Адыгэ къэралыгъо университетым епхыгъэ республикэ естественнэ-хьисап еджапIэр къызызэIуахыгъэр илъэс 25-рэ хъугъэ.

Мэзаем и 4-м, 1998-рэ илъэсым Адыгэ Республикэм и Президент иунашъокIэ республикэ физико — хьисап еджапIэр къызэIуахыгъагъ. Ащ къыщегъэжьагъэу гъогу кIыхъэ къыкIугъ, непэ зигъэхъагъэкIэ анахь къахэщырэ еджапIэхэм ащыщ.

МэфэкI Iофтхьабзэхэр чъэпыогъум и 27 — 28-м зэхащагъэх. Илъэс зэкIэлъыкIохэм мы еджапIэр къэзыухыгъэхэр ащ къа­рагъэблэгъагъэх. ЫпэрапшIэу «Шварц ынэхэмкIэ Мыекъуапэ» зыфиIорэ зекIор афызэхащагъ, хьисап паркыр къарагъэкIухьагъ, нэужым еджапIэр къэзыухыгъэ­хэмрэ джы щеджэхэрэмрэ зэIу­кIагъэх, зэдэгущыIагъэх. Куп- купэу гощыгъэхэу зэнэкъокъугъэх. Охътэ макIэ тырагъэкIуадэзэ зада­чэхэр анахь псынкIэу къэзы­шIыхэрэр къыхагъэщыгъэх. Ащ ыуж «ЛIэужхэм ятурнир» зыфиIорэр зэхащагъ, еджапIэр къэзыухыгъэхэмрэ джы щеджэхэрэмрэ зэнэкъокъугъэх.

Республикэ естественнэ-хьисап еджапIэм фэгъэхьыгъэ игъэ­кIотыгъэ къэбар тигъэзет къыхиутыщт.

Делэкъо Анет.