[caption id="attachment_140878" align="aligncenter" width="800"] Сурэтыр: А. Гусев.[/caption]

Адыгэ Республикэм и Правительствэ и Унэ Урысыем юстици­емкIэ и Министерствэ ­Адыгэ РеспубликэмкIэ и ГъэIорышIапIэ ипэщакIэ Адыгеим и ЛIы­шъхьэ нэIуасэ щыфа­шIыгъ. Сергей Морозовыр ары а IэнатIэр зыфагъэшъошагъэр. Ащ ыпэкIэ Ирина Ковалевам илъэси 5-м къы­кIоцI ведомствэм пэщэныгъэ дызэрихьагъ.

Видеоселектор шIыкIэм тетэу зэIукIэгъум хэла­жьэ­хэрэм шIуфэс къарихыгъ Урысые Федерацием юсти­циемкIэ иминистрэ иапэрэ гуадзэу Евгений Забарчук.

Ащ къызэрэхигъэщыгъэмкIэ, ГъэIорышIапIэм ипэщакIэ опытышхо иI, ежь ышъхьэкIи Iофэу зыфэгъэзагъэмкIи пшъэ­дэкIыжь ин зэрихьырэр къы­гурыIозэ, IэнатIэу зыфагъа­зэрэр зэкIэ ыгъэцэкIагъ. Ми­нистрэм иапэрэ гуадзэ Сергей Морозовым къыфэ­лъэIуагъ ыкIи игъо къыфи­лъэгъугъ апшъэрэ мэхьанэ зиIэ пшъэрылъхэу ведомствэм ыпашъхьэ къиуцохэрэм язэшIохын икъоу ынаIэ атыригъэтынэу, хабзэм ишъолъыр къулыкъухэм, федеральнэ ведомствэхэм ячIыпIэ подразделениехэм шIуагъэ къэзытыщт зэдэлэжьэныгъэ адыриIэнэу. Адыгеим и ЛIы­шъхьэ Сергей Морозовым къыфэгушIуагъ IэнатIэм зэ­рэIухьагъэм фэшI ыкIи пшъэ­дэкIыжь зыхэлъ Iофхэм ягъэцэкIэнкIэ опытышхо зэриIэр, Урысые Федерацием и Прокуратурэ, Следственнэ Комитетым икъулыкъухэм IэнэтIэ зэфэшъхьафхэр ащигъэца­кIэхэзэ IофшIэнымкIэ IэпэIэсэныгъэу, къулайныгъэу къыз­IэкIигъэхьагъэхэр IэнэтIакIэм епхыгъэ пшъэрылъхэм язэшIохынкIи къызэрэзыфигъэфедэжьыщтхэм ицыхьэ зэрэтелъыр къыхигъэщыгъ.

«Республикэм ихэбзэ къулы­къухэмрэ Урысые Федерацием юстициемкIэ и Ми­нистерствэ Адыгэ Респуб­ликэмкIэ и ГъэIорышIапIэрэ шIуагъэ къэзытыщт зэдэлэжьэныгъэ азыфагу илъ зэрэхъущтым ыкIи теубытагъэ хэлъэу ыпэкIэ зэрэлъыкIотэщтхэм сыщэгугъы. Тиреспубликэ гъэ­хъагъэхэр ышIыхэзэ ыпэкIэ лъыкIотэным епхыгъэ зигъо Iофыгъохэу къэуцухэрэри шIуа­гъэ хэлъэу зэшIохыгъэ хъунхэм иамал ащ къытыщт», —къыIуагъ КъумпIыл Мурат.

Республикэм и ЛIышъхьэ къызэрэхигъэщыгъэмкIэ, джырэ хэбзэгъэуцугъэу щыIэм къыдилъытэхэрэр гъэцэкIагъэ зэрэхъухэрэр тэрэзэу уплъэ­кIугъэнхэмкIэ, хабзэр укъуагъэ мыхъунымкIэ республикэм икъэралыгъо хабзэ икъулы­къухэмрэ Урысыем и Минюст республикэмкIэ и ГъэIорышIапIэрэ язэдэлэжьэныгъэ зырагъэушъомбгъущт. Республикэм и ЛIышъхьэ чIыпIэ ГъэIорышIапIэмрэ ащ къыфэIорышIэрэ учреждениехэмрэ Iоф ащызышIэщт кад­рэхэр гъэхьазырыгъэнхэм пае федеральнэ Минюстыр Iофыгъоу къэуцугъэхэм ащыщхэм ащигъэгъозагъ.

ШъушIэным пае: Морозов Сергей Владимир ыкъом Саратов дэт юридическэ институтэу Д. И. Курскэм ыцIэкIэ щытыр къыухыгъ, илъэс зау­лэрэ юристэу предприятиехэм Iоф ащишIагъ, 1997-рэ илъэсым къыщегъэжьагъэу 2007-рэ илъэсым нэс Ейскэ район прокуратурэм пэщэ IэнатIэхэр щиIыгъыгъэх. 2007-рэ илъэсым Iоныгъом и 7-м къыщегъэжьагъэу

2023-рэ илъэсым мэзаем и 3-м нэс Урысые Федера­цием и Следственнэ Комитет и Следственнэ ГъэIорышIапIэу Краснодар краим щыIэм ислед­ственнэ отдел ипэщагъ, ащ нэужым УФ-м и Следственнэ Комитет и Следственнэ ГъэIорышIапIэу Темрюкскэ районым щыIэм иследственнэ отдел, къалэу Шъачэ и Хос­тинскэ район иследственнэ отдел ипащэу щытыгъ. 2023-рэ илъэсым мэзаем и 3-м къыщыублагъэу 2023-рэ илъэсым чъэпыогъум и 13-м нэс Урысые Федерацием и Следственнэ Комитет Краснодар краим­кIэ и Следственнэ ГъэIоры­шIапIэ цIыфхэм якъэухъумэн иIо­фыгъохэм афэгъэзагъэу щылэжьагъ.

АР-м и ЛIышъхьэ ипресс-къулыкъу