Адыгэ Республикэм и ЛIышъхьэу КъумпIыл Мурат Адыгэ ыкIи Мые­къопэ епархием ипащэу, архиепископэу Тихон IофшIэгъу зэ­IукIэгъу дыриIагъ. Ащ хэлэжьагъ федеральнэ инспектор шъхьаIэу Сергей Дрокиныр.

Адыгэ Республикэм щыпсэурэ цIыфхэм ягушъхьэлэжь хэхъоныгъэкIэ Iофыгъохэм, Свято-Успенскэ чылысэу Мыекъуапэ щагъэпсырэм епхыгъэ IофшIэнхэр зэрэлъыкIуатэхэрэм ахэр атегущыIагъэх.

Адыгеим и ЛIышъхьэ мамырныгъэр, зэгурыIоныгъэр гъэпытэгъэнхэмкIэ, щынэгъончъагъэ щыIэнымкIэ, джащ фэдэу ныбжьыкIэхэр цIыфыгъэ шэпхъэ дахэхэм арыгъуазэхэу пIугъэнхэмкIэ республикэм иконфессиехэм Iофышхо зэрэзэшIуахырэр къыхигъэщыгъ.

«Республикэм идин пащэхэм ренэу адытиIэрэ зэIукIэгъухэм цIыф лъэпкъ зэфэшъхьаф­хэм къахэкIыгъэхэмрэ дин зэмылIэужыгъохэр зылэжьы­хэ­рэмрэ язэдэпсэуныгъэ тынаIэ щатетэгъэты. Хабзэм икъулыкъухэмрэ республикэм иконфессиехэмрэ тызэгъусэу зэ­дызэшIотхырэ IофшIэным со­циальнэ мэхьанэ зиIэ, шIуагъэ къэзытырэ кIэуххэр къыздехьых. ТапэкIи тизэфыщытыкIэхэр дгъэ­пытэнхэм, зядгъэу­шъомбгъуным тынаIэ тедгъэтыщт», — къыIуагъ КъумпIыл Мурат.

Мы лъэхъаным Адыгеим чы­лыс 20 фэдиз щагъэпсы ыкIи щагъэцэкIэжьых. Ахэм зыкIэ ащыщ республикэм икъэлэ шъхьа­Iэ щашIырэ кафедральнэ Свято-Успенскэ чылысыр. 2014-рэ илъэсым IофшIэнхэм ападзэжьыгъ ыкIи зыпкъ итэу ахэр лъэкIуатэх. Республикэм мылъкукIэ IэпыIэгъоу къаритырэм нэфэшъхьафэу шIушIэ Iофтхьабзэхэм афэгъэзагъэхэми яшIуа­гъэ къагъакIо.

Чылысхэмрэ мэщытхэмрэ яшIын фытегъэпсыхьэгъэ Iофэу зэшIуахырэм республикэм щы­псэухэрэмкIэ мэхьанэшхо зэ­ряIэр Адыгеим и ЛIышъхьэ къыхигъэщыгъ. Дин зэфэшъ- хьаф­хэр зылэжьыхэрэм азыфагу мамырныгъэрэ зэгурыIоныгъэрэ илъынхэмкIэ ащ ишIуагъэ къэкIо.

Архиепископэу Тихон къы­Iуагъ диным иIофыгъохэм ренэу ынаIэ зэратыригъэтырэм, социальнэ мэхьанэ зиIэ проектхэр пхырыщыгъэнхэмкIэ ишIуагъэ къызэригъакIорэм апае Адыгеим ипащэ зэрэфэразэр.

АР-м и ЛIышъхьэ ипресс-къулыкъу