Адыгэ къэралыгъо университетым филологиемкIэ ифакультет ия 4-рэ курс щеджэрэ Любовь Синельниковар къэралыгъо ыкIи муниципальнэ IофышIэхэм я Урысые программэу «ГосСтартым» илъэныкъоу «ГосСтарт.Стажировки» зыфиIорэм щыпхырыкIыгъ. Ащ ишIуагъэкIэ Урысыем просвещениемкIэ и Министерствэ исэнэхьаткIэ зыщигъэхьазырын амал ыгъотыгъ. Зэнэкъокъум икъыхэхын уцугъо пшъэшъэжъыер пхырыкIыгъ. Тестхэр, кейсхэр къышIыгъэх ыкIи эссе ытхыгъ. Хэгъэгум ис ныбжьыкIэ 250-рэ мыщ пхырыкIыгъ. ТхьамэфитIум къыкIоцI федеральнэ къулыкъухэм яIофшIэн зэрэзэхащэрэр ахэм арагъэлъэгъущт, яшIэныгъэхэм ахагъэхъощт. НыбжьыкIэхэм къэралыгъо ыкIи муниципальнэ къулыкъухэм Iоф ащашIэным епхыгъэ программэу «ГосСтартым» хэхьэрэ лъэныкъоу «ГосСтарт.Стажировки» зыфиIорэр Урысые Федерацием и Президент иунашъокIэ зэхащагъ. Проектым пшъэрылъ шъхьаIэу иIэр къэралыгъо къулыкъухэм Iоф ащызышIэщт ныбжьыкIэхэр гъэхьазырыгъэнхэр ары. Адыгэ къэралыгъо университетым ипресс-къулыкъу.