Непэрэ мафэм илIыкIу
Чъэпыогъум и 24-м гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм Iэнэ хъурае щызэхащэгъагъ. Ар усакIоу, Адыгэ Республикэм культурэмкIэ изаслуженнэ IофышIэу Къуикъо Шыхьамбый ыныбжь илъэс 60 зэрэхъугъэм фэгъэхьыгъагъ.
Поэт пэпчъ гум Iэзэгъу фэхъурэп. Ау щыIэх зырыз дэдэхэр усэкIэ, гупшысэкIэ, Iэзэгъу гущыIэкIэ цIыфхэм агу нэсынхэр зыфызэшIокIхэу къыздэхъухэрэр. Ахэр усэныр ныдэлъф шэн псыхьагъэу зыхэлъых, хьалэлэу, зэмыблэжьэу лъэпкъым фэлажьэрэх.
Адыгэ тхыгъэ литературэм изы Iахьэу поэзием илъэсипшI пчъагъэ хъугъэу игупшысэ хегуащэ Къуикъо Шыхьамбый. НэмыкI лъагъо горэми хэкIокIэнэу щымытэу ежь илъэуж гъэнэфагъэ ащ пхырещы.
Литературнэ мэфэкIэу Шыхьамбый ыцIэкIэ зэхащагъэм хэлэжьагъ ыкIи къыщыгущыIагъ Адыгэ, Къэбэртэе-Бэлъкъар, Къэрэщэе-Щэрджэс республикэхэм янароднэ тхакIоу, АР-м итхакIохэм я Союз иправление итхьаматэу, Урысыем итхакIохэм я Союз иправление итхьамэтэ гуадзэу, Адыгэ(Черкес) Дунэе академием иакадемикэу МэщбэшIэ Исхьакъ.
Ижъырэ лъэпкъхэм ащыщ адыгэхэм ашъхьэ къырыкIуагъэу, ащэчыгъэу, апэкIэкIыгъэр зэрэбэ дэдэмкIэ игущыIэ ащ къыригъэжьагъ. Тарихъ гъогуонэ хьылъэхэм лъэпкъым ыпсэ атеулыIухьагъэми, лъэпкъ акъылыр, лъэпкъ гупшысэр а зэкIэм пыч фэмыхъоу къызэрялыжьыгъэм адыгэ лъэпкъ литературэр къыгъэпсыгъэу ылъытагъ. Тиадыгэ литературэ ныбжьыкIэ, бэрэ зэжэгъэхэ сабыеу, дахэу къызэрэзэкIэхъухьагъэр, ублэгъу-егъэжьэгъум щытыгъэхэ титхэкIо нахьыжъхэу Т. КIэращэм, А. Хьаткъом, И. Цэим ащкIэ шIушIэгъабэ зэряIэр, ахэм аужыIоу адыгэ литературэм къыхэхьагъэхэу Ю. Лъэустэным, С. ЯхъулIэм, А. Еутыхым, Д. Кэстанэм, М. Пэрэныкъом, А. ХьэдэгъалIэм, Къ. Жанэм щэIэфэхэ зафэу адыгэ литературэм хахъо зэрэфашIыгъэр, ау Хэгъэгу зэошхом а зэкIэ къызэрэзэпыригъэзагъэр, Андырхъое Хъусен илъэс 20 нахь ымыныбжьэу, лIыгъэ зэрихьэзэ, Хэгъэгум ыпсэ зэрэфитыгъэр, «Советскэ Союзым и ЛIыхъужъ» цIэ лъапIэр къызэрэфагъэшъошагъэр, тхэныр езыгъэжьэгъэкIэ кIэлэкIабэр Хэгъэгу зэошхом зэрэхэкIодагъэр, заор зэфэдэкIэ щыIэныгъэми, литературэми утын зэрафэхъугъэр МэщбэшIэ Исхьакъ игущыIэ щыкIигъэтхъыгъ.
