Комсомолыр зызэхащагъэр илъэси 105-рэ ыкIи Хэгъэгу зэошхом ТекIо­ныгъэр къызыщыдахыгъэр илъэс 80 зэрэхъурэм япэгъокIэу Адыгэ къэралыгъо университетым Iэнэ хъурае щыкIуагъ.

Iофтхьабзэм кIэщакIо фэхъугъэх «Воспитанники комсомола — мое отечество» зыфиIорэм и Адыгэ шъолъыр къутамэрэ Советскэ Союзым и ЛIыхъужъэу Андырхъое Хъусен ыцIэ зыхьырэ Адыгэ респуб­ликэ фондэу «ТекIоныгъэр», АР-м иветеранхэм я Общественнэ организацие, Урысые дзэ-тарихъ обществэм ишъолъыр къутамэу АР-м щыIэр, нэмыкIхэри.

Зэхахьэм хэлэжьагъэх комсомолым и Адыгэ хэку комитет илъэс зэфэшъхьафхэм Iоф щызышIагъэхэр, общественнэ ыкIи ныбжьыкIэ организациехэм япащэхэр, шIэны­гъэлэжь­хэр, апшъэрэ еджапIэхэм якIэлэегъаджэхэр ыкIи студентхэр.

Iэнэ хъураем изэхэщакIохэм му­радэу яIагъэр геополитикэм ылъэ­ныкъокIэ зэхъокIыныгъэхэм къа­хэ­кIэу шъолъыр мэхьанэ иIэу ныб­жьыкIэхэм Iоф зэрэдашIэщт шIыкIэхэр гъэунэфыгъэнхэр ары.

Адыгэ къэралыгъо университетым ипрофессорэу, 1969 — 1976-рэ илъэсхэм комсомолым и Адыгэ хэку комитет пшъэдэкIыжь зыхьырэ иIофышIэу щытыгъэ Елена Малышевам къызэриIуагъэмкIэ, непэ лъэхъэнэ мыпсынкIэу тызыхэтым къыткIэхъухьэрэ лIэужхэм япатриотическэ пIуныгъэ мэхьанэу иIэм зыкъыIэтыгъ. Тихэгъэгу шIу зылъэ­гъурэ цIыфхэм ягъэхьазырынкIэ анахь мэхьанэшхо зиIэр ныбжьыкIэхэм япIуныгъэкIэ опытэу щыIэр гъэфедэгъэныр ары.

Iэнэ хъураем къыщыгущыIагъэх илъэс зэфэшъхьафхэм ВЛКСМ-м и Адыгэ хэку комитет иапэрэ сек­ретарыгъэхэу Нэхэе Юрэ, ПсыIушъо Юсыф, ЛэупэкIэ Фатимэ, АР-м иве­теранхэм я Совет итхьаматэу Къоджэ Аслъан, нэмыкIхэри.

Ленинскэ комсомолыр илъэси 105-рэ зэрэхъурэр, ащ мэхьанэу иIагъэр къэзэрэугъоигъэхэм къыраIотыкIыгъ. КIэлэ ыкIи пшъэшъэ миллион пчъагъэмэ ящыIэныгъэ комсомолым чIыпIэшхо щиубытыгъ. НыбжьыкIэхэм япIунрэ яегъэджэнрэ япхыгъэ шIыкIэ-амалыкIэхэм якъы­хэхынкIэ комсомолыр зыфэдэ къэ­мыхъугъэ щысэшIоу зэрэщытыгъэр агу къагъэкIыжьыгъ.

ЗэхэщакIохэм къызэраIуагъэмкIэ, уахътэм къыгъэуцугъэ Iофыгъо къин­хэр зыщызэшIуахыщтыгъэхэ лъэхъаным къэралыгъом иэкономикэ хэхъоныгъэ ышIыным, хэгъэгум зыкъыухъумэжьынымкIэ амалэу иIэхэм нахь заушъомбгъуным, нэ­мыц фашистхэр зэхэкъутэгъэнхэм, лъэпкъ хъызмэтыр зыпкъ игъэуцо­жьыгъэным, наукэм, культурэм, спортым гъэхъэгъэшхохэр ашIынхэм комсомольцэхэм яIахьэу хашIыхьагъэм уасэ фэшIыгъуай.

Комсомольцэхэм непи хэгъэгум ихэхъоныгъэ, къыткIэхъухьэхэрэм япIун чанэу хэлажьэх, блэкIыгъэр, непэрэ мафэр, къэкIощтыр зэпхыгъэу зэрэщытхэм ахэр ящысэх.

КIАРЭ Фатим.