Адыгеим иветеранхэм афэгушIох
Адыгэ Республикэм инахьыжъхэм я Советрэ иветеранхэм я Советрэ мэфэкIым — ветераным и Мафэ фэшI афэгушIох заом, IофшIэным, УIэшыгъэ КIуачIэхэм ыкIи хэбзэухъумэкIо къулыкъухэм яветеранхэм (пенсионерхэм), зэкIэ тинахьыжъхэу республикэм щыпсэухэрэм.
Шъуащыщ пэпчъ гъогу къин, ау щытхъу зыпылъ гъогушхо къыкIугъ. Хэгъэгум иилъэс анахь хьылъэхэм лIыхъужъныгъэ хэлъэу а къиныгъохэр зэкIэ зэпышъучыгъэх, тичIыгу къэшъуухъумагъ, ар зыпкъ ижъугъэуцожьыгъ. Зэоуж илъэсхэм гуетыныгъэ хэлъэу бэ шъушIагъэр экономикэр гъэпытэгъэным, ти Хэгъэгушхо ыкIуачIэ нахь пытэным, Адыгеим къэралыгъо гъэпсыкIэу иIэм джыри нахь зиушъомбгъуным алъэныкъокIэ. Непи шъуиамалхэмрэ шъукIуачIэрэ къызэрахьэу а IофышIухэр лъышъогъэкIуатэх, цIыф лъэпкъыбэм ялIыкIохэр зыщыпсэухэрэ республикэм иобщественнэ ыкIи икультурнэ щыIакIэ чанэу шъухэлажьэ, ныбжьыкIэхэр я Хэгъэгу фэшъыпкъэхэу пIугъэнхэм шъуиIахьышхо хэшъошIыхьэ.
Тыгу къыддеIэу непэ къэтэIо тызэрэшъуфэразэр. ЗэкIэми псауныгъэ пытэ, щыIэкIэшIу, насып шъуиIэнэу, шъуигупсэхэм, къышъупэблагъэхэм яфэбагъэ ренэу зэхэшъушIэнэу тышъуфэлъаIо!
ГъукIэлI Нурбый. Нахьыжъхэм я Совет итхьамат. Къуаджэ Аслъан. Ветеранхэм я Совет итхьамат.