Зэо ужым, я 50 — 60-рэ илъэсхэм, адыгэ литературэм къыхэхьэгъэ кIочIакIэхэм ежь МэщбэшIэ Исхьакъ, Iэшъынэ Хьазрэт, Бэрэтэрэ Хьамидэ зэращыщхэр, мы уахътэр гушъхьэ гъэбэжъукIэ зэрэбаигъэр, адыгэ поэзием ыкIи прозэм хэпшIыкIэу зызэраштагъэр, ежь иапэрэ поэтическэ сборникэу «ЦIыф лъэшхэр» зыфиIорэр къызыдэкIыгъэр илъэс 70-рэ мыгъэ зэрэхъугъэр къыIуагъ. Джащ фэдэу тилитературэ адыгэ гущыIэр дахэу зыгъэIорышIэрэ усакIохэр — Къ. КъумпIылыр, Н. Къуекъор, П. Кощбаир, мыхэм анэмыкIхэри къызэрэхэхьагъэхэм, непэ зимэфэкI хагъэунэфыкIырэ Къуикъо Шыхьамбый ыкIи ащ ипкъыгъо- лэгъу нэмыкI усакIоу тиIэхэм поэзиер зэрэлъагъэкIуатэрэр гуапэ зэрэщыхъурэр, литературэ ныбжьыкIэм ахэр кIэсэн пытэ фэхъунхэ зэрэфаер Исхьакъ къыIуагъ. Шыхьамбый бэшIагъэу зэришIэрэр, зэчый гъэнэфагъэ зэрэхэлъыр, фэсакъэу ар зэрилэжьырэр кIигъэтхъыгъ, псауныгъэ ыкIи творческэ гъэхъагъэкIэ фэлъэIуагъ.
Iэнэ хъураем гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм ишIэныгъэлэжьхэр, лъэпкъ искусствэм иIофышIэхэм ащыщхэр, журналистхэр,
Адыгэ республикэ гимназием икIэлэегъаджэу М. ТхьакIущынэр хэлэжьагъэх.
Къуикъо Шыхьамбый ыныбжь илъэс 60 зэрэхъугъэм фэгъэхьыгъэ Iофтхьабзэр зэрищагъ АРИГИ-м ипащэ игуадзэу, филологие шIэныгъэхэмкIэ докторэу Биданыкъо Марзият.
Апэрэ гущыIэу «Лъэпкъ гупшысэрэ лъэпкъ зэхашIэрэ зиIэ усакIу» зыфиIорэр къышIыгъ институтым литературэмкIэ иIофышIэ шъхьаIэу, филологие шIэныгъэхэмкIэ кандидатэу Шъхьэлэхъо Дарико. Ащ кIалэм икъэхъукIэ, къоджэ еджапIэм щеджэзэ апэрэ усэр зэритхыгъагъэр, IупкIэгъэ-гупкIагъэ зэрэхэлъыр къызэрэнэфагъэр, Шыхьамбый иадыгабзэ къыIузылъхьагъэу, адыгэ тхылъыбэм яджэщтыгъэу, пасэу зидунай зыхъожьыгъэ янэ мы шэнышIур къыпкъырыкIи, Шыхьамбый пытэу усэным зэрэгоуцуагъэр Дарико къыIотагъ. УсакIом тхэкIэ-шIыкIэ амал зэрэIэкIэлъри, игупшысэ дахэу зэригъэIорышIэри щысэхэмкIэ къыриIотыкIыгъ.
Шъэогъу-ныбджэгъум фэдэ хъун зэрэщымыIэм ищысагъ. Москва щызэIукIэхи, щызэдыщыIагъэхэу, щеджагъэхэу, дэгъоу зэрэшIагъэхэу, непи а зэкIэ зыухъумэу, АР-м ыкIи Къалмыкъ Республикэм культурэмкIэ язаслуженнэ IофышIэу Хьакъуй Аслъан зэIукIэгъум зэрэхэлэжьагъэр. НыбджэгъушIур усакIомкIэ аукъодыеу щымытэу, зэрэамалышIур, ащ гупшысэр къыгъэтIэмэу зэриIэтырэр Аслъан къыIуагъ, ишъэогъу ицIыфыгъэ зэригъэразэрэр, иусэхэр зэрикIасэхэр кIигъэтхъыгъ.
УсакIоу, журналистэу Дэрбэ Тимур къиIотыкIынэу «Къуикъо Шыхьамбый ипоэзие — псынэпс чъэбзагъэм игъундж» зыфиIорэр къышIыгъ. Шыхьамбый илъэс 40 Iэпэ-цыпэ хъугъэу зэрэтхэрэр, усэ тхылъ 11 къызэрэдигъэкIыгъэр, ахэр щыIэныгъэр шIу озыгъэлъэгъухэу ыкIи зэхэозыгъашIэхэу зэрэгъэпсыгъэхэр, усакIом темэ зэфэшъхьафыбэмэ Iоф зэрадишIэрэр: ным, Родинэм, анахьэу икъуаджэу, ипсыхъоу Лабэ яшъэбэ Iушъашъэ, яжьыкъэбзэ IашIу апэпшIын гори щымыIэу, кIэлэгъур нэм къыкIэзгъэуцожьхэу, усакIор хъупхъэу Тимур ылъытагъ.
Iэнэ хъураем хэлэжьагъ ыкIи къыщыгущыIагъ филологие шIэныгъэхэмкIэ докторэу, литературоведэу, институтым инаучнэ IофышIэ шъхьаIэу Мамый Руслъан. Ащ гущыIэу «Гупшысэм илъэгъохэщ» зыфиIорэр къыриIотыкIыгъ. Къуикъо Шыхьамбый усэкIо чъэпхъыгъэу зэрэщытыр, лъэпкъ шэн-хабзэхэри, шIулъэгъу къабзэу гум хэзыгъахъори, ным ишIулъэгъу ыуаси, ныбджэгъуныгъэ-цIыфыгъэм илъэпIагъи зэхэозыгъашIэхэу, ипоэзие тэмабгъоу ылъытагъ. ЗэлъашIэрэ шIэныгъэлэжьэу ЩэшIэ Казбек итхыгъэ-статья ыуж, е тхэкIо зэкIэупкIэгъэ Iушэу П. Кощбаем гущыIэ фабэхэу, мэхьанэ зиIэхэу, зэкIэ Шыхьамбый иусэ сатырхэр къызщаупкIэпкIыгъэхэм ауж, зыгорэ къэмыIожьыми хъунэу Мамыим ылъытагъ, юбилярым ыпэкIэ лъыкIотэнэу фиIуагъ.
ЗэIукIэгъум гуманитар ушэтынхэмкIэ Адыгэ республикэ институтым иIофышIэхэу, шIэныгъэлэжьхэу Цуекъо Нэфсэт, Анцокъо Сурэт, Агъыржьанэкъо Симхъан, ЖакIэмыкъо Зарим, Шэуджэн Тэмар, усакIоу, журналистэу ГутIэ Саныет, мыхэм анэмыкIхэри лъэныкъо зэфэшъхьафхэмкIэ Шыхьамбый итворчествэ, кIалэм ипоэзие шIуагъэу хэлъыр зэкIэ кIамыгъэзэу къытегущыIагъэх.
Мы зэкIэм ялъытыгъэу къэпIон плъэкIыщтыр, хьалэлэу адыгэ литературэм щылэжьэрэ усакIоу Къуикъо Шыхьамбый ипоэзие гъунэ лъафэу зэрэлъыплъэхэрэр, епэсыгъэ уасэ зэрэфашIырэр, къыIорэр IупшIыкIэу, зэхэугуфыкIыгъэу зэригъэпсырэм цIыфхэр зэригъэразэхэрэр, псауныгъэкIэ, тхъагъокIэ зэрэфэлъаIохэрэр кIагъэтхъыгъ ыкIи усакIоу Къуикъо Шыхьамбый ипоэзие къизыIотыкIырэ тхылъхэр фатхынхэр зэрищыкIагъэр къаIуагъ.
Мамырыкъо Нуриет.