Лъэпкъ проектэу «Культурэм» къыдыхэлъытагъэу къуаджэу Къэбэ­хьаблэ дэт культурэм и Унэ агъэцэкIэжьы, мы илъэсым ыкIэм нэс ар аухынэу агъэнафэ.

Шэуджэн районым культурэмкIэ и ГъэIорышIапIэ ипащэу Къэрэбытэ Айдэмыр къызэрэхигъэщыгъэмкIэ, Адыгеим ит культурэм ипсэуалъэхэр аужырэ илъэсхэм игъэкIотыгъэу зэтырагъэпсыхьажьыгъэх, ащкIэ лъэпкъ проектыр IэпыIэ­гъушхо къафэхъу.

— Къэбэхьаблэ дэт культурэм и Унэ игъэцэкIэжьын сомэ миллион 16,4-м ехъу пэIуагъэ­хьагъ. Ащ къыдыхэлъытагъэу тIысыпIи 120-рэ дгъэуцугъ, му­зыкальнэ Iэмэ-псымэхэр, пэ­Iухъохэр ыкIи нэмыкIхэр къэт­щэфыгъэх. ШэкIогъу мазэм IофшIэнхэр тыухыщт, — къыхигъэщыгъ Къэрэбытэ Айдэмыр.

Псэуалъэм ышъхьэ, шхьаныгъупчъэхэр зэблахъугъэх, ыкIоцIи зэтырагъэпсыхьагъ. Джащ фэдэу псырыкIуапIэр, гъэфэ­бэпIэ системэр зэблахъугъэх. ЦIыфхэр зычIэсыщтхэ залыр, унэм итеплъэ игъэкIотыгъэ гъэцэкIэжьынхэр рашIылIагъэх.

Культурэм и Унэ ипащэу Цуамыкъо Марет непэ Iофхэм язытет къытфиIотагъ:

«Унэу агъэцэкIэжьырэм квад­рат метрэ 400-м ехъу илъ, нэбгыри 120-рэ чIэфэ, кIэлэцIы­кIухэм яхудожественнэ IэпэIэсэныгъэ зыщыхагъэхъощт чIыпIэхэр, тхылъеджапIэр ащ хэтых. Лъэхъаным диштэрэ Iэмэ-псы­мэхэмкIэ культурэм иучреждение зэтырагъэпсыхьагъ.

Къуаджэхэм адэт культурэм иунэхэм мэфэкI Iофтхьабзэхэр зэращыкIохэрэм, творчествэм пылъхэр зэращызэрэугъоихэрэм имызакъоу, цIыфхэр ащызэ­Iо­кIэх, зэдэгущыIэх, зэхахьэхэр ащэкIох. КъоджэдэсхэмкIэ ащ мэхьанэшхо иI. ЦIыфхэм мыщ зыщагъэпсэфын, яуахътэ шIуагъэ къытэу щагъэкIон алъэ­кIыщт.

«ТиIофшIэн екIолIэкIэ зэфэшъхьафхэр къыфэдгъотызэ ты­лэжьэным тыфэхьазыр. Теат­ральнэ ыкIи къэшъокIо кружок­хэм Iоф ашIэщт, хэдыкIыным, пхъэ ыкIи къэнджал хэгъэстыкIыным афэдгъэсэщтых. Пшъэ­рылъ шъхьаIэу тиIэр тиныб­жьыкIэхэм яIэпэIэсэныгъэ ыкIи ясэнаущыгъэ къыхэдгъэщызэ тадэлэжьэныр ары», — хи­гъэунэфыкIыгъ Цуамыкъо Марет.

ТхылъеджапIэм Iоф щашIэ Ламыкъо Нуретрэ Цуамыкъо Эммэрэ. КIэлэцIыкIухэм афытегъэпсыхьэгъэ Iофтхьабзэхэр илъэсым къыкIоцI рагъэкIокIы. КъэшъокIо купэу

«Жъуагъохэр» зыфиIорэр Цуамыкъо Марет зэхищагъ. Тамыгъэхэм яхэгъэстыкIын зызщыфагъасэрэ кружокэу «Сэтэнай» зыфиIорэм Даур Маринэ фэгъэзагъ. Теат­ральнэ объединениеу «Гугъэ» зыфиIорэм ихудожественнэ пащэу Иуаныкъо Рузанэ къэгъэ­лъэгъон гъэшIэгъонхэр зэхещэ.

Къуаджэм дэлъ щыIакIэр нахьышIу шIыгъэнымкIэ къэралыгъом Iофышхо ешIэ. Лъэпкъ проектхэм, программэхэм, ама­лэу къатыхэрэр чIыпIэхэм къыз­фагъэфедэнхэм мэхьанэ­шхо иI.

Лъэпшъыкъо Фатим. Сурэтхэр: А. Iэшъын.