Мыекъопэ къэралыгъо технологическэ университетым «пчъэ зэIу­хы­гъэ­хэм» ямафэ щызэхащагъ.

Апшъэрэ классхэм ащеджэрэ кIэлэеджакIохэр ыкIи ны-тыхэр ащ къырагъэблэгъагъэх, гущыIэгъу афэхъугъэх, шэпхъакIэхэр къафаIотагъэх.

ДжырэкIэ анахь ящыкIэгъэ сэнэхьатхэу апшъэрэ еджапIэм иIэхэм ныбжьыкIэхэр нэIуасэ афашIыгъэх. Университетым узэрэчIэхьащтым шапхъэу пылъхэр, стипендиеу къаратырэр, ныбжьыкIэ чанхэм фэгъэкIо­тэнэу яIэхэр къафаIотагъэх. Мыщ щеджэхэрэм шIэныгъэ зэрэзэрагъэгъотырэм дакIоу лъэныкъо зэфэшъхьафхэм хэшIыкI афыряIэу, ящыIэныгъэкIэ ахэр къафэфедэжьынхэм Iоф зэрадашIэрэр къагурагъэIуагъ.

Джащ фэдэу 2024-рэ илъэсым гъэсэныгъэ программэхэу бакалавриатым, специалитетым ыкIи магистратурэм уачIэхьанымкIэ зэхъокIыныгъэу щыIэхэм къатегущыIагъ апшъэрэ еджапIэм иIофышIэу Бэрзэдж Розэ. Ащ къызэриIуагъэмкIэ, ныбжьыкIэхэм къэралыгъо фэIо­фашIэхэмкIэ порталым иамалкIэ ятхьапэхэр къырагъэхьынхэ алъэкIыщт, ар нахь IэшIэх афэхъущт.

НыбжьыкIэхэм волонтерхэр ягъусэхэу апшъэрэ еджапIэм ифакультетхэр къакIухьагъэх, сэнэхьат зэфэшъхьафхэмкIэ заушэтыгъ, зэрэщеджэхэрэр, амалэу яIэхэр зэрагъэшIагъэх.

Мыекъопэ къэралыгъо технологическэ университетым илъэс къэс «пчъэ зэIухыгъэхэм» яма­фэ щызэхащэ ыкIи ар мэфэкI шIыкIэм тетэу макIо. Анахь мэ­хьанэ зиIэр сэнэхьат пэпчъ ныбжьыкIэхэм аушэтын зэралъэ­кIырэр ары, ащ ишIуагъэкIэ ящыIэныгъэ зэрапхыщт лъэныкъор къыхахын амал яIэ мэхъу.

Мыекъопэ къэралыгъо технологическэ университетым ипресс-къулыкъу.