Урысыем щыпсэухэрэм я Хэгъэгу шIу зэралъэгъурэр хэушъхьа­фы­кIыгъэ дзэ операцием нафэ къытфишIыгъ.

Лъэпкъ зэфэшъхьафхэм къахэкIы­гъэхэр зыч-зыпчэ­гъоу зэкъоуцохи, ти­къэралыгъо ищынэгъончъагъэ къаухъу­мэным зэреуцолIагъэхэм тырэгушхо ыкIи тилIыхъужъхэу зыпсэ емыблэжьхэу текIоныгъэр къэзыгъэблагъэхэрэм ящытхъу тэIо.

ГуфакIоу зидзэ пшъэрылъхэр зыгъэцакIэхи къэкIожьы­гъэхэм, «Зэо зэфэшъхьафхэм яветеран» зыфиIорэ цIэр къызфагъэшъоша­гъэхэм ащыщ Нэхэе Руслъан. Ар 1978-рэ илъэсым Адыгэкъалэ къыщыхъугъ, гурыт еджапIэу N 2-м ще­джагъ. ИлъэситIурэ дзэ къулыкъур Комсомольск-на-Амуре щихьыгъ. Ащ ыуж IофшIэн зэфэшъхьафхэр ыгъэцэкIагъэх. Унагъо ышIагъ, кIэлитIу иI.

ХэушъхьафыкIыгъэ дзэ операциер мэзаем и 24-м рагъажьи, Хэгъэгур къэухъумэгъэн фаеу зэхъум, Теуцожь районымкIэ кIалэхэр зэхэгущыIэжьхи гъэтхэпэ мазэм нэбгырэ 12 хъухэу гуфакIоу дэкIыгъагъэх.

— Сиунэгъо Iофыгъо горэхэм апкъ къикIыкIэ ахэм садыдэ­кIынэу хъугъэп, — къеIуатэ Рус­лъан. — ГуфакIоу кIохэрэр зэратхыщт шIыкIэм фэгъэхьыгъэ хэбзэгъэуцугъэ а лъэхъаным щыIагъэп. Ащ фэдэ кIалэхэр ежь-ежьырэу Донецкэ кIохэти, Хэгъэгур къаухъумэным пае шъхьафит отрядхэр зэхащэщтыгъэх е гуфакIохэр дзэ частьхэм ащыщхэм арапхыщтыгъэх. Джы къаратырэ ахъщэ тынхэри щыIагъэхэп сэ сызыдэкIым. 2022-рэ илъэсым мэлылъфэгъум дзэ комиссариатым зыфэзгъэзагъ, сэщ фэдэу гуфакIоу Краснодар краим къыщызэрэугъоигъэхэм сахэфагъ. Дагъыстан ит дзэ частьхэм ащыщ ибригадэ та­гъэкIуагъ. ЖъоныгъокIэ мазэм «кIэпсэжъыем» тызэпырыкIыгъ. Мэзитфым ехъурэ сыкъэтыгъ. ТигущыIэгъу къызэрэхигъэщыгъэмкIэ, а лъэбэкъур ышIыным бэрэ егупшысагъэп. Хэ­гъэгур гузэжъогъу чIыпIэ ифагъэу, ищынэгъончъагъэ къаухъу­мэн фаеу, IэпыIэгъу ищыкIа­гъэу зэрэзэхихыгъэм тетэу тыриубытагъ.

— АпэрэмкIэ, а унашъор зы­кIэсшIыгъэр Хэгъэгур къэухъу­мэгъэныр сипшъэрылъэу слъытагъэти, ыбгъукIэ сыщытэу сяплъынэу сыфэягъэпти ары. ЯтIонэрэмкIэ, сэ сыныбжь мы­бэми, зыгорэ слъэгъугъэ, унагъо сшIагъэ, кIэлэцIыкIухэр сиIэх. ХэушъхьафыкIыгъэ дзэ операцием тэщ фэдэхэр кIохэмэ, нахь ныбжьыкIэхэр амыщэнхэм сыдегупшысагъ.

СыздакIорэр зыфэдэр дэгъоу къызгурыIо­щтыгъ, — хигъэунэфыкIыгъ Нэхэе Руслъан.

Плъыр-стырыр телевизоркIэ плъэгъурэм фэдэп, ащ ухэтыныр нэмыкI шъыпкъ. ТигущыIэгъу дэгъоу къыгурыIощтыгъ зэрихьылIэн ылъэкIыщтыр. Ежь ицIыф шIыкIэкIэ зы чIыпIэ исхэрэм афэмыдэу, къыкIухьагъэр бэ, чIыпIэ зэфэшъхьафхэм арыфэнэу хъугъэ, ау сыдигъуи цIыфыкIэхэми ар псынкIэу ясэ, жабзэ къадегъоты.

— Сызхэтыгъэр танк бригадэу щытыгъ, — къеIуатэ Руслъан. — А сэнэхьатым сэ сыфырагъэджэжьыгъ. Анахь къин зэкIэми къытщыхъугъэр апэрэ зэпэуцужьым тыхэлэжьэныр ары. Сыда пIомэ а лъэ­хъаным тактикэ хэхыгъэ щыIагъэп. Охътэ гъэнэфагъэ зыте­шIэм дронхэм Iоф адэтшIэныр, видеолъыплъэныр, чыжьэ щэ­рыоныр зэдгъэшIэнхэу хъугъэ.

ТигущыIэгъу къызэриIуагъэмкIэ, къулыкъур анахь псынкIэ къафэзышIыщтыгъэр дзэкIолIхэмрэ офицерхэмрэ азыфагу илъ зэфыщытыкIэр ары. Зы IофшIэн зэ­рагъэцакIэрэр, зым ищыIэныгъэ нэмыкIым зэрепхыгъэр пстэуми къагурыIощтыгъ. АнаIэ зэтеты­жьэу, IэпыIэгъу зэ­фэхъущтыгъэх, бэхэр зэрэмытанкистхэм фэшI амышIэрэр агурагъаIощтыгъ.

Нэхэе Руслъан ана­хьэу ыгу риубытагъэу къыхигъэщыгъэхэм ащыщ къулыкъур зыщихьыгъэ До­нецкэ лъэныкъом мамыр цIыфхэр къа­зэрэщапэгъокIы­гъэхэр.

— ЗэопIэ чIыпIэхэр зэблэтхъунхэ фае зыхъукIэ, къоджэ псэупIэхэм тадахьэщтыгъ, — ыгу къэкIыжьы Руслъан. — Танкхэм тарысэу тызэхэтэу урамым тыкъырэкIо зыхъукIэ, цIыфхэр къыдэкIыхэти, къыт­пэгушIуатэщтыгъэх, такIыбкIэ къащхэр къахьызэ Тхьэм къытфелъэIущтыгъэх, «шъудэмыкIыжь» къытаIощтыгъ. Шъып­къэр пIощтмэ, ахэр къин дэдэ хэтыгъэх. А зэпстэур зысэлъэгъум, сызэрэкIуагъэр зэрэмыхьау­лыер къызгурыIуагъ.

ТигущыIэгъу къызэрэтфиIотагъэмкIэ, техникэр зыпкъ рагъэу­цожьынэу мэфэ заулэрэ а къо­джэ псэупIэхэм къызащыуцухэкIэ агъашхэщтыгъэх, псыр къафыдахыщтыгъ. Пчыхьэрэ ны-тыхэм кIэлэцIыкIухэр ягъу­сэхэу къакIохэти, концерт дзэ­кIолIхэм къафатыщтыгъ, ежьхэм афэгъэхьыгъэ орэдэу аусыгъэ­хэр къафаIощтыгъэх.

Руслъан дзэ частым дишIыгъэ зэзэгъыныгъэр зеухым, ядэжь къэкIожьыгъ. Мазэрэ Iалъмэ­къыр зэдимыхыжьэу щытыгъ ыгъэзэжьын мурад зыдиIыгъэу. ИкIалэу Роман еджэныр къеу­хыфэ ежэ, джыри зэригъэзэжьыщтым егупшысэ.

Iэшъынэ Сусан.