Зипсауныгъэ амалхэр зэщыкъогъэ кIэлэцIыкIухэм ятворческэ амал­хэр къагъэлъэгъонхэм, джырэ щыIакIэм зыкъыхагъотэным фэ­IорышIэрэ республикэ фестивалэу «Шаг навстречу» зыфиIорэр АР-м и Лъэпкъ унэу Пушкиным ыцIэ зыхьырэм щыкIуагъ.

Сэкъатныгъэ зиIэ кIэлэцIыкIухэм ятворчествэ къызыщагъэлъэгъорэ Iофтхьабзэм икIэщакIох Адыгэ Республикэм Iоф­шIэнымкIэ ыкIи социальнэ хэхъоныгъэмкIэ и Министерствэ, цIыфхэм ясоциальнэ фэIо-фа­шIэхэр зыгъэцэкIэрэ зэхэубытэгъэ гупчэр, АР-м икъэралыгъо учреждениеу «Социальнэ-реабилитационнэ гупчэу «Доверие» зыфиIорэр. Зэнэкъокъум иапэрэ уцугъор мэлылъфэгъум и 15-м къыщегъэжьагъэу бэдзэогъум и 20-м нэс Адыгеим ирайонхэм ыкIи икъалэхэм ащыкIуагъ. ЗисэнаущыгъэкIэ къахэщыгъэ кIэлэцIыкIухэр республикэ фестивалым хэлэжьэнхэ амал яIэ хъугъэ.

Республикэм икъалэхэм ыкIи ирайонхэм къарыкIыгъэ кIэ­лэцIыкIу 43-рэ (илъэси 7-м къыщегъэжьагъэу 18-м нэс зы­ныбжь­хэр) мыгъэрэ фестивалым хэлэжьагъэх. Ар мэфэкI шIыкIэм тетэу зэхащагъ ыкIи яшъыпкъэу зыфагъэхьазырыгъ. Ащ ишыхьатыгъ зипсауныгъэ пыч фэхъугъэ кIэлэцIыкIухэм ядунэееплъыкIэ къизыIотыкIырэ Iэпэщысэхэр къызэрахьылIэгъэ къэгъэлъэгъон гъэшIэгъонэу фестивалыр рамыгъажьэзэ филармонием къыщызэIуахыгъэр. Сурэтхэр, дышъэидэхэр, щы­гъыжъыехэм, хъэдэн шъабэм ахэшIыкIыгъэ пкъыгъохэр, пхъон­тэжъые цIыкIухэр къэзэрэугъоигъэхэм алъэгъугъ.

Къэгъэлъэгъоным хэлэжьа­гъэхэм ащыщ Кощхьэблэ районым щыщ Датхъужъ Ларисэ. Щыгъыжъыем хишIыкIыгъэ пкъыгъо гъэшIэгъонхэр ащ къы­рихьылIагъэх. Теуцожь районым къикIыгъэ Кира Шанговар Лъэу­стэнхьэблэ гурыт еджапIэу N 10-м ия 9-рэ класс щеджэ. Кирэ илъэси 5-м итэу сурэтшIыныр ригъэжьагъ ыкIи ежь­-ежьырэу зегъасэ. Охътэ лые къызэрэфыхэкIэу чIыопсым ибаиныгъэ, идэхагъэ къизыIотыкIырэ сурэтхэр ешIых. Шэу­джэн районым илIыкIоу Дионис Кычиным кIапсэм хэшIыкIыгъэ пкъыгъо зэфэшъхьафхэр ышIыгъэх.

Нэужым фестивалым имэфэкI Iахь аублагъ. АР-м Iоф­шIэнымкIэ ыкIи социальнэ хэ­хъоныгъэмкIэ иминистрэ игуа­дзэу Ирина Ширинам къэзэрэугъоигъэхэм шIуфэс къарихыгъ. НыбжьыкIэ цIыкIухэм сэнаущыгъэу ахэлъым осэшIу къыфишIызэ, чанэу зыкъагъэлъэгъонэу, творческэ гъэхъагъэхэр ашIынхэу къафэлъэIуагъ. КIэлэегъа­джэу зыгъасэхэрэм яIофшIэн мыпсынкIэ щытхъу хэлъэу зэрагъэцакIэрэр ыкIи ащкIэ лъэшэу зэрафэразэхэр къыхи­гъэщыгъ.

Нэужым концерт программэр аублагъ. Ар едзыгъуиплIэу зэтеутыгъагъ: орэд къэIоныр, музыкальнэ Iэмэ-псымэхэм къа­­рагъэIоныр, къэшъоныр, сурэтшIыныр.

Орэд къэIонымкIэ текIоны­гъэр къыдихыгъ Эдуард Дыхтан (Шэуджэн район). Музыкальнэ Iэмэ-псымэхэмкIэ апэрэ хъугъэ Алена Тарасенкэр (Красногвардейскэ район).

КъэшъонымкIэ апэрэ чIыпIэр фагъэшъошагъ Адыгэкъалэ щыщ Къошк Суандэ. Сурэт ыкIи Iэпэщысэ шIынымкIэ къахэщыгъэхэр Мария Козловар (Красногвардейскэ район) ыкIи Онэныкъо Дамир (Адыгэкъал).

Зипсауныгъэ амалхэр зэ­щыкъогъэ кIэлэцIыкIухэу зисэнаущыгъэкIэ къахэщыгъэхэм Санкт­-Петербург щыкIощт Дунэе фестивалэу «Шаг навстречу» зыфиIорэм Адыгеир къыщагъэлъэгъощт.

ТекIоныгъэр къыдэзыхыгъэ­хэм щытхъу тхылъхэр ыкIи шIухьафтынхэр аратыгъэх. Хэлэжьагъэхэр щытхъу тхылъхэмкIэ ыкIи нэпэеплъ шIухьафтынхэмкIэ агъэгушIуагъэх.

КIАРЭ Фатим. Сурэтхэр: А. Iэшъын.