Урысые общественнэ организациеу «Бизнесым хэт бзылъфыгъэхэр» зыфиIорэмрэ зекIонымрэ зекIо инфраструктурэмрэ я Ассоциацие и Комитетрэ чъэпыогъум и 18-м УФ-м и Къэралыгъо Думэ идепутатхэм Iэнэ хъурае адызэхащэгъагъ, ащ министерствэ ыкIи къулыкъу зэфэшъхьафхэм ялIыкIохэр хэлэжьагъэх. Iэнэ хъураер зыфэгъэхьыгъагъэр: «ЗекIоным иамалхэр ыкIи ипшъэрылъхэр».

УФ-м и Къэралыгъо Думэ зычIэт унэр ары Iофтхьабзэр зыщыкIуагъэр. ЗекIонымрэ зекIо инфраструктурэмрэ я Комитет итхьаматэ иапэрэ гуадзэу Николай Валуевыр, фракциеу «Единэ Россием» хэтэу Алексей Волоцковыр, федеральнэ партийнэ проектэу «Единэ Россием» ибзылъфыгъэ движение» зыфиIорэм икоординаторэу Наталия Полуяновар Iэнэ хъураем къыщыгущыIагъэх.

Адыгэ Республикэм ыцIэкIэ Iофтхьабзэм хэлэжьагъэх «Бизнесым хэт бзылъфыгъэхэр» зыфиIорэ шъолъыр Ассоциацием ипащэу Наталья Долбинар, шъолъыр къутамэу Адыгеим щыIэм итхьаматэу Наталья Артемьевар.

«Адыгэ Республикэр апэрэхэм ащыщ, зыгъэпсэфыгъо уахътэр зыщагъэкIонэу Урысыем къыщыхахырэ анахь чIыпIэ дэгъуитфымэ тахэфагъ», — къыщыхигъэщыгъ Iэнэ хъураем Наталья Долбинам.

Зэхэсыгъом изэфэхьысыжь документэу агъэхьазырыгъэм АР-м зекIонымкIэ ыкIи зыгъэпсэфыпIэхэмкIэ и Комитет игъоу ылъэгъугъэ Iофыгъор хагъэхьагъ, ар зыфэгъэхьыгъэр зекIон IофхэмкIэ грантхэм ятын лъыгъэкIотэгъэныр ары. Джащ фэдэу ащ щаштагъ Наталья Артемьевам къыIэтыгъэ Iофыгъоу культурнэ кIэным дэлажьэхэрэм IэпыIэгъу афэхъугъэным фэгъэхьыгъэри.