Урысые биотехнологическэ университетым гъомылэп­хъэ индустриемкIэ ыкIи хьакIэщ бизнесымкIэ икафедрэ шхын гъэхьазырыгъэнымкIэ зэнэ­къокъоу щыкIуа­гъэм Мыекъопэ къэралыгъо технологическэ университетым истуденткэ хэлэжьагъ. Гъомылапхъэу къагъэ­нэфагъэм хэшIыкIыгъэ шхыныгъохэмкIэ зэнэкъо­къум хэлажьэрэмэ Iанэр агъэкIэрэкIэнэу щытыгъ. Командэр къыздикIыгъэ шъолъырым ифэмэ-бжьы­мэ къыхэщэу Iанэр агъэ­псын фэягъ. Шхын IэшIу­хэм апае агъэфедэн фитыгъэх крем зэфэшъхьаф­хэр зыхэхьэрэ гъомылап­хъэхэр.

«Тортхэр, пирожнэхэр» зыфиIорэ лъэныкъом хэлэжьагъ ыкIи апэрэ чIыпIэр къыдихыгъ магистратурэм иапэрэ курс ще­джэ­рэ Сарине Карапетян. Ащ икIэлэегъаджэр гъом­лэ­пхъэ технологиехэмкIэ кафед­рэм идоцентэу, эко­номическэ шIэныгъэхэмкIэ кандидатэу Светлана Некрасовар ары.

«Тыгъэр зыщыбэ Адыге­ир» зыфиIорэ тортыр Са­рине Карапетян ышIыгъ. Шъоум, шоколадым ахэшIыкIыгъэ кремхэр ыгъэфедэхэзэ, Адыгеим щы­псэурэ лъэпкъхэм ялIыхъужъныгъэ, хьакIэхэм зэрапэгъокIыхэрэр Сарине тортым къыщыриIотыкIыгъ. Шыоу къиныгъохэр зэпызычырэм ыпкъ ищыгъи аужырэ шхыныгъо пкъыгъоу тортым ащ тыригъэу­цожьыгъ. Лъэтегъэуцор Адыгэ Республикэм и Гимнэу къыригъэIуагъэмкIэ Сарине Карапетян ыухыжьыгъ.

УФ-м гъэ­сэныгъэмрэ шIэныгъэмрэкIэ и Минис­терствэ, Урысые биотехно­логическэ университетыр, Урысыем ыкIи Московскэ хэкум яхьалыгъугъэжъэ, якондитерскэ гильдиехэр ары Iофтхьабзэм кIэщакIо фэхъугъэхэр.