэзапIэм къыIэкIэхьащтых», — къы­Iуагъ УФ-м псауныгъэм икъэу­хъумэнкIэ иминистрэ.

Iофтхьабзэм къыдыхэлъытагъэу хьэкIэ лъапIэхэм мы чIыпIэм ланчъэ лъэпсэдэчъитIу щагъэтIысхьагъ.

Адыгэ Республикэм и ЛIышъхьэ ипресс-къулыкъу

Сурэтхэр: М. Гордышов.