ЦIыфхэмрэ чIыпIэ­хэмрэ псыр къакIэмыоным тегъэпсыхьэгъэ Iофтхьабзэхэм мыгъэ республикэм сомэ миллиони 170-рэ фэдиз щапэIуагъэхьагъ.

А мылъкумкIэ гидротехническэ псэуалъэхэр агъэцэ­кIэжьыгъэх, псыхъо къула­джэхэр аукъэбзыгъэх, зыми фэмыгъэзэгъэ гидротехническэ псэуалъэхэр зэпкъыра­хыжьыгъэх, проект-сметэ документациехэм ягъэхьазырын ыуж итых.

ГущыIэм пае, Красногвардейскэ районымкIэ псыхъоу Лабэ идамбэ щыщ километрэ 22,5-р, Кощхьэблэ районымкIэ Натырбые дэжь псыхъоу Лабэ идамбэ щыщ километри 5,2-р, къуаджэу Еджэркъуае дэжь Лабэ идамбэ щыщ километри 4,9-р агъэцэкIэжьых. Мые­къопэ районымкIэ псыхъоу Джаджэ икъуладжэ щыщ километри 2,1-р агъэкъабзэ, Шэуджэн районымкIэ псыхъоу Джаджэ икъуладжэ щыщ километри 10,9-м игъэкъэбзэн пае проект-сметэ документациер агъэхьазыры.

Ащ нэмыкIэу Шэуджэн районымкIэ псыхъоу Фарзэ икъу­ладжэ щыщ километри 6,2-м игъэкъэбзэн ыуж итых. Красногвардейскэ районымкIэ къутырэу Дэгужъыем иIэгъо­-блэгъу псыхъоу Лабэ ошIэ-дэмышIэ тхьамыкIагъохэр къыщымыхъунхэм пае Адыгэ Рес­публикэм иминистрэхэм я Кабинет иIэпэчIэгъэнэ фонд мылъку къыхагъэкIыгъ.

Республикэ къэралыгъо программэу «Тыкъэзыуцухьэрэ дунаим икъэухъумэн, чIыопс къэкIуапIэхэм ягъэфедэн» зыфиIорэм диштэу гидротехническэ псэуалъэхэм ягъэцэкIэжьын, Мыекъопэ районымкIэ къутырэу Советскэм дэжь псыхъоу Псынэф тет гидротехническэ псэуалъэу зыми фэмыгъэзагъэр щызэпкъырыхыжьыгъэным ыкIи нэмыкI Iофтхьабзэхэм апае сомэ миллион 12,3-рэ къыхагъэкIыгъ.

Псыр къакIэмыоным фэшI мы илъэситIу благъэм Адыгэ Республикэм щызэрахьащт Iофтхьабзэхэм апае сомэ мил­лиони 130-рэ джыри къатIупщыщт. Шэуджэн районымкIэ псыхъоу Фарзэ идамбэ щыщ километрэ 27-р гъэкIэжьыгъэ­ным, сомэ миллион 232-рэ зыпэIухьащт IофшIэнхэр гъэцэкIэгъэнхэм атегъэпсыхьэгъэ лъэIу тхылъыр псы къэкIуапIэхэмкIэ Федеральнэ агентствэм IэкIагъэхьагъ